Мордовиянь Прявтось Владимир Волков аштемковонь 24-це чистэ Чаунзань ёнкссо важодемань коряс улемстэ якась «КомбиС» ООО-в, косо ваннызе масличной культуратнень переработкань коряс од цехенть.

Предприятиясь нолды ракшатнень туртов кором, производствань комплексэнтень совить комбикормонь завод (виензэ - 50 тоннат часос), элеваторонь комплекс, сюронь костямот, истя жо оень прессовкань цех (виензэ - 45 тоннат чинь-вень перть).
Кода ёвтнесь Владимир Волковнень предприятиянь прявтось Николай Назимкин, од цехень строямось ушодозь тедеде, од производстванть арсеви панжомс колмоце кварталстонть. Производствань линиянь од вийтне кармить нолламо переработкас 180 тоннат чиньжарамонь видьметь ды 160 тоннат рапсонь видьметь. Нолдавиця продукциянть истя жо кармить кучомо экспортов.

«Экспортонь покш потенциалозо рапсонь оенть, - тешкстызе Владимир Волков. – Меельце иетнестэ минь эрязасто виевгавтанок велень хозяйствань продукциянь экспортонть, ней республикась пачти сонзэ 24 мастортнэс».

Предприятиясонть, косо ней важодить малав 200 ломанть, производствань вийтнень келейгавтомась лезды теемс эштё важодемань таркат.

Мордовия Республикань Прявтонть пресс-службась