Мордовиянь Прявтось Владимир Волков: «Рузаевкань ёнксось эскели икелев!»

Мордовиянь Прявтось Владимир Волков: «Рузаевкань ёнксось эскели икелев!»

Мордовиянь Прявтось Владимир Волков медьковонь 7-це чистэ ульнесь Рузаевкань муниципальной ёнксонь депутатонь Советэнь сессиясонть, конасонть кочказель райононь од прявт. Те таркантень бажасть понгомс вете ломанть, депутаттнэ ве мельсэ кирдизь райононь прявтонь тевтнень нурька шкас топавтыцянть Александр Сайгачевонь.

Мордовиянь Прявтось ёвтась тензэ поздоровт, арсесь важодемасо уцяска ды кармавтсь, мезе лангсо эряви виевстэ важодемс.

Владимир Волков тешкстызе, райононть пек покш социально-экономической потенциалозо, конань эряви целанек нолдамс тевс.

«Александр Иванович Сайгачев превей управленец, сонзэ организационной важодемань покш опытэзэ, - тешкстызе Мордовиянь Прявтось. – Сон ютась муниципальной управлениянь виев школа Саранскоень Октябрьской райононь администрациясонть, малав 15 иеть важодсь республикань Прявтонь Администрациясонть, тевдеемазо сюлмавозель муниципальной районтнэнь виевгавтомань кевкстематнень марто, 6 иеть ульнесь организационной важодемань ды протоколонь управлениянь прявтокс, примась участия меельце иетнестэ республикасонть ютавтозь весероссиянь ды раськеютконь весе покш мероприятиятнень анокстамосо. Секскак, мельвановикс депутатт, тынь течи теиде виде кочкамо».

Владимир Волков тешкстызе, Александ Сайгачевонь васенце цётавксонзо уш улить. Ковдо икеле Рузаевкань ёнкссо пек стакальть тевтне коронавирусонть коряс. Эрьва чистэ республикасонть од сэредицятнень ютксо колмоце пельксэсь савсь Рузаевканть лангс. Аштемковонь 3-це чистэнть саезь виевгавтозь куротнень патрулированиясь, теезь башка нарядт, ков совасть ППС-нь, ГИБДД-нь, Росгвардиянь важодицят. Патрультне якить кода Рузаевкава, истя жо велетнева. Якить лейчиретнева, косо коень коряс пурнавить ламо ломанть. Сэтьмечинть мельга пштистэ ваннови рынкатнесэ ды ярмункатнесэ, эрьва чистэ ветяви ваннома санитарно-эпидемической вешематнень топавтомаст мельга микшнемань ды услугань сферань объекттнэсэ. МЧС-нть ды Саранскойстэ спецтехниканть вельде ветязь дезинфекция ошонь куротнесэ, общественной ды кудотнень маласо таркатнесэ, вокзалтнэсэ, лавкас совамо таркатнесэ, общественной транспортсонть. Ветязь кортамот эрицятнень марто. Цетавкстнэ редявить – меельце 2 недлятнень перть Рузаевкасо од сэредицятне аламолгадсть.

Сюкпрянь башка валт Мордовиянь Прявтось ёвтась активентень ды райононь эрицятненень Россиянь Федерациянь Конституцияс полавтоматнень коряс Весероссиянь вайгелень максомань итогтнень коряс.

«Рузаевка ёнксонь эрицятне невтсть покш ёрокчи: явкась кармась малав 76%, полавтомтанень кисэ вайгелест максызь 78,3% кочкицятне. Те результатось седе покш икелень кочкамонь кампаниятнень коряс. Ёвтан сюкпря Рузаевка ёнксонь эрьва эрицянтень ёроков гражданской позициянть кисэ, масторонь ды республикань вандынь чинть кисэ мелявтоманть кисэ!» - мерсь Владимир Волков.

Прявт тевтнень ютксо, конат путозь райононь од прявтонть икеле, Владимир Волков ёвтынзе ломнатнень доходост ды эрямонь уровняст кастомась, важодемань од таркатнень теемась, рамавиця эрямо таркань, китнень, соцкультбытэнь объекттнэнь строямось, жилищно-коммунальной хозяйстванть одкстомтомась.

Важодемасо прявт нежедьксэсь – кочкицятнень кармавтомаст топавтомась. Иенть прядовомс Рузаевкасо эряви прядомс эйдень кужонь строямонть, ванкшнови кевкстемась эйкакшонь Технопарконть панжоманть коряс. Виевгавтозь важодемась «Безопасные и качественные автомобильные дороги» нацпроектэнть коряс. Ютазь недлястонть кемекстазь кадовозь контрактне те иень объекттнэнь коряс, сынст ютксо Ключарева ды Пайгарма велетнесэ китнень коряс. Тедеде витневить кинь малав 7,5 вайгельбеть Рузаевкань куротнесэ (те Терешковань, Зоя Космодемьянскаянь, Рубцовонь, омбоце Мельничной, Беднодемьянскоень, Чапаевень ды Васенконь куротне). Сы иестэ арсеви витнемс китнень Юрасовонь, Лев Толстоень куротнева, Горшковонь бульварсо, истя жо Сузгарье велесэ Октябрьской куросонть кинть. Улить эскелькст Маяковскоень куросонть Тёжа иень площаденть вадрялгавтоманзо коряс.

«Монь тукшны мельс, Рузаевкань ёнксось эскели икелев!» - мерсь Владимир Волков.

Меельце кавто ковтнень перть икельдиця социально-экономической виевгавтомань таркась пештевсь кавто од резидентсэ. Теде башка, «Развитие» суликань компаниясь, ТОСЭР-нь прявт резидентэсь, нолдась производствань эштё вейке линия. Суликань пидемань омбоце каштомонть виевчизэ 80 тоннадо седе ламо васенценть коряс. Инвесторось бажи топавтомс лия проектткак.

Покш тевть аштить райононть икеле социальной инфраструктурань виевгавтоманть коряс. Сы иестэ ушодови эйкакшонь од поликлиниканть строямось, топавтови покш важодема здравоохранениянь васенце звенанть виевгавтомга, лецямонь учреждениятнес од оборудованиянть путомга. Невтемакс, иенть ушодовомсто Рузаевкань мнежрайонной больницянть туртов рамазь таркасто таркас шаштневиця ФАП ды маммограф, «Стоматология» мобильной комплекс, ИВЛ-нь 11 аппаратт, бронхоскоп ды КТ-нь аппарат.

Одкстомтовить тевтне Ухтомскоень лемсэ Культурань куншкакуронть витнемга, сынст эряви прядомс 2021 иестэ.

Мордовиянь Прявтось истя жо тешкстызе Рузаевкань ёнкссо велень хозяйствань производствань покш потенциалонть.

Кода лезэвстэ кармить топавтовомо сеть тевтне, конатнень ёвтынзе республикань Прявтось, - ламосо карми аштеме Рузаевкань ёнксонь од прявтонть эйстэ. Александр Сайгачев ёвтась сюкпря Мордовиянь Прявтонтень ды депутаттнэнень кемеманть кисэ.

«Икеле учи покш ды стака важодема. Карматанок кастомо райононь инвестициянь потенциалонть, топавтомо кочкицятнень кармавтомаст. Маласо шкастонть ули анокстазь райононь социально-экономической виевгавтомань коряс стратегической программа. Кеман вейсэнь ды лезэнь кандыця важодемантень. Седе аламо валт – седе ламо тевть», - мерсь од прявтось, Рузаевка ёнксонь депутаттнэнень ды активентень пшкадемстэ.

Мордовия Республикань Прявтонть пресс-службась