Мордовиянь Прявтось Владимир Волков Россиянь Чистэнть явшесь государственной казнеть

Мордовиянь Прявтось Владимир Волков Россиянь Чистэнть явшесь государственной казнеть

Июнень 12-це чистэ Республикань Кудосо ютавтовсь трудонь ды общественной тевдеемасо изнявкстнэнь кисэ каземань церемониясь, конась алтавсь Россиянь Чинтень. Мордовиянь Прявтось Владимир Волков, вастовоманть ушодомсто, ёвтась церемониянь участниктненень ды республикань весе эрицятненень поздоровт государственной кенярксчинть кувалма.

«Ёвтан седейшкавань поздоровт государствань прявт кенярксчинть - Россиянь Чинть кувалма! Те кенярксчись пештезь Тиринь масторонтень седейстэ молиця ёжомарямотнесэ. Минь а явовтано масторонь ламо пингень историядонть, койтнеде-кирдатнеде, культурадонть. Минь ютынек вейке ки, минек вейкине сы шканок. Минь аштетяно покш каштанчисэ Россиянть коряс!», – мерсь Владимир Волков.

Республикань Прявтось тешкстызе, Мордовиясь эрязасто виевгады весе масторонть марто вейсэ. Сон тешкстызе, республикась бажи одкстомтомс-вадрялгавтомс промышленностенть, велень хозяйстванть, совавтомс эрямос инновациятнень, виевгавтомс цифровой технологиятнень, ванстомс ламо раськетнень ютксо сэтьмечинть ды вейкень-вейкень чарькодеманть.

"Апак вано ве ёндонь условиятнень лангс, минь свал путтано икеленек сехте покш тевть, ламо важодтянок ды сайтянок редявикс невтевкст. Те лувось лезды тенек изнямс ламо стакачить", - мерсь Владимир Волков.

Мордовиянь Прявтось пшкадсь залонтень сазь од цёратненень ды тейтертненень, конат тердезь Россиянь Федерациянь гражданинэнь пастортонь явшемантень.

«Илядо стувто - тынь чачиде ды эрятадо масторсо, конась казсь мирэнтень ламо содавикс ломанть: ученойть, военнойть, писательть, врачт, художникть, тонавтыцят, спортсментт, государственной ды общественной деятельть. Те минек солдаттнэ велявтсть изнямо марто Берлинстэ, олякстомтызь масторонть ды весе мирэнть фашисттнэнь эйстэ! Минек масторось васенцекс ливтясь космосов! Россиясь - лиятнень ёнов а молиця мастор. Те токши географиянь улеманть, историянть, раськеютконь аренасо статусонть. Секскак, эйкакшт, каштанчисэ кандодо Россиянь гражданинэнь почетонь лементь. Тыненк, одтнэнень, эряви строямс од Россиянть, ванстомс ды паролгавтомс минек виев ды аволь зависимой государстванть», тешкстызе Владимир Волков.

Мордовиянь лидерэсь ёвтась сюкпря мероприятиянь участниктненень, конат ульнесть государственной казнень явшемань церемониясонть. «Покш мельспаро монень Россиянь Чистэнть явшемс государственной покш наградат ды казнеть. Течинь лауреаттнэ – эрьва кодамо поколениянь, важодемань эрьва кодамо ёнкссонь ломанть. Ёвтан тыненк весенень сюкпрянь валт эсь тевентень мелень явоманть, ёроков гражданской позициянть, стака, ды теке шкане пек эрявикс важодеманть кисэ», – пшкадсь Владимир Волков.

Республикань руководителесь ледстизе, Россиянь чиденть башка течи истя жо тешкстави Саранскоень чачома чись.

"Тедеде Мордовиянь прявтошось кармась спортонь покштояк покш кенярксчинь куншкакурокс - футболонь коряс масторлангонь чемпионатонь. Сюкпрянь башка валт течи ёвтан Россиянь Федерациянь Президентэнтень В.В. Путиннэнь. Саранскойсэ чемпионатонть ютавтомась, ламот объекттнэнь строямось удалась, васняяк, минек Президентэнть лезксэнзэ вельде. Ды минек туртов пек питней государствань прявтонть пельде республикантень истямо мелень явомась", - мерсь Мордовиянь Прявтось.

Владимир Волков тешкстызе, чемпионатонтень анокстамось путсь ушодкс Мордовиянь историясо од эскельксэнтень, кармась ушодксокс республикань эрямонь весе сфератнень виевгавтомаст туртов.

"Тынк марто вейсэ, Мордовиянь весе эрицятнень марто вейсэ неть иетненть перть минь топавтынек пек покш важодема. Мельспаро чарькодемс, те ине тевесь ветясь ине изнявкстнэс. Редявикстэ полавтовсь Саранскоень чачось, строязь лия ёнов а молиця объектт - стадион, аэропорт, гостиницат, транспортонь развязкат, эрямонь неень шкань кварталт. Меельце иетнестэ минек ошось кармась лиякс, весе минь карминек лият. Икеле минек учи прявт экзамен - эряви пек вадрясто ютавтомс чемпионатонь матчтнень ды теемс условият тёжат инжетнень вастомаст туртов", - мерсь Владимир Волков.

Мордовиянь Прявтось истя жо тешкстызе, эряви важодемс сы шкантень, ютамс меельце этапонтень - чемпионатонь тевкадовксонть тевс нолдамонтень.

"Саранскойсэ весе объекттнэнь панжомаст вельде инфраструктурань виевгавтоманть коряс минь икельдясынек мик седе покш оштненьгак зярыя кемень иес. Ды минь карматано нолдамо тевс те потенциалонть седе тов, республикань виев касоманть-кепетеманть туртов. Ды виев икелев молеманть туртов минек ули весе эрявиксэсь. Ули сехте прявтось: обществанть вейсэндявомась ды эрицятнень мелест улемс минек Тиринь масторонть вадрялгавтомасо, те невти, прявт тевтнень топавтомасо, конат аштить Россиянть ды Мордовиянть икеле. А зярдо минь вейсэ бороцятано тевенть кисэ, минек весемесь лиси!" - тешкстызе Владимир Волков.

Теде мейле Мордовиянь Прявтось явшесь государственной казнеть республикань ламот эрицятненень.

Мордовия Республикань Прявтонть Указонзо коряс Мордовия Республиканть икеле редявикс тевтнень кисэ «Почетный гражданин Республики Мордовия» лемесь максозь Учайкин Василий Семеновичнень.

Здравоохранениясо изнявкстнэнь ды ламо иень перть вадря важодеманть кисэ «Заслуженный врач РМ» лемесь максозь Аникина Лилия Михайловнанень – 5№ Республикань клинической больницянь врач-ревматолог, Саранск ош.

Ламо иень перть изобретателень тевдееманть ды промышленностень виевгавтомантень покш путовксонть кисэ «Заслуженный изобретатель РМ» лемесь максозь Мишин Вячеслав Михайловичнень – «РМ Рейл Инжиниринг» акционерной обществань управляющей прявтонтень, Саранск ош.

Местной самоуправлениянь виевгавтомантень покш путовксонть кисэ "Заслуженный работник органов местного самоуправления РМ" лемесь максозь Мурашова Татьяна Ивановнанень - Ромодановань муниципальной райононь администрациянь прявтонь полавтыцянтень - аппаратонь руководителентень.

Культурасо изнявкстнэнь ды ламо иень перть лезэв важодеманть кисэ «Заслуженный работник культуры Республики Мордовия» почетонь лемесь максозь Лынова Любовь Викторовнанень - 1№ Эйкакшонь музыкальной школань тонавтыцянтень,Саранск ош.

Ламо иень перть вадря важодеманть кисэ Мордовия Республикань Почётонь грамотасо казезь Лошакова Надежда Ивановна - "Резинотехника" Саранскоень заводонь безопасностень службань ведущей специалистэсь, Степанова Наталья Алексеевна – Саранскоень точной приборонь заводонь электронной техникань теевкстнэнь пурныцясь, Широков Павел Николаевич – «ЭМ-КАБЕЛЬ» ООО-нь 1№ цехень прявтось, Чудаева Нина Ивановна – Мордовия Республикань Центральной избирательной комиссиянь Председателень полавтыцясь, Сабитова Алсу Шикуровна – Мордовия Республикань 2018 иень воспитателесь, Рузаевкань муниципальной ёнксонь "Радуга" комбинированной видэнь эйдень кужонь воспитателесь, Шипелкин Александр Анатольевич – Мордовия Республикань 2018 иень тонавтыцясь, Краснослободской муниципальной райононь Гумнань средней общеобразовательной школань физикань тонавтыцясь.

Ламо иень перть вадря важодеманть кисэ «Лауреат Государственной премии Республики Мордовия» лемесь максозь Холопов Станислав Вячеславовичнень – «Столица С» эрьва недлянь газетань прявт редакторонтень.

«Лауреат премии Главы Республики Мордовия» лемсэ тешкстазь Левин Валерий Федорович – Мордовия Республикасо Ломантнень праваст коряс уполномоченноесь, Рябова Анастасия Павловна – «Мокшаваня» раськень фольклоронь ансамблянь ветицясь, Краснослободской муниципальной райононь Ташто Синдровань велень Культурань кудонь художественной руководителесь, Федоткина Людмила Константиновна – трудонь ветеранось, Саранск ош.

Мордовия Республикань Прявтонть кармавтоманзо коряс республикасо волонтёронь движениянтень покш путовксонть кисэ Мордовия Республикань Прявтонть Благодарность ёвтазь Футболонь коряс масторлангонь чемпионатонь волонтёронь группантень.

Государственной ды общественной содавикс тевтицясь, ветеранонь движениянь участникесь Василий Учайкин, конанень региононь социально-экономической виевгавтомантень покш путовксонть ды общественно-политической стабильностенть топавтоманть кисэ максозь Мордовия Республикань Почётонь гражданинэнь лемесь, ёвтась сюкпря Мордовиянь Прявтонтень.

"Ёвтан сюкпря Владимир Дмитриевичнень сень кисэ, сон макссь покш питне монь тевентень. Мон пингень нилеце пельксэнть важодинь сонзэ марто. Ёвтан тензэ покш сюкпря. Сонзэ лезксэнзэ вельде ветеранонь движениянть улить изнявксонзо", - мерсь Василий Семенович.

Теде мейле республикань Прявтось явшесь паспортт Мордовиянь од ломантненень ды арсесь тенст улемс масторонь алкуксонь гражданинэкс.

Кенярксчинь промкссонть Мордовия Республикава прявт федеральной инспекторось Михаил Сезганов явшесь Россиянь Президентэнь Благодарственной сёрмат Россиянь Федерациянь Президентэнть кочкамотнень анокстамонь ды ютавтомань коряс важодемасонть ёроков участиянть кисэ.