Мордовиянь Прявтось Владимир Волков пшкадсь Кучома марто Государственной Собраниянтень

Мордовиянь Прявтось Владимир Волков пшкадсь Кучома марто Государственной Собраниянтень

Мордовиянь Прявтось Владимир Волков апрелень 13-це чистэ пшкадсь Государственной Собраниянтень Кучома марто. Аравтлувонь программась пачтязель Республикань культурань дворецсэнть Мордовия Республикань Государственной Сорбраниянь комсь васенце сессиянть лувсо.

Региононь руководителесь ёвтынзе 2017 иестэ республикань социально-экономической виевгавтомань итогтнень ды сы шкантень прявт тевтнень.

Экономикась

Ютазь иесь, кода тешкстызе Владимир Волков, Мордовиянть туртов прядовсь вадрясто. Региононь внутренней продуктось кассь 4,6%, инвестициянь путовкстнэ – 9% ламос. Промышленной производствань индексэсь кармась 110%, те иень васенце кварталстонть учови 115% – масторонь келес сехте вадря невтевкстнэнь ютксто вейкесь. Пурназь сюронь рекордонь урожай. Ламолгадсть эрямо таркань строямонь покшолматне, эрязасто теевсть од кить. Поладовсь социальной инфраструктурань виевгавтомась.

Ютазь иень невтевкстнэнь коряс Мордовиясь топавтсь кеменде ламо проектт од ды улиця производстватнень одкстомтомга. Истя жо анокстазь оптической волокнань промышленной производства «Оптиволоконной систематнень» юрсо. Заводось лиссь операционной свалшкань невтевкстнэс. Нолдазь малав весе волокнась туи экспортов, истя жо Китаев, Австрияв, Великобританияв, Чехияв, Польшав ды лия мастортнэс.

«Биохимикень» юрсо теезь фармацевтической производствань виевгавтоманть коряс Национальной научно-производственной центра. Панжозь цех активной фармацевтической субстанциятнень нолдамга.

«Эпромет» обществасонть ладязь алюминиень ды медень катанкань нолдамось, «ЭМ-Кабельсэ» анокстазь пек нардев силовой кабельтнень производствась, Орданьбуень светотехникань заводсонть – валомань эсест производства ды валдомтомань прибортнэнь ламо нолдамонть туртов светодиодонь плататнень ды модультнень теемась. «Рузхиммашсо» ладязь солавтозь серань ды пекань усксеманть туртов вагонтнэнь, истя жо кшнинь вертикальной резервуартнэнь нолдамось.

2018 иестэ, кода тешкстызе Мордовиянь Прявтось, улезэ топавтозь зарплатань кастомась, конась кавксть икельдясы инфляциянть, теезь социальной программатнень витемга ды минек ломантнень эрямост вадрялгавтомга эрявикс весе условиятне. Тень туртов эряви кастомс региононь валовой продуктонть ды промышленной производстванть, сынь икельдяст среднероссийской невтевкстнэнь сехте аламос кавксть.

Тень туртов, кода тешкстызе Владимир Волков, эряви поладомс оптической волокнань производстванть теемга проектэнь омбоце этапонть топавтоманть, виевстэ важодемс Россиясо кварцень пек ванькс материалтнэнь производстванть Россиянть келес сравтомга.

Истя жо эряви:

каркасонь-панелень кудотнень тееманть коряс заводонть («ЭкоЛайф») строямонь прядоманть, сонзэ виензэ 30 тёжат кавонзазь метрат эрямо таркат,

поладомс истят проекттнэнь топавтоманть, кода «Хелиос-Ресурс» обществасонть – «Чипаень электростанциянь компонентнэнь улиця производствань келейгавтомась», «Мордовцементсэ» – «Производстванть виевгавтомась ды техникань одкстомтомась», «Керамической изделиянь Рузаевкань заводсонть» – «Кирпицень нолдамонь коряс производстванть одкстомтомась», тосо нолдавиця продукциянь покшолматнень эряви ламолгатвомс 1,5-ксть.

Теде башка, 2018 иестэ эряви ушодомс инвестициянь од проекттнэнь топавтоманть, сынст ютксо:

– «Организация производства силовых кабелей с ПВХ-изоляцией и установленным напряжением» для использования в сложных условиях прокладки и эксплуатации («ЭПРОМЕТ»);

– «Развитие производства высокотехнологичных комплектующих на базе алюминия и алюминиевых сплавов» («Оптикэнерго»);

– «Модернизация и техническое перевооружение производственных мощностей («Кадошкинский электротехнический завод»);

– «Модернизация производственных мощностей и увеличение объемов производства фанеры до 140 тыс. куб. метров в год» («Плайтерра»);

– «Создание производства полного цикла по выпуску фиброцементного сайдинга на основе ПВА-технологии» («Лато»).

Весемезэ промышленной производствань виевгавтомань проекттнэнь коряс теевить 1100 ламо покш производствань ды вадря зарплата марто важодема таркат, продукциянь нолдамось касы 42 млрд целковойс, истя жо те иестэнть – 10 млрд целковойс.

Агропромышленной комплексэсь

Мордовиянь Прявтонть валонзо коряс, 2017 иесь кармась вадрякс велесэ важодицятнень туртов. Апак вано пертьпельксэнь аволь вадря условиятнень лангс, пурназь республикань историясо сюронь ды бобань сехте покш урожай – 1468 тёжат тоннат 34,6 центнерт гектарсто рекордонь урожайностенть пингстэ. 6 процентс кассь сывелень нолдамось, 3 процентс – ловсось.

2018 иестэ сюронь-тикшень кастомасо эряви пурнамс вейке ды пель миллионт тоннат сюро, те лезды топавтомс вешематнень ракшань кастомасо.

Тедеде ракшань ды саразонь сывелень нолдамонть эряви кастомс 305 тёжат тоннас, ловсонть – 425 тёжат тоннас ды пурнамс 1 млрд 425 млн алт. Вейке скалонть пельде эряви потявтомс 6200 килот ловсо, ды 2022 иенть прядовомс лисемс сисем тёжань невтевксэнтень.

2018 иестэ эрявить прядомс строямонть:

– Ицялкань ёнкссо 1200 скалс ракшань кастомань комплексэнть («Дружба»);

– Кочкуровань ёнкссо чинь-вень перть 10 тоннат ловсонь переработканть вийсэ мороженоень нолдамонь коряс ловсонь заводонть («Норовское молоко»);

– кельмевтемань ды консервань цехень нолдамонь коряс цехенть («Октябрьская» Агрофирмась);

– Кадошкинань ёнкссо 3 гектаронь покшолмасо «Мир цветов» теплицань комплексэнть, конась лезды кастомс Россиянь рынкасонть минек розатнень пельксэст 20%.

Поладови Дубёнкань ёнкссо 6450 скалс ракшань кирдемань комплексэнь строямось («Моргинское»);

– Краснослободской ёнкссо 6330 авака тувос комплексэнть («Глобал Поволжье»);

– Ковылкинань ды Инсаронь ёнкстнэсэ, эрьвасонть 4800 авака тувот, кавто комплекстнэ («Мордовский племенной центр»).

Ушодови Дубёнка ёнкссо 1200 скалс ракшань кирдемань комплексэнть строямось («Агро-Атяшево»);

– Инсаронь ёнкссо 1200 скалс ракшань кирдемань комплексэнть («Молагро»);

– Озёрный посёлкасонть («Тепличное») ды Покш Игнатовань ёнкссо («Агрисовгаз теплицы») теплицань комплекстнэнь.

2018 иень Футболонь коряс масторлангонь чемпионатось

Мордовиянь Прявтось тешкстызе: 2018 иесь Мордовиянть туртов лиятнень ёнов а молиця – футболонь коряс масторлангонь чемпионатонь ютавтома ие. Владимир Волковонь валонзо коряс, те тевентень анокстамонть шкасто республикась полавтовсь вадря ёнов. Строязь спортонь, коммунальной ды социальной объекттнэ, кинь инфраструктурась ламо иень перть кармить кандомо лезэ ломантненень чемпионатонть ютавтомадо мейле.

Региононь руководителесь тешкстызе, республикась кундась мундиалентень анокстамонь меельце этапонтень, ды башка мель явсь чемпионатонь участниктнень ды инжетнень сехте вадря обслуживаниянь топавтомантень, истя жо транспортсо ардоматненень. Владимир Волков истя жо кармавтсь вадрясто ютавтомс «Фестиваль болельщиков» ФИФА-нь официальной мероприятиянть.

Строительствась

2018 иестэ поладови строямонь отраслянь виевгавтомась, важодемань покшолматне тесэ касост 5%.

Ютазь иестэ, кода тешкстызе Владимир Волков, малав 5 млрд целковойть явозь китнень строямс, тень пингстэ велень китнес явозь кавксть седе ламо ярмакт икеле иенть коряс. Витнезь ды строязь федеральной трассань 90 вайгельбеть ды региононь ды местной кинь малав 95 вайгельбеть.

Покш важодема кинь строицятненень эряви топавтомс тедедеяк. Тень туртов явовить 5 млрд ламо целковойть. Сынь явовить велетнесэ, истя жо од микрорайонтнэсэ китнень строямс ды витнемс. Эряви строямс ды витнемс федеральной, республикань ды местной кинь 60 ламо вайгельбеть.

2018 иень программанть коряс арсеви строямс 333 тёжат кавонзазь метрат эрямо таркат. Кода тешкстызе Мордовиянь Прявтось, республикасонть эрямо таркань программатне кандыть экономикань ды социальной покш лезэ. Малав 13 тёжат семият сайсть ипотекань кредитт, 2017 иестэ истят семиятнеде кармасть нилеце пельксэс седе ламо икеле иенть коряс. Иезэнзэ 5% льготань ипотекань республикань прогаммань участникекс кармасть 3600 ламо семият, строямонь отраслянтень путозь инвестицият 8,5 млрд целковойде ламо. Владимир Волков пачтясь, кемекстазь решения поладомс 5 процентэнь льготань ипотекань программанть 2018 иентень.

Образованиясь ды здравоохранениясь

Мордовиянь Прявтось тешкстынзе республиканть изнявксонзо социальной сферасонть. Истя, меельце вете иетнень перть тонавтомань од условиятнень теемантень ды образованиянть одкстомтомантень путозь покш инвестицият. Те шканть перть строязь ды педе пев витнезь 56 эйдень кужот. Сы шкантень тевесь – теемс сатышка таркат эйкакштнень туртов, кить яксить ясляс, тень пингстэ ванстомс 3-7 иесэ эйкакштнень туртов сядо процентэнь доступностенть.

Сыця иетнестэ витневить ды одс строявить малав 30 эйдень кужот. Васняяк, кода тешкстызе республикань Прявтось, эряви прядомс Орданьбуесэ, Левженский посёлкасонть ды «Юбилейный» микрорайонсонть эйдень кужотнень строямонть. Истя жо тедеде эряви ушодомс Саранскойсэ Таня Бибинань куросонть 240 таркас эйдень кужонь строямонть.

Вете иетнень перть республикасонть строязь ды педе пев витнезь 18 школат. 30 иетнень перть васенцеде Рузаевкасо строязь од школа 800 таркас. Тедеде строяви 165 таркас школа Зубова-Поляна ёнксонь Умет посёлкасонть, 2019 иестэ – 450 таркас школа Краснослободскоень ёнксо ды 140 таркас школа Торбеева ёнксонь Дракино велесэ.

Вадря ёнов редявикс полавтомат удалась саемс здравоохранениясо. Прявт невтевксэсь – эрямонть кувалгадомась. Мордовиясо вете иетнень перть сон кувалгадсь 1,5-ксть ды кармась 72,8 иеть. Истя жо вете иетнень перть удалась 7,5 проценттс киртямс куломатнень.

Мордовиянь Прявтось ледстизе: Россиянь Президентэсь Федеральной Собраниянтень Кучомасонть кармавтсь кемекстамс фельдшерэнь-акушерэнь пунктонь сеттнень. Колмо иетнень перть ФАП-т ды амбулаторият улест теезь весе эрямонь пунктнэсэ, косо 2000 тёжадо седе аламо ломанть. Велетнесэ, косо 100 ломанде аламо, улест теезь медицинань мобильной комплекст. Маласо шкастонть республикасо эряви строямс эштё 45 ФАПт, 219 – педе пев витнемс.

Саранскойсэ моли од поликлиникатнень строямось – «Юбилейный» эрямонь комплекссэнть эйкакштнень ды покштнень туртов, Республикань онкодиспансерэнь поликлиникась. Россиянь Президентэнь резервань фондонь ярмактнень лангс педе пев витневи Республикань инфекционной больницясь ды Эйкакшонь 2№ поликлиниканть туртов зданиясь. Тень пингстэ Владимир Волков тешкстызе, онкодиспансерэнь поликлиникань строямось канды башка смусть. Республикантень эряви ёроковсто кундамс онкологиянь орматнень каршо бороцямонть коряс общенациональной программань топавтомантень, конань кемекстамодор меленть ёвтызе В.В.Путин Федеральной Собраниянтень Кучомасонзо.

Мордовиянь Прявтось тешкстызе васенце пельксэнь важодеманть, ушодовомань стадиясо стака орматнень редямонь ды лецямонь коряс профилактиканть лезэвчинзэ кастоманть. «Явовтан минек здравоохранениянь прявттнэнь мелест: сехте аламо иезэнзэ кавксть минек республикань эрьва эрицясь, сехте васоло велетнестэяк, ютаст медосмотра ды, бути редявить стакачить, улезэ седе тов важодемань виде алгоритма», – мерсь Владимир Волков.

Россиянь Правительствась кемекстась здравоохранениянь виевгавтомань од госпрограмма. Мордовиянь Прявтось кармавтсь Минздравонтень анокстамс республикань программа. Прявт тевекс ютксост улест эрямонть кувалгавтомась, куломатнень киртямось, седе пек седеень-санонь ды онкологиянь орматнеде, сехте прявтось – ломантнень улест вадря мелест медицинань лезксэнть вадрячинзэ коряс.

Эштё вейке прявт тевесь – республикань медицинань кадратнень эсенек ды омбо масторонь медицинань сехте вадря центратнесэ квалификацияст кастомась.

Мордовия Республикань Прявтонть пресс-службась