Пецясто, февралень 17-це чистэ, Мордовиянь Прявтось Владимир Волков примась участия республикань судьятнень итогонь промкссонть, косо ёвтазь 2016 иень важодемань итогтне, истя жо кемекстазь, мезе лангсо эряви роботамс сы шкастонть.
«Течи судебной системантень покш мель яви Россиянь Федерациянь Президентэсь, - мерсь В.Д.Волков. - Тешкстазь башка тевтне, конат токшить судейской корпусонть. Истя, эряви ладямс важодеманть законодательстванть паролгавтомга, правань ванстомань ды судебной практикасонть чумондомань уклононть эйстэ отказонть коряс. Нама, талновтыця кевкстематнеде, кода лия систематнесэяк, аволь аламо. Ансяк меельце 3-4 иетнень перть топавтозь ламо тевть, конат вадря енов полавтызь судебной системань организациянть ды тевтнень ванкшноманть».
МР-нь Прявтонть валонзо коряс, республикань судебной системасонть истя жо улить вадря енов полавтомат. Кассь эрицятнень кемемаст судебной властентень. Уш зярыя иень перть редяви судонтень ванстоманть кисэ пшкадематнень ламолгадомась. Региононь эрицятне неить, кода полавтовсть судонь зданиятень ушоёнксост. Судопроизводсванть вадрялгавтомга тевс нолдавить электронной технологиятне, сынст ютксо «Правосудие» автоматизированной системась, теезь судонь сайтт.
«Иестэ иес ламолгадыть судонь заседаниятне, конат ютавтовить видеоконференцсвязенть лувсо. Покш важодема топавтозь обществанть туртов судебной тевдеемань панжадочинть коряс (судебной решениятнень печатамось, Интернетсэ судьятнеде кулятнень максомась), - толковизе Владимир Волков. - Ули мелем тешкстамс властень исполнительной органтнэнь, законодательтнень, правань ванстомань блоконть ды судонть ютксо межведомственной вейсэнь важодеманть».
Кода тешкстызе республикань Прявтось, вейсэнь важодемань прявт кевкстемась - Мордовия Республикань мировой судьятнень тевдеемаст топавтомась. Самай сынь топавтыть сехте ламо тевть.
«Эсенек пельде минь поладсынек республикасонть мировой юстициянь важодеманть туртов условиятнень тееманть, мировой судьятнень туртов материально-технической условиятнень вадрялгавтоманть», - тешкстызе В.Д.Волков.
2016 иестэ кемекстазь закон, конань коряс 2 единицас (42 саезь 44 видьс) ламолгавтозь мировой судьянь таркатне ды судебной участкатне, те лезды республикасонть вейкетьстэ явомс мировой судьятнень лангс важодеманть.
«Теке шкастонть, судтнэнь лангс путозь тевтнень кевкстемась кадови талновтыцякс. Лиясто судьятнень а сатыть виест топавтомс покш важодеманть. Нама, те путы тешкс судебной акттнэнь качестваст лангс, вети судебной ильведевкстнэс. Миненек вейсэ эряви кемекстамс тевть, конат лездыть витемс те кевкстеманть, - тешкстызе Мордовиянь Прявтось. - Тынь вадрясто содасынк топавтовиця тевтнень ды ресурстнэнь, конатнень мереви нолдамс тевс, судтнэнь важодемантень электронной технологиятнень седе тов нолдамонть. Истя, электронной документооборотс ютамось уш ней лезды киртямс судтнэсэ тевтнень ванкшномань шканть ды вадрялгавтомс тевтнень судебной решениятнень топавтоманть коряс».
Башка кевкстемась - присяжной заседателень институтонть одкстомтомась, 2018 иень июнень 1-це чистэнть саезь райононь судтнэнень мереви ванкшномс уголовной тевтнень присяжнойтнень пингстэ.
«Васняяк, те райононь судтнэнь туртов присяжной заседательтнень качественной спискатнень теемась. Нама, минь чаркодтяно, те сюлмавозь ярмаконь ютавтоманть, эсест присяжнойтнень кандидатуратнень кочкамонть марто. Весементь эряви ванкшномс, арсемс ды кемекстамс эрявикс решеният, - мерсь Владимир Волков. - Россиянь Президентэсь Владимир Владимирович Путин путы икеленек вейсэнь тевть, конат сюлмавозь судейской копусонть ды правань ванстомань весе системанть марто целанек».
Тешкстазель, башка мель эряви явомс эрицятнень важодемань праваст ванстомантень, сынст ютксо важодемань кисэ пандомань кевкстематненень, эрицятнень башка категориятнень - ламо эйкакшонь кастыця семиятнень, пенсионертнэнь, уроз-эйкакштнень, инвалидтнэнь - праваст ванстомантень, аволь алкуксонь продукциянть микшнемасто саемантень, зыянонь кандыця товартнэнь ды услугатнень миеме а нолдамонтень, сынст ютксо аволь алкуксонь алкоголень продукциясь ды лекарстватне.
«Ламо стакачить таштавсть жилищно-коммунальной хозяйствасонть. Эряви редямс коламотнень коммунальной услугатнень лангс питнетнень ладямсто, ташто кудосто одс эрицятнень ютавтомсто, капитальной ремонтонь фондсто ярмактне видестэ ютавтомсто, - мерсь республикань Прявтось. - Эряви максомс правань виде питне должностной лицятнень, управляющей компаниятнень ды услугань явиця организациятнень тевест а топавтоманть кисэ. Минь содатано, сынст мельтеме важодемась, эсь тевест беряньстэ топавтомась лиясто вети покш зыянс».
Башка мель Владимир Волков явсь ЖКХ-нь сферасо, потребителень рынкасо, строительствасо, уштомань-энергетикань комплекссэ, модань отношениятнень ды вирень промышленностень отраслясонть, кредитэнь-финансонь ды банконь секторсонть экономикань преступлениятнень редямонь коряс важодеманть виевгавтомантень.
«Прявт кевкстемась - бизнесэнть важодеманть туртов условиятнень теемась, ули-паронь весе форматнень ванстомась, закононь каршо молиця пансематнень эйстэ предпринимательтнень ванстомась, - тешкстызе МР-нь Прявтось. - 2017 иесь Россиясо лемдезь Экологиянь ванстомань иекс. Те кармавты минек пштистэ ванномс перть пельксэнь ванстомань коряс законтнэнь топавтоманть мельга. Сехте пшти кевкстематне тесэ сюлмавозь шукшпрятнень тееманть, модатнень ды лейтнень рудазкавтоманть, вирень сюпавчитнень саламонть ды вирьтнесэ пожаронь а нолдамонь вешематнень коламонть, модань сюпавчитнень саламонть марто. Миненк эряви пштистэ ванномс те ёнкссо коламотнень а нолдамонть мельга».
Исят жо вейсэнь важодемань эрявикс ёнксокс ёвтазь терроризмань ды экстремизмань а нолдамось.
«Россиянь Президентэсь В.В.Путин башка тешкстызе судебной системань кадрань пештемань, правосудиянь панжадочинь кастомань кевкстематнень. Эряви ванстомс судейской корпусонь ваньксчинть ды кастомс кемеманть судонтень кода эрьва ломаненть праванзо прявт ванстыцянтень - апак вано сонзэ ярмаконзо, иензэ, раськентень кандовоманзо эли службасо таркань саеманзо лангс. Тынк важодеманк эйстэ ашти видечинтень, закононть икеле весень вейкетьксчинтень кемемась. Мельвановикс ялгат! Ёвтан сюкпря эрьвантень эйстэнк лезэв важодеманк кисэ. Арсян тенк паро тевть ды весе вадрянть», - мерсь Владимир Волков.
Справкась:
Мордовиянь судтнэсэ, сынст ютксо весе уровнянь федеральной судьятне ды мировой судьятне, 2016 иестэ ванкшнозь 5367 ломанень коряс уголовной 5029 тевть. 2015 иенть коряс, уголовной тевтнень ванкшномась киртявсь 0,6%.
2016 иестэ райононь судтнэсэ ванкшнозь уголовной 2024 тевть 2325 лицянь коряс, те 0,5% седе аламо 2015 иень невтевкстнэнь коряс. Приговоронь евтамо марто прядозь тевтнень ютксто ванкшнозь 1676 тевть. 1,4% ламолгадсть аволь стака тевтне ды кармасть 17% тевтнень ютксто. Пек стака преступлениятнеде тевтне кармасть 6%. 2016 иестэ ванкшнозь 624. 1,5% киртявсть средней тяжестень тевтне.
2016 иестэ прядозь тевтне сюлмавозь сюпавчис бажамонть марто, истя жо наркотической средстватнень аволь закононь коряс оборотонть марто.
Киртявсть чевтелгавтыця тувталтомо маштоматнень коряс тевтне (шумбрачинтень покш ды средней тяжестень зыянонь кандомась, ардомань безопасностень ды транспортонь эксплуатациянь правилатнень коламось).
2016 иестэ райононь судтнэсэ ванкшнозь 15091 представления, ходатайства ды пеняцямо, те 6,4% седе ламо 2015 иень невтевкстнэнь коярс.
Судтнэсэ уголовной весе тевтне ды материалтнэ ванкшнозь шкань апак кола.
Апелляциянь ванкшноматнень коряс 46 лицятнень коряс полавтозь приговортнэ ды постановлениятне. Чумондомань приговортнэ полавтозь 1 инстанциянь судтнэс тевтнень пачтямонть марто, чумондомань од приговоронть евтамонть марто, чумочинть каямонть марто, тевтенть лоткавтоманть марто.
2016 иестэ важодемань качестванть мельс саезь приговортнэнь стабильностесь кармась 96,7%, те 2,1 % седе ламо 2015 иенть коряс.
2016 иестэ райононь судтнэсэ ванкшнозь гражданской ды административной 23749 тевть. 2015 иенть коряс тевтне аламолгадсть 9,5%.
Семиятнесэ правоотношениятнень коряс пелькстамотнень марто сюлмавозь тевтне крамасть 632 эли 4,1%. Ламот тевтне - тетянь-авань праватнень саемадо - 158, эйкакштнень воспитаниянть коряс пелькстамотне - 90 тевть.
Трудонь пелькстамотнень коряс тевтне крамасть 3% эли 434 тевть. 170 тевтне токшить важодемань кисэ долгтнень вешеманть марто, 45 - важодема таркань максыцянть мелензэ коряс роботасто панемань пелькстамот.
Моданть лангс собственностень марто сюлмавозь тевтне кармасть 15% эли 2267 тевть. Сеедьстэ, те садпирень участкатнень эли ули паронь объекттнэнь лангс собственностень праватнень ёвтамодо пелькстамотне - 176, тевтнеме аштиця модань участкатнень лангс собственностень праватнень ёвтамось - 1480 тевть.
Эрямотаркань правоотношениянь ёнкссо тевтне кармасть 11,2% эли 1699 тевть, пенсиянь законодательствань - 584 эли 3,8%.