Мордовиянь Прявтось Владимир Волков пшкадсь эрьва иень Кучома марто МР-нь Государственной Собраниянтень

Мордовиянь Прявтось Владимир Волков пшкадсь эрьва иень Кучома марто МР-нь Государственной Собраниянтень

Февралень 28-це чистэ Мордовиянь Прявтось Владимир Волков пшкадсь эрьва иень Кучома марто МР-нь Государственной Собраниянтень, промксось ютавтовсь Республикань культурань дворецэнь залсонть.

МР-нь Прявтонть валонзо коряс, апак вано стакачитнень лангс, 2016 иестэнть республикантень удалась саемс редявикс изнявкст. Экономикань весе отраслятне прядызь иенть вадря невтевкс марто. ВРП-нь касомась кармась 3,5 процентт, икеле иенть коряс ванстозь инвестициянь путовкстнэ. Кассть эрямо таркань ды ки лангонь строямонь покшолматне, Саранскойсэ панжозь транспортонь артериянь прявт сюлмотне, теезь од кить республикань районтнэсэ. Топавтозь инфляциянть икельдиця алкуксонь зарплатанть кастомась.

Поладовсь социальной сферань виевгавтомась. Масторонь Правительстванть марто вейсэ Мордовиянь руководствась теи весементь ломантненень лездамга, социальной весе гарантиятнень топавтомга, кувать шкань социальной программатнень эрямос совавтомга. Те важодемась ули поладозь.

«Тешкстаса, апак вано экономикасо стакачитнень лангс, ютазь иестэ минек важодемась аравтозель аволь ансяк кризисэнть печтямонтень, васняяк экономиканть ды социальной сферанть веиевгавтомантень, - мерсь Владимир Волков. - Ды те важодемась максь лезэ: Мордовиясь совась масторонь сехте вадря регионтнэнь юткс Россиянь Президентэнть Владимир Владимирович Путинэнь «маень» Указонзо топавтоманть коряс. Минек арасть долконок зарплатанть коряс, тевтеме аштицятнеде - масторонь келес сехте аламо».

ЭКОНОМИКАСЬ

Мордовиясо промышленной производствань покшолматнень касомась (питнетнень мельс саезь) 2015 иенть коряс кармась 108%. 7% кассть аграрной секторонь покшолматне. Пурназь республикань историясо сюронь сехте вадря урожйтнестэ вейкесь, путозь рекорд ламбамо якстерькаень пурнамонть коряс, покшолгавтозь сывелень, алонь ды, васенцеде меельце иетнестэ, ловсонь производствась. 4 % седе ламо топавтозь тевть строительствасонть.

«2017 иестэнть миненек эряви топавтомс региононь валовой продуктонть касоманть 5 процентс, промышленной ды велень хозяйствань производстванть - 6%. Топавтомс эрямо таркань ды социальной объекттнэнь строямонь покш программанть. Добовамс, среднероссийской невтевкстнэнь коряс, 1,5-ксть эрьва ковонь зарплатанть кастоманть. Тень пингстэ топавтомс инфляциянть икельдиця эрицятнень ярмаконь доходост, - тешкстызе Республикань Прявтось. - Республикань седе тов виевгавтомась, ды, нама, ломантнень эрямост вадрялгавтомась, топавтови ансяк экономикань весе прявт отраслятнень одкстомтомаст вельде».

Республикась сайсь редявикс изнявкст инновациянь виевгавтомасонть ды сови икелев молиця регионтнэнь ютксс промышленной производствань покшолмасонть инновациянь продукциянь пельксэнть коряс (28%).

Бути кортамс прявт тевтнеде, конатнень путынзе региононь руководствась, тедеде эряви «Оптиковолоконные системы» АО-нть юрсо «Создание производства оптического волокна» проектэнть ливтемс васенце очередень проектэнь вийс ды ушодомс омбоце очередентень, истя жо виевгавтомс лезэнь кандыця зярыя проекттнэнь, конатнень топавтомась лезды панжомс важодемань тёжадо ламо од таркат.

Эряви поладомс важодеманть лезэнь кандыця зярыя проекттнэнь коряс:

- иезэнзэ алюминиень катанкань 10 тёжат тоннань проектэнть вийсэ алюминиень металлургической производствась («Сарансккабель»);

- 1,5 млрд. целковоень проектэнь покшолмасо силовой кабелень од видтнэнь нолдамось («ЭМ-КАБЕЛЬ»);

- иезэнзэ 50 единицань проектэнь вийсэ сталень вертикальной резервуартнэнь нолдамось («РМ Рейл РВС»);

- эрьва иестэ корпусонь ды чевте мебелень 15 тёжадо ламо комплектэнь нолдамонь коряс мебелень фабрикань строямось («Бертавуд»);

- 180 кудонь комплексэнь ды хозяйствань стявтовксонь 90 комплектэнь проектэнь вийсэ немецень технологиятнень коряс каркасонь-панелень кудотнень производствась («ЭкоЛайф»).

Истя жо ушодомс Саранскоень световой приборонь заводсонть иезэнзэ 500 млн.целковойс нолдамонь покшолматнес продукциянь производстванть.

Весе неть проекттнэ лездыть теемс тёжадо ламо важодемань од таркат.

Теде башка, эряви поладомс неть проекттнэнь:

- иезэнзэ 130 МВт-с келейгавтомс чипаень электростанциятнень («Хелиос-Ресурс») компонетнэнь важодиця производстванть, те лезды саемс  чипаень панелень  малав пелензэ Россияньрынканть, ды 2018 иентень кастомс производствань покшолматнень 7 млрд.целковойс. Важодемань од таркатнень - 135;

- технической одкстомтомась ды валдомтомань прибортнэнь келей нолдамось («Ардатовский светотехнический завод»), лисемс иезэнзэ 5 млрд.целковойс покшолматнес;

- вадрялгавтозь характеристикатнень марто бактерицидной излучательтнень («НИИИС имени Лодыгина») опытэнь нолдамонь келейгавтомась;

- 2019 иентень 2 млрд. целковойс производствань покшолматнень кастоманть марто силовой электроникань технологиятнень теемась-арсемась ды од элементэнь базань нолдамось («Орбита»). Теде башка, «Орбитасо» эряви одкстомтомс производствань вийтнень иезэнзэ 250 млн. целковойс од «корпуссо изделиятнень» тевс нолдамонь марто;

- солавтозь серань ды пекань усксемань туртов вагонтнэнь нолдамось («Рузхиммаш»). Иезэнзэ те 500 вагонт ды важодемань 500 ламо од таркат.

Тедеде эряви ушодомс од проектт:

- валомань технологиянть коряс алюминийде ды сонзэ валовкстнэде катанкань нолдамось («Цветлит»). Проектэнть виезэ - иезэнзэ 46 тёжат тоннат;

- иезэнзэ 150 млн. целковойть проектэнь вийсэ велень хозяйствань техникань од видтнэнь нолдамонть одкстомтомась («МордовАгроМаш»);

- 60 млн. штукас покшолматнень кастоманть марто кирпицень нолдамонь одкстомтомась;

- «Биохимиксэ» лекарствань жидкой анок препаратнэнь ды активной фармацевтической субстанциятнень опытэнь-промышленной нолдамось, истя жо Россиясо импортонь полавтомань лувсо лекарствань од видтнэнь арсемань-теемань коряс научно-производственной васенце центранть теемась («Биохимик»).

«Миненек эряви кеместэ важодемс минек продукциянть лия ёнксов пачтямонь свалшкань кастоманть коряс. Миненек эряви теемс весементь, масторлангонь рынкасо важодеме маштыця предприятиятнень ламолгавтомга. Продукциянь экспортонь кастомань прявт ёнксокс ашти кластертнэнь виевгавтомась. Ютазь иень октябрясто «Волоконная оптика и оптоэлектроника» промышленной минек кластерэсь изнясь весроссиянь пелькстамосонть. Мордовиянтень максозь «Развитие инновационных кластеров - лидеров инвестиционной привлекательности мирового уровня» приоритетэнь проектэнь участникень статусось ды совавтозь Россиянь Минпромторгонь реестрас кода регион, конантень карми явовомо лезкс васенцетнень ютксто», - мерсь В.Д.Волков.

Мордовиянь Прявтось тешкстызе масторонь наукань прявт центрантнень ды школатнень марто вейсэнь важодемань виевгавтомань поладомань эрявиксчинть, Мордовиянь госуниверситетэнь технологиятнень трансферэнь Куншкакуронть, вузтнэнь пингстэ инновациянь вишка предприятиятнень, бизнес-инкубатортнэнь таликаст, технологиянь задачатнень решамонтень изобратательтнень ды рационализатортнэнь тердеманть.

«Мельс саезь, федеральной бюджетстэнть аволь сырьевой экспортонь господдержкантень маласо колмо иетнестэ явовить 80 млрд.целковойть, республикань предприятиятненень, конат важодить импортонь полавтомань проекттнэнь коряс, лия ёнксов продукциянь пачтицятненень эряви ёроковсто совамс неть программатнес, - мерсь Владимир Волков. - Федеральноенть коряс минь истя жо теинек Промышленностень виевгавтомань Республикань Фонд. Сонзэ лезксэнзэ вельде предприятиятненень федеральной фондсто максови льготань заём экспортонь проектнэс 20-100 млн. целковоень покшолмасо, конань эряви велявтомс 5 иень перть».

ВЕЛЕНЬ ХОЗЯЙСТВАСЬ

Ютазь иесь тешкстазь Мордовиянь агропромышленной комплекссэ редявикс, рекордонь изнявкстнэсэ. Течи те республикань экономикань ёроковсто виевгадыця ды лезэнь кандыця отрасля, масторонь келес сехте вадрятнень ютксто вейкесь.

«Минек аграрийтнень лезэв важодемаст вельде пурназь 1 млн 314 тежат тоннат сюро, сынст ютксо 190 тёжат тоннат кукуруза. Вейке гектарстонть саезь малав 30 центнерт. Те омбоце результат республикань историясонть! Ламбамо якстерькаень валовой пурнамось кармась 1 млн 70 тёжат тоннат, вейке гектарстонть саезь 434 центнерт. Те сехте вадря невтевкс Равчирень округсонть. Ков седе ламо кастозь эмежть, тень пингстэ эмежень 16 тёжат тоннатне кастозь ванстозь модасо, те 12% седе ламо ютазь иенть коряс. Ракшань вейке прянть лангс анокстазь коромонь 30 центнерт, те сюронь пельксэнть апак лово, - мерсь В.Д.Волков. - Моданть мельга якицятне путсть кеме юр сы шкань урожаенть туртов. Озимой культуратне видезь 182 тёжат гектарс. Весе вешематнес почодозь яровой культурань видьметне. Анокстазь модась ламбамо якстерькаенть туртов. Пештеви неень шкань сельхозтехникань паркось. Ансяк мелят рамазь 50 од тракторт ды неень шкань 40 комбайнат».

Рекордонь невтевкст изнязь ракшань кастомасонть. Ракшань ды саразонь сывелень нолдамонь иень покшолматне кармасть 279 тёжат тоннат. Нолдазь 1 млрд 422 млн алт. Ловсонь валовой потявтомась кармась 409 тёжат тоннат, 2015 иентень касомась кармась малав 4 тёжат тоннат. Велень хозяйствань организациятнесэ ды КФХ-сэ вейке скалонть пельде потявтозь ловсонь малав 5700 килот, иезэнзэ прибавазь 304 килот. Улить хозяйстват, конат печтизь 10 тёжань невтевксэнть. Те Ицялонь ёнксонь «Агро Мир» ды «Дружба» (10107 кг ды 10607 кг) ды Лямбирень ёнксонь «Октябрьская» агрофирмань Елховкань отделениясь района (10288 кг).

«2017 иестэнть эряви ванстомс аграрной производствань кастомань динамиканть, нолдамс ракшань ды саразонь живой сталмосо сывелень 287 тёжат тоннат, ловсонь - 415 тёжат тоннадо ламо ды вейке скалонть пельде потявтомс ловсонь 6000 килот. Алонь нолдамось улезэ 1 млрд 450 млн штукат, - мерсь МР-нь Прявтось. - Башка тешкстаса: икеле тенек эрявсть 6 иеть тёжа килограммас ловсонь продуктивностенть кастомга. Кавто иеде икеле минь печтинек 5 тёжань невтевксэнть. Ней минь малавгалитяно 6 тёжатнес! Истя, тёжань невтевксэнть минь печтясынек колмо иес! Ды те топавтовикс! Андоманть вадрялгавтомга ды селекциянь-племань виде важодеманть вельде. Неть ёнкстнэнь коряс минек улить вадрят маштомачинек-содамочинек. Эряви теемс ловсонь качествань селекциянь ванкшномань лаборатория!».

Покш тевть путозь сюронь-тикшень кастомань отраслясонть. 2017 иестэнть эряви пурнамс 1 млн 330 тёжат тоннадо аволь седе аламо сюро, сыця кавто иетнень перть печтямс 1,5 миллиононь невтевксэнть, тень туртов эряви 10 тёжат гектарс покшолгавтомс видемань паксятнень ды паролгавтомс видемань паксятнень структуранть.

«Эряви ёроковсто виевгавтомс сокицянь-видицянь (фермерэнь) хозяйстватнень. Неень шкане республикасо эйстэст тёжадо ламо, сынь пурныть сюронь 12 процентнэнь, саить эсест таркаст ловсонь ды сывелень рынкасонть. Теде башка, минек фермертнэ примить участия эште вейке пярвт тевенть топатвомасо - максыть важодема велень эрицятненень», - толковизе Мордовиянь Прявтось.

Меельце иетнестэ покшолгавтови ярсамопелень ды перерабатывающей промышленностень производствась. Ансяк ютазь иестэнть предприятиятне груздясть продукция 67 млрд целковоень питнесэ эли 16% седе ламо 2015 иенть коряс.

Нолдазь 95 тёжат тоннат колбасонь изделият, малав 16 тёжат тоннат сыра, 109 тёжат тоннат сахор.

Мордовиянь товартнэнь покш качестваст ёвтамокс кармась аграрийтнень участияст раськеютконь ды весероссиянь покш выставкатнесэ. Ансяк мелят «Сырнень сёксь» выставкасонть минек предприятиятне сайсть пек ламо медальть - 36, сынст ютксо 26 сырнень ды 10 сиянь. Ды кавксоце ие республикась саи Гран-при.

«Переработкань минек предприятиятнень улить вадря шансост раськеютконь рынкантень лисеманть туртов. Теде башка федеральной уровнясонть кемекставить велень хозяйствань продукциянь  нолдамонь ды экспортонь кастомань туртов лезксэнь ёнкст. Теде В.В.Путин пачтясь Стратегической виевгавтомань ды приоритетэнь проекттнэнь коряс Советэнь промкссонть, - толковизе Владимир Волков. - Минек арсематнень эрямос совавтомга, тедеде эряви поладомс инвестициянь зярыя покш проекттнэнь топавтоманть, сынст ютксо истят, кода: 95 тёжат тоннас (седе тов 140 тёжат тоннас лисемась) колбасонь производствань кастомась («Атяшевский» МПК-сь); ярсамопелень компаундтнэнь нолдамонь коряс линиятнень тевс нолдамось («Рузово»). Истя жо ушодомс од прявт проекттнэнь топавтоманть: ловсонь переработкань коряс цехень строямось («Норовское молоко»); Отяжбуесэ мясокомбинатсонть чинь-вень перть 50 тоннас сывелень кельмевтемань ды чинь-вень перть 200 тоннас сывелень керсемань вийтнень кастомась; покшолгавтомс зёрнань-зёрна аштиця топонь нолдамонть 10 тоннас анок продукция чинь-вень перть («Саранский» ловсонь комбинатось); эмежень 1300 тоннань нолдамонь покшолма марто теплицань эштё вейке комплексэнть строямось («Тепличное»).

Велень хозяйствань производствань виевгавтомась сюлмавозь велень социальной вадрялгавтомань коряс важодеманть марто. Мелят «Устойчивое развитие сельских территорий» программанть коряс эрямо таркань условиятнень вадрялгавтоманть туртов господдержка явозь 192 семиятненень, теезь эрямо таркань 17 тёжат кавонзазь метрат, путозь ведень 51 ды газонь 12 сетень километрат.

Стявтозь ды панжозь: Покш Игнатовасо тонавтницянь 150 таркас школа, Ковылкина ёнкссонь Кочелаево велесэ 75 таркас ды Орданьбуе ёнкссонь Баеньбуе велесэ 55 таркас эйдень кужот, Краснослободск ёнкссонь Куликово велесэ 120 таркас культурань кудо, Баеньбуесэ социальной куншкакуро, Ицялонь ёнкссонь Кергуды велесэ ФАП, Атюрьевасо стадион.

«Тедеде эряви поладомс велесэ эрямо таркань строямонть - тень туртов федеральной бюджетстэ явозь 161 млн.целковойть. Республиканть лезксэнзэ вельде неть ярмактнень вельде од кудос совить эштё малав кавто сядот семият. Поладови ведень ды газонь пачтямонь объекттнэнь стявтомась. Эряви прядомс Ковылкина ёнксонь Кочелаево велесэ комплексэнь компактной стряомонть коряс проектэнть ды ушодомс од проектэнь топавтоманть Дубёнкань ёнксонь Орданьбуе велесэ», - мерсь Республикань Прявтось.

СТРОЯМОНЬ ОТРАСЛЯСЬ

Ютазь иесь ульнесь вадря строямонь отраслянть туртов. Важодемань покшолматне тесэ кассть 27 млрд целковойс. Совавтозь эрямо таркань 328 тёжат кавонзазь метрат, те 4 тёжадо седе ламо икеле иенть коряс. Ёроковсто кармасть совавтовомо неень шкань технологиятне ды отделкань материалтнэ.

Тедеде строительтнень икеле аштиця тевтне истя жо пек покшт. Эряви 7% кастомс важодемань покшолматнень ды стявтомс эрямо таркань 335 тёжат кавонзазь метрат, сынст юткссо 202 тёжат кавонзазь метрат эконом-классонь. Тень пингстэ башка мель эряви явомс «Жильё для российской семьи» программанть коряс комплексэнь строямонтень.

«Истя жо эряви топавтомс колмо ды седе ламо эйкакшонь кастыця семиятнень туртов эрямо таркань стявтомань туртов явозь модатнесэ коммунальной ды транспортонь инфраструктуранть тееманть туртов масторонь Президентэнть «маень указтнэнь», - мерсь МР-нь Прявтось. - Эряви поладомс лия енов а молиця, лезэвстэ важодиця ипотеканть. Тень пингстэ эряви келейстэ нолдамс тевс строямонь туртов документнэнь анокстамонь од условиятнень, проектэнь документациянть зярыяксть тевс нолдамонть, контрактнэнь сеземань рисктнень киртямонть ды лият. Маласо колмо иетнень перть ипотекань ды арендань проектнэс масторсонть эрьва ие кармить явовомо 20 млрд целковойть».

Федеральной бюджетстэ явозь 2,3 млрд целковоень покшолмасо финансонь лезксэнть вельде строязь ды витнезь 83 км ламо кить. Прядозь прявт трассанть теемась, конась сюлминзе Саранскоень кавто районтнэнь - Светотехстроенть ды Юго-Западонть. Панжозь Красная ды Севастопольская ульцятнень киулосонть аэропортонтень ветиця развязкась, троутуар ды велосипедэнь яннэ марто аэропортонть самс од кись. Поладозь Саранскоень Восточной обходонь строямось, конась Ялга посёлканть вакссо вейсэндясы «Саранск - Ульяновск» ды «Саранск - Рузаевка» китнень.

Мелят муниципальной образованиятне китнень лангс получасть 200 млн целковойде ламо. Те лездась строямс ды витнемс кинь 20 километрат комсь поселениятнесэ, витнемс автомобилень китнень велень хозяйствань продукциянь производствань ды переработкань объекттнэнь самс.

«Те иестэнть кинь строямонтень явовить 5 млрд целковойть. Миненек эряви витнемс ды строямс федеральной кинь 90 км ды региононь ды местной китнень 37 км. Сынст ютксо, поладомс Саранскоень Восточной обходонь строямонть, Торбеевань, Краснослободскоень, Ташто Шайговань ды Лямбирень районтнэсэ «Подъезд к Саранску от автодороги М-5 «Урал» кинь, Лямбирень ды Рузаевкань районтсэсэ «Нижний Новгород - Саранск - Пенза - Саратов» кинь, Чаунзань районсо «Саранск - Ульяновск» кинь зярыя пелькстнэнь витнеманть. Покш смусть канды Дубёнка велестэнть саезь Ульяновской областень границянть самс кинть теемань важодематнень прядомась, - мерсь В.Д.Волков. - Правительстванть иекелев путан прявт тев максомс федеральной собственностес Лямбирское шоссе - «Тепличное» участкасонть Саранскоень Северной обходонь кинть ды ютавтомс сонзэ педе пев витнеманть. Теде башка, Лямбирень шоссесэнть Светотехстройстэ саезь ГАИ-нь постонть видьс кинь витнеманть».

Тедеде республикась велень китнень строямс получи кавксть седе ламо ярмакт ютазь иенть коряс. 160 млн целковойде ламо ютавтовить автотрассатнестэ саезь велень хозяйствань производствань ды переработкань прявт объекттнэс, велень поселениятнес китнень строямс ды витнемс.

Республикань ки лангонь фондстонть китнень теемс мцниципальной образованиятненень явовить 305 млн целковойть.

ЖИЛИЩНО-КОММУНАЛЬНОЙ ХОЗЯЙСТВАСЬ

Ютазь иестэнть топавтозь покш важодема жилищно-коммунальной хозяйствань объектнэнь одкстомтоманть коряс. Государственно-частной партнерстванть лувсо районтнэсэ стявтозь автоматизированнойть блочно-модульнойть 8 котельнойть Ковылкинань, Рузаевкань ды Покш Игнатовань районтнэсэ, одкстомтозь котельнойтне ды лембень пачтямонь сетне Чаунза ды Комсомольский посёлкатнесэ. Ковылкинань ды Чаунзань ёнкстнэсэ кемекстазь концессионной соглашеният лембень пачтямонь объекттнэнь одкстомтомань коряс, те иестэнть тень туртов арсеви ютавтомс 230 млн целковойть.

Те иестэнть районтнэсэ эряви одкстомтомс 12 объектт 12 млрд. целковойс. Раойнтнэнь администрациятненень эряви нолдамс тевс государственно-частичной партнерствань лувонть. 2017 иенть Россиянь Президентэсь ёвтызе экологиянь иекс. Республикасонть экологиянь обстановканть вадрялгавтомантень редявикс путовкс канды Саранскойсэ ванськавтомань сооружениятнень од линиясь, конась строяви Россиянь Правительстванть ды Реконструкциянь ды виевгавтомань Раськеютконь банконть вейсэнь проектэнть лувсо. Весе тевтнень эряви прядомс колмоце кварталстонть.

Поладови важодемась ташто кудосто одс эрицятнень ютавтоманть коряс. Неть тевтнес явозь малав 5 млрд целковойть. Те лездась яжамс каладозь 400 кудот, совавтомс од эрямо таркань 115 тёжат кавонзазь метрат, максомс эрямонь од таркат малав 5700 ломантненень. Тедеде сентябрянь 1-це чинть самс эряви яжамс каладозь эрямо таркань малав 23 тёжат кавонзазь метрат, ды максомс од эрямо таркат 1600 ламо ломантненень.

Ютазь иестэнть капитальной витнема теезь ламо квартирань 293 кудотнесэ, весемезэ 984 тёжат кавонзазь метрат, косо эрить 43 тёжат ломанть. Тедеде важодемань покшолматне кармить седеяк покшт - эряви витнемс 351 кудо, весемезэ малав 1 млн 300 тёжат кавонзазь метрат, ды вадрялгавтомс 56 тёжадо ламо ломантнень эрямонь условияст. Башка мель эряви явомс витнемань тевтнень качествантень. Подрядной организациятнень важодемаст мельга ванномасонть примить участия Государственной жилищной инспекциясь, техничекой надзоронь ветиця организациятне ды, нама, ламо квартирань кудонь сынсь эрицятне.

«Капремонтонь программанть топавтоманть а сеземга, эряви топавтомс сонзэ финансированиянть. Тень эряви теемс Саранскоень, Рузаевкань ды Атюрьева ёнкстнэнь администрациятненень, косо капитальной витнемань пандоманть коряс тевтне молить лавшосто. Пурназь ярмактнень лангс, - эштё весть яван тень лангс мель, - теемс пек вадря ремонт, конась мейле а веши пеняцямот эрицятнень пельде, - тешкстызе Владимир Волков. - Истя жо тедеде эряви прядомс расчётонь куншкакуротнень тееманть Орданьбуень, Отяжбуень, Зубова-Полянань, Инсаронь, Кадошкинань, Темниковань ды Атюрьевань ёнксстнэсэ. Те лезды ванномс пандовкстнэнь мельга ды теемс вадря условият эрицятнень туртов жилищно-коммунальной услугатнень пандомсто».

Истя жо тешкстазель явомс мель поселениятнесэ вадря средань теемантень. Общественной таркатнень вадрялгавтомасонть весемесь прявт: ульцятнень валдомтомась, тротуартнэнь, эйкакшонь площадкатнень, ялго якамонь зонатнень теемась, эрявм пштистэ ванномс, кодамо ёжосо аштить парктнэ, кудотнень маласо таркатне. Ней тень туртов улить башка возможность - «ЖКХ и городская среда» проектэнть масторонь Президентэсь В.В.Путин совавтызе прявт проекттнэнь юткс.

Маласо колмо иетнень перть Саранскойсэ ды республикань районтнэсэ эряви топавтомс эсест территориятнень вадрялгавтоманть коряс комплекссэнь программат. Неть тевтнес тедеде явовить 200 млн целковойде ламо. Вадрялгавтомань коряс покш тевть сави топавтомс Саранскойсэ, истя жо китнень витнемаст коряс. Эряви витнемс Васенко, Ботевградской, Т.Бибинань ульцятнева, Луховка поселкасонть Заводской ды Николаевка поселкасонть Октябрьской ульцятнева молиця китнень. Теде башка, сентябрянть видьс эряви прядомс ошонь маласо кото велетнесэ веденень сетень строямонь коряс тедедень программанть.

«Эряви теемс весементь, эрицятне алкукс неевелизь ды маряволизь вадря ёнов полавтоматнень. Истя жо тешкстаса, те проектсэнть участиясь канды минек туртов башка смусть 2018 иень Чемпионатонтень анокстамонть марто, - толковизе Мордовиянь Прявтось. - Башка тешкстаса: анокставиця весе проекттнэнь эряви домкасто кортамс эрицятнень марто. Эряви кунсоломс сынст мелест-арсемаст. Икеле эсест кудотнень ды маласо аштиця таркатнень вадрялгавтомасо ёроков участиянть кисэ эрицятнень шнасть. Сехте вадрятненень максть «Дом образцового содержания» лемть. Эряви одкстомтомс те пелькстамонть ды явшемс казнеть изницятненень».

Ошонь пространстванть теемантень од ломантнень тердемга ёвтазь мель теемс пелькстамо студентт-архитектортнэнь ды весень туртов кудотнень маласо территориятнень ды подъездтнэнь мазылгавтомаст коряс, седе тов эрямонь комплексстнэсэ арт-сквертнэнь панжомаст марто.

2018 ИЕНЬ ЧЕМПИОНАТОСЬ

Республикантень эряви совавтомс тевс чемпионатонь весе объекттнэнь уш тедеде. Ней весе тевтне молить графикенть коряс, лиятне - икельдезь. Теке шкастонть зярыя мероприятиятне топавтовить покш стакачи марто.

«Правительствантень эряви виевгавтомс вейсэнь важодеманть «Спорт-Инжинирингенть» ды ««Казань ПСО-нть» марто, добовамс прявт объектсэнть - стадионсонть - важодемань сетевой графикенть топавтоманть. Эряви човорявомс Саранскоень аэропортонь витнемантеньгак, витемс кевкстематнень пассажирэнь од терминалонь строямонь проектэнть коряс, - тешкстызе В.Д.Волков. - Эряви эрязкавтомс Саранскоень ды Рузаевкань станциятнесэ ялго ютамонь сэдьтнень витнеманть, лезэвстэ важодемс «РЖД-нть» марто ды топавтомс неть проектнэнь иенть прядовомс. Целевой программань министерствантень эряви совавтомс тевс «Шератон» ды «Меркюри» гостиницатнень, прядомс «Тавла» гостиницань-эрямонь комплекссэнть строямонь-монтажонь тевтнень. Саранск ошонь округонь администрациянтень эрявить топавтомс ФИФАнь ды «Россия-2018» Оргкомитетэнь весе вешематнень, конат максозь чемпионатонь анокстыця-ютавтыця ошонтень».

ОБРАЗОВАНИЯСЬ

Меельце 5 иетнень перть Мордовиясо строязь ды витнезь 52 эйдень кужот, теезь 6,5 тёжат таркат. Неть тевтнес ютавтозь 2 млрд целковойть. 3-7 иесэ весе эйкакштнень максозь таркат эйдень кужотнесэ.

«Миненек эряви кирдемс мельсэ, од условиятне, васняяк, теевить тонавтомань неень шкань методикатнень топавтомаст туртов. Уш эйдень кужосо эряви нолдамс тевс сеть программатнень, конат кастыть эйкакштнень шкинемантень ды одонь арсемантень маштомачист. Минек улить частной куншкакурот, конат явить услугат ярмак лангс, сыненст покш мель явить тетятне-аватне. Кортамось моли вишкинестэ саезь омбо масторонь кельтнень тонавтнемасб, шкинемань студиятнесэ, од техникень кружоктнесэ важодемась. Образованиянь министрествантень эряви виевгавтомс те ёнкссонть государственно-частной лувонть коряс, явомс лезкс тонавтомань истят программатнень топавтомантень», - мерсь Республикань Прявтось.

Бути кортамс школатнеде, сыненст эряви редямс шкань весе вешематнень, эрязасто нолдамс тевс информациянь технологиятнень ды дистанционной тонавтомань ёнкстнэнь. Тень туртов аламо явшемс эйкакштненень ноутбукт, путомс электронной доска ды лемдемс тень электронной образованиякс. Эряви совавтомс тевс тонавтомань шкасто вейсэнь важодемань од лувонть, конась нежеди тонавтыцянть ды тонавтницянть  вейсэнь важодеманть лангс. Тонавтомасонть башка мель эряви явомс аволь ансяк теориянь содамочитнень чарькодемантень, истя жо проектэнь тевдеемантень, исследованиянь важодемантень.

Ниле иетнень перть республикасонть строязь 5 од школат весемезэ 1,5 тёжат таркас. Тедеде эряви прядомс Саранскоень Солнечной ульцясонть 550 таркас школанть, Инсаронь 1№ школанть ды Дубенка ёнкссонь Поваделесэ школанть витнемаст. Ушодомс од школатнень строямонть Краснослободскойсэ ды Рузаевкасо.

«5 иень ютазь школасо весе тонавтницятне тонавтнест вейке сменас, 2015 иентень весе школатнень зданиятнень эряви теемс неень шкань вешематнень коряс, - мерсь Владимир Волков. - Мордовиясь совась масторсонть васенце регионтнэнь юткс, конантень явсть ярмакт «Юбилейный» микрорайонсонть од школанть строямс, тосо кармить тонавтнеме малав 1,5 эйкакшт. «Тавла» тонавтнемань куншкакурось кармазо сы шкань школань невтевксэкс! Кода Ёроков эйкакштнень туртов лицейсэнть, тесэ эряви теемс инновациянь площадка, косо нолдавить тевс неень шкань технологиятне ды методикатне, тонавтомантень од варштавкстнэ. Тень веши экономикась, производствась ды сонсь эрямось! Минь строятано ды путтано вадря оборудования, педагогтнэнь ды тонавтницятнень пельде учотано покш изнявкст. Миненк ули кинь лангс ваномс. Мелят Весероссиянь олимпиадатнесэ Мордовиянь школасо тонатвницятне сайсть казнень 45 таркат. Те рекорд олимпиадань движениянь историясонть!».

Омбоце ие Ёроков эйкакштнень туртов лицеесь саи омбоце тарка Россиянь 500 сехте вадря школатнень ютксо. Рейтингентень истя жо понгсть Саранскоень 43-це лицеесь ды 20№ школась. Башка профильтнень коряс тешкстазь 4№ лицеесь, 12№ гимназиясь, 1№ школась, Краснослободскоень школась, Ельникень ды Торбеевань ёнксстнэнь велень кавто школатне.

Ёроков эйкакштнень марто важодеманть эряви ветямс системань лувсо. Тесэ ве ёно иляст аште вузтнэ. Эряви явомс весемеёндонь лезкс Мордовиянь пединститутонь «Академия успеха» наукань-тонавтнемань од проектэнтень, конань лувсо ашти эйкакштнень маштомачист ранаяк редямось ды кастомась, профессиянь лезксэнь явомась.

«Эряви, штобу преподавателесь аволь ансяк вадрясто содаволизе предметэнть, истя жо улезэ эсензэ тонавтницятнень туртов вадря психологокс ды превень максыцякс. Тонавтыцянть прявт тевезэ виевгавтомс эйкакштнень критикань максомань ванновтост, арсеме маштоманть ды ськамост важодеманть. Лиякс меремс, кодамо физик эли агроном касы эйкакшонть эйстэ, бути уш 1 классто саезь кудонь тевенть сонзэ кисэ теить весе, сондензэ башка? Виде, эряви лездамс минек эйкакштненень, ансяк а теемс сынст кисэ весе важодеманть. Те кармась покш стакачикс тетятнень-аватнень туртов. Эряви кардамс сеть тевтнень, зярдо сынсь тонавтыцятне кучить эйкакштнень репетитортнэнень, тешкстыть, эряви «кепедемс» содамочст башка предметэнть коряс, - толковизе МР-нь Прявтось. - Школань прявтнэнень, тонавтыцятненень, тетятненень-аватненень - весенень эряви кирдемс мельсэ, тонавтомань процессэнть прявтось - воспитаниянь лувось. Эрьва уроконть - математикань, рузонь келень, физкультурань - смустесь максозо воспитания».

Покш мель эряви явомс тонавтомань ды воспитаниянь патриотической лувонтень. Эйдень кужосто саезь. Эряви виевгавтомс «Российское движение школьников» вейсэндявксонть, военно-патриотической важодеманть, спортонь военно-прикладной видтнэнь. Республикасонть ёроковсто виевгады «Юнармия» общественной движениясь. Юнармейцэнь отрядт эрявить теемс республикань эрьва районсонть.

Республикасонть ёроковсто одкстомтови профессиональной образованиянь системась. Те сферасонть виевгавтови государственно-частной партнерствась. Теезь тонавтнемань-производствань 12 комплекст, прикладной квалификациянь ламо функциянь 4 куншкакурот. Тедеде ушодсы важодеманзо «Строительные технологии» ёнкссонть коряс куншкакурось.

Ёроковсто нолдави тевс дуальной тонавтомань лувось. Зярдо теориянь пельксэсь тонавтневи техникумонь юрсо, практикансесь - важодемань таркасо. Истямо тонавтомась ветяви 14 програматнень коряс ды саи 500 ламо студентт. Минек колледжтнес ды техникумтнес тонавтницятнень саемань контролень весе цифратне кемекстазь важодема таркань максыцятнень марто соглашениятнесэ. Специалисттнэнь анокстамонтень вейсэндявсть экономикань алкуксонь секторонь 460 ламо представительть. Сынст ютксо покш предприятият, невтемга, «Станкостроитель», «Мордовагромаш», МАПО «Восток», истя жо средней ды вишка бизнесэнь представительть.

«Тедеде варчамонь лувсо колледжтнес ды техникумтнес эряви анокстамс саема 15-50 перспективной профессиятнень коряс, конат тешкстазь «Рабочие кадры для передовых технологий» федеральной проектэнть лувсо. Теде башка, иенть прядовомс 30% ламолгавтомс суденттнэнь, конат получить образования целевой тонавтоманть лувсо. Техникумтнестэ ды колледжтнестэ лисест алкуксонь мастерт, конат эрявить обществантень. Сынст дипломост - вадря важодема таркань получамонь гарантия», - мерсь Владимир Волков.

Прявт тевесь - высшей школань виевгавтомась. Вете иень перть Университетэнь виевгавтомань программанть лувсо панжозь мировой уровнянь 80 ламо од лабораторият, строязь од корпуст ды общежитият. Путови тев ладямс инновациянь теемань ды тевс нолдамонь система, конась лезды университетэнтень саемс ярмакт эсензэ интеллектуальной продуктонть вельде. Университетэнь зярыя проекттнэнь, конат топавтовить прявт предприятиятнень ды «Мордовиянь Технопарконть» марто вейсэ, кандыть покш смусть отечественной промышленностенть туртов. Васняяк, кортамось моли оптической волокнань нолдамонь коряс заводонть ды энергоэффективной светотехникань кластерэнь предприятиятнень марто вейсэнь важодемадонть.

«Тедеде университетэнтень «Электровыпрямителенть» марто вейсэ эряви ушодомс кремниень карбидэнть монокристаллтнэнь кастомаст коряс проектэнь од этапонтень. Сонзэ лувсо маласо колмо иетнень прето эряви анокстамс ды нолдамс производствас полупроводникень прибортнэнь од поколениянть, - тешкстызе Мордовиянь Прявтось. - Маласо шкастонть эрявить ладямс вейсэнь важодемань сюлмот вузонть ды «Оптикэнерго» компаниятнень группанть, Саранскоень телевизионной заводонть, агропромышленной комплексэнь зярыя предпряитиятнень ютксо. Вузонть туртов прявт тевтне - НИОКР-нь покшолматнень кастомась, предприятиятнень марто вейсэнь важодеманть келейгавтомась, алкуксонь производствань ды управлениянь кевкстематнень витеманть туртов потенциалонть тевс нолдамось».

ЗДРАВООХРАНЕНИЯСЬ

Меельце 5 иетнень перть Мордовиясо топавтозь покш важодема здравоохранениянь юронть материально-технической базанть кемекстамонть, специалисттнэнь анокстамонть, медицинань неень шкань центратнень тееманть коряс. Прядозь колмо уровнянь системанть теемась. Строязь 55 ды педе-пев витнезь сядодо ламо медицинань объектт.

«Ютазь иестэнть минь ушодынек «Юбилейный» эрямонь комплекссэнть эйкакшонь ды покшонь од поликлиникатнень, Республикань онкодиспансерэнь поликлиниканть строямонть. Ушодозь Эйкакшонь республикань больницянть хирургиянь корпусонть теемась. Эряви поладомс важодеманть велетнесэ фельдшерэнь-акушерэнь пунктнэнь сетнень келейгавтоманть коряс, стявтомс эштё 54 ФАПт ды витнемс малав сядо», - толковизе МР-нь Прявтось.

Тедеде эряви прядомс Ситуациянь куншкакуронь тееманть, конась ладясы «Скорой помощень» важодеманть.

«Тедеде эряви теемс виев эскелькс здравоохранениясо информациянь технологиятнень тевс нолдамонть коряс. Отчётнэнь коряс, республикасонть медработниктнень важодемань 70% таркатнес путозь компьютерт. Ансяк лиясто тевтне аштить истя - врачось васняяк сермадсы бланконть кедьсэ, мейле весементь печатасы компьютерс, - тешкстызе В.Д.Волков. - Россиянь Президентэсь В.В.Путин Кучомасонть тешкстызе, эряви олякстомтос врачтнэнь певтеме отчётнэнь ды справкатнень сёрмадоманть эйстэ, максомс тенст седе ламо шка пациенттнэнь марто важодемантень».

Раськеютконь стандартнэнь лувсо покш технологиянь лезксэсь республикасонть явови медицинань центратнесэ - Седеень-санонь, Перинатальной, Республикань клинической больницясонть. Тосо ули неень шкань оборудования. Вете иетнень перть покш технологиянь лезксэнть мельга пшкадиця республикань эрицятне кассть кавксть. Иень перть зярыяксть аламолгадсть лия регионов лецямо ардыцятне. Теке шкастонть 30% киртявсть покш технологиянь лезксэнь покшолматне, конат явозь лия ошонь эрицятненень.

«Медицинанть качествадонзо ломантне редить аптекатнесэ улиця эрявикс лекарстватнень, сынст лангс питнетнень коряс. Правительствантень башка ванновт ало эряви кирдемс «Фармация» ГУП-нь виевгавтомань программанть.

Бути минь путынек прявт тев витемс тевтнень медицинань учреждениятнень пингстэ важодиця аптекатнесэ, сестэ сонзэ эряви топавтомс шкань апак ёмавтне. Лиясто лиси, вейке аптекась больницясто тусь, сонзэ таркас появась лия.

Питней оборудования марто медицинань центратне а кандыть лезэ бути а улить алкуксонь профессионалт, конат путыть эсь важодемантень оймест ды содамочист. Теде эряви кирдемс мельсэ медучреждениянь прявтнэнень, конатнень пациентнэ пештить минек врачтнэнь аволь профессионализмань ды берянь важодемань коряс пеняцямодо».

Здравоохранениянь отраслясонть улить редявикс изнявкст. Прявтось - республикасонть куломанть киртямось, эрямонть кувалгадомась. Ютазь иестэ Мордовиянтень максозь «Время жить!» Весероссиянь премия, минек регионось масторсонть кармась васенцекс инсультонь эйстэ куломатнень киртямонь коряс программатнень топавтомаст кувалма. Покш путовкс те изнявксонтень тейсь Седеень-санонь кушкакурось.

Редявикс тевекс кармась «500 лучших терапевтов России» федеральной васенце рейтингентень минек 15 участковой врачтень понгомась. Республикасонть ванстови масторонть келес сехте вишкине невтевксэсь ансяк чачозетнень куломанть коряс. 5 иетнень перть сон киртявсь кавксть. Здравоохранениянь Весемирэнь организациянть ванновтонзо коряс, те вейкине невтевкс, конась видесты невти регионсонть здравоохранениянь «ёжонть». Истя жо тешкстаса, ютазь иестэ чачтомтсо эзь куло вейкеяк ава.

СПОРТОСЬ

Социальной орматнень сехте вадря профилактикакс ашти физкультурась ды спортось. Ютазь иестэ Мордовиясь таго ёвтазь масторонь сехте спортивной регионокс. Спортонтень мелень явиця эрицятне свал касыть ды эйстэст 36%.

Петр Григорьевич Болотниковонь лемсэ шожда атлетикань чиемантень арсеви максомс раськеютконь статус ды теемс сонзэ Мордовиянь визитной карточкакс.

«Эряви явомс покш мель эйкакшонь пелькстамотненень, спартакиадатненень ды семиянь состязаниятненень, лездамс сетненень, кить пурныть дворовой командат, - толковизе В.Д.Волков. - Те иестэнть саезь арсеви совавтомс ГТО-нть эрицянь весе категориятнень туртов. Эряви виевгавтомс школань ды студенчествань спортонть. Эряви лезэвстэ ютавтомс физкультурань уроктнень ды урокто мейлень тевдееманть. Вадря койть республикасонок ванстовсть шахмататнень коряс. Эряви анокстамс тренерт-тонавтыцят ды виевгавтомс те мельстуиця налксеманть».

«Мордовия» футболонь клубонь прявтнэнень максозь тев сы шкань сезононтень - командань сотавсонть 50% налксест эсенек воспитанниктне.

«Прявт тевесь - спортонь резервань теемась. Спортонь весе видтнэсэ эряви анокстамс эсенек спортсмент. Путомс ярмакт эйкакштненень, сынст развитиянтень, аволь «легионертнэнь» рамамонтень. Эряви эрязасто нолдамс тевс неень шкань методикатнень ды саемс покш классонь спортсментнэнь анокстамонь коряс мирэнь опытэнть. Минспортонтень эряви топавтомс минек учреждениятнень участияст эйкакшонь спортонь школатнень одкстомтомань, оборудованиянь ды инвентарень путомань коряс федеральной од программасонть, - мерсь Владимир Волков.

ТУРИЗМАСЬ

Гостиницань инфраструктрась эрязасто виевгады. Содавикс таркатнень мартояк стакачить арасть. Минек эштё вейке виев ёнкссонок - ошонь од инфраструктурась, Саранскоень малав весе куншкакурось строязь одс, ульцятнень ванськсчинть ды мазычинть путыть примерэкс.

Региононь туризмань прявт ёнксокс ашти турпакеттнэнь теемась, конатне бу микшневельть Россиянь покш туроператортнэ. Ютазь иестэ теезь туризмань сферасо инвестициянь проекттнэнь реестрась.

«Седе тов эряви нежедемс башка результаттнэнь лангс, бюджетэнь ярмактнень лезэвстэ ютавтомга. Кадык минек кармить туристэнь 3-5 мартшрутт, ансяк педе-пев теезь-арсезь. Ансяк сестэ сынь совавтовить Россиянь турфирматнень «менюс», - тешкстызе МР-нь Прявтось.

Региононь властненень эрявить вадрялгавтомс-мазылгавтомс туристэнь весе объекттнэнь, ламолгавтомс раськень ярсамопель марто кафетнень, Саранскойсэ ды райцентратнесэ панжомс сувенирэнь ды эсенек производствань ярсамопельтнень марто лавкат, вадрялгавтомс парковкатненьтуристнэнь автобустнэнь туртов .

КУЛЬТУРАСЬ

Ламо кевкстемат сюлмавозь культурань объекттнэнь строямонть ды витнеманть марто. Аволь умок капитальной витнемадонть мейле панжозь Рузонь драмань театрась. Тедеде панжсынзе кенкшензэ од Музеень-архивень комплексэсь.

«Миненек эряви прядомс Кочкуровань Культурань кудонть строямонть, Рузаевкасо Ухтомскоень клубонть витнеманть. Тешкстаса, неть ды лия объекттнэ ёвтазельть кочкамодо икелень кармавтоматнесэ, миненек эряви теемс весементь, мезе алтынек ломантненень, - мерсь Владимир Волков. - Анокстазь 2020 иенть самс театрань тевень виевгавтомань Концепциясь. Минь кемекстынек, те иестэнть саезь явомс 5 млн целковоень покшолмасо грантт  театрань шкинемань проекттнэнь кирдемга, од постановкатнень теемга, гастрольтнень анокстамга.Теде башка, башка мель эряви явомс эйкакшонь ды самодеятельной театрань студиятнень теемантень ды виевгавтомантень, неень шкань отечественной литературань произведениятнень икелев молемантень, конат истя жо алтавить эйкакштнень ды од ломантненень».

***

Мордовиянь Прявтось Владимир Волков тешкстызе, Кучомасонть путозь тевтне ламо планонь ды пек стакат. Сынст топавтомась пек эрявикс республикань виевгавтоманть туртов.

«Тедеде миненек эряви важодемс ды роботамс ярмакт эрямонть лангс, сонзэ вадрялгавтомантень истя, кода минь икеле эзинек важодекшнэ. Тень эряви чарькодемс весенень. Ансяк истя минь топавтсынек путозь тевтнень. Ансяк истя топавтсынек ломантнень кемемаст, - тешкстызе республикань Прявтось. - Содавикс путешественникенть ды гуманистэнть Нансенэнь, минек масторонть историясо пек стака шкастонть Россиянь покш ялганть, ульнесь девизэзэ: «Стакась - те се, мезенть эряви теемс сеске. А топавтовицясь веши аламодо седе ламо шка». Неть валтнэ невтить лувонть, конань марто Мордовиясь сырги 2017 иестэ од изнявкстнэнь саемантень.

Кода икелеяк, минь нежедтяно покш технологиянь промышленностенть, велень хозяйствань виевгавтомантень, строямонь покшолматнень кастомантень. Минь карматано нежедеме гражданской обществань весе институтнэнь, общественной вейсэндявкстнэнь, массовой информациянь средстватнень активной участиянть лангс, минек эрицятнень покш гражданской позициянть лангс, кить мелявтыть масторонть ды республиканть вандынь чинть, эсест уцяскаст кисэ».