Мордовиянь Прявтось Владимир Волков маень 3-це чистэ примась участия «Россия – 2018» АНО-нь наблюдательной советэнь промкссонть. Видеоконференциянть лувсо промксонть ветизе Россиянь Президентэсь Владимир Путин, прявт темакс кармась футболонь коряс масторлангонь сыця чемпионатонтень стадиононть ды инфраструктурань лия объекттнэнь анокчист.
Государствань прявтось тешкстызе, анокстамось малав прядовсь, Россиясь турнирэнтень анок.
«Минек, кода турнирэнь седейшкавань, мелень ваныця азортнэнь, прявт тевесь мелявтомс эрьва ваныцянть кисэ, конась сы первенствань матчтнес. Волонтёртнэ, услугань сферань представительтне, конат важодить чемпионатонь объекттнэсэ, улест анокт явомс лезкс инжетненень ламот кевкстематнень коряс: улезэ те кельгстемась, ярсамось эли культурань программась, – тешкстызе Президентэсь.
Государствань прявтось истя жо тешкстызе, теезь инфраструктурась, ков совить неень шкань аэропортнэ, вокзалтнэ, китне, развязкатнэ, цифровой технологиятнень ды управлениянь интеллектуальной систематнень сферасо важодевкстнэ, лездыть Россиянь регионтнэнь, оштнень виевгавтомантень, деловой активностенть кепедемантень масторсонть целанек ды, нама, ломантнень эрямост вадрялгавтомантень.
Видеоконференцсвязенть лувсо ветявсть виде ключамот Самарасто, Калининградсто ды Нижний Новгородсто.
Промкссонть ульнесь ФИФА-нь прявтось Джанни Инфантино, конась тешкстызе чемпионатонтень Россиянть анокчинзэ ды ёвтась кемема, минек масторось ютавтсы сонзэ пек вадрясто.
Видеоконференциянть прядовомадонзо мейле республикань Прявтось Владимир Волков «Мордовия Арена» стадионсонть ютавтсь важодемань промкс турнирэнтень, истя жо варчамонь кадовозь матчтнес, конат ютавтовить маень 4-це ды 16-це читнестэ, анокстамонь кевкстематнень коряс.
Мордовия Республикань Прявтонть пресс-службась