Мордовиянь Прявтось Владимир Волков: «Республикасонть тееви ловсонь од кластер»

Мордовиянь Прявтось Владимир Волков: «Республикасонть тееви ловсонь од кластер»

Мордовиянь Прявтось Владимир Волков аштемковонь 24-це чистэ Дубенкань енкссо важодемань коряс улемстэ ваннызе ловсонь комплексэнь строямонть (6450 скал). Объектэнть аравтлувонь виензэ – 52 тёжат тоннат ловсо иезэнзэ.

Од комплексэнь строямонь пошколматне дивавтыть. Те пек покш строямонь площадка, косо неень шкане моли производствань васенце корпусонть путомась (1200 скалс). Проектэнтень весемезэ путозь инвестицият 6,5 млрд. целковоень покшолмасо. Ловсонь комплексэнь панжомась лезды теемс 130 важодемань таркат.

Республикань Прявтось неизе, важодемась ве шкане моли башка ёнкстнэнь коряс, металлоконструкциятнень путоманть эйстэ саезь сенажонь анокстамонть видьс. Ракшат тесэ зярс арасть, ансяк коромось сонзэ туртов уш анокстави. Ракшатнень арсеви ветямс тей таштамковсто-ожоковсто.

«Чинь-вень перть тесэ карми потявтовомо 200 тоннат ловсо», - ёвтнесь республикань Прявтонтень комплексэнь прявтось Геннадий Лобанов.

«Мордовиясо ней чинь-вень перть нолдави 1200 тоннат ловсо, - мерсь Владимир Волков. – Ловсонь те комплексэнть юрсо тееви ловсонь од кластер: чинь-вень перть 400 тоннат ловсонь переработкань заводонь строямонть арсеви ушодомс сы иестэ».

Республикань Прявтось тешкстызе: апак вано коронавирусонь эпидемиянть лангс, велень хозяйствань производствась Мордовиясо эзь лоткавтокшно.

«Россиянь Президентэсь Владимир Путин лемдинзе велесэ важодицятнень героекс, конатне теизь весементь, масторонть улезэ норовозо, - мерсь Владимир Волков. – Аграрной отаслянтень икелев минь путтанок покш тевть. Строятанок ламо од объектт, пандемиянть шкастояк. Чарькодтянок: республикань экономикантень эряви виевгадомс. Зярыя иеде икеле Государственной Собраниянтень Кучомасонть мон кармавтынь строямс ловсонь те комплексэнть, аволь весе кемезевсть, проектэсь пек покш. Ансяк, апак вано весе стакачитнень лангс, истя жо коронавирусонь инфекциянть лангскак, те объектэнь строямось лаказь лаки. Те пек эряви экономиканть ды ломнатнень туртов – эдь те важодемань од таркат. Минь путынек икеленек тев: пурнамс 1,5 миллионт тоннат сюро иезэнзэ, ды технологиятне, конатнень течи нолдыть тевс минек аграрийтне, лездыть саемемс те изнявксонть куш кодамо пертьпельксэнть пингстэ. Минек велень хозяйствась виевгады, отраслянтень сыть превей од специалистт, ламот велявтыть Московсто, полочить минек хозяйстватнесэ паро зарплата. Те минек веленть вандынь чизэ!»

Мордовия Республикань Прявтонть пресс-службась