Середасто, июнень 13-це чистэ, Мордовиянь Прявтось Владимир Волков якась Саранскоенть Футболонь коряс масторлангонь чемпионатонть ошонть-анокстыцянть Мультимедиянь пресс-центрантень. Сон теезь Мордовиянь государственной раськень драмань театрасонть.
Республикань Прявтось ваннызе презентациянь зонанть, косо журналисттнэ теевить содавиксэкс Саранскоень ды Мордовиянь эрямонть марто, рамить сувенирт. Владимир Волковнень ёвтнесть, кода карми важодеме пресс-центрась, кодат условият тосо улить СМИ-тнень вадря важодемаст туртов.
"Минь бажинек весементь теемс пек вадрясто ды, минек ванновтонок коряс, те удалась. Меельце питнень ёвтасызь журналисттнэ. Кемтяно, СМИ-нь представительтненень вадря ули важодемс Саранск ошонь пресс-центрасонть, ды сон карми сехте вадрякс масторсонть, - тешкстызе республикань Прявтось. - Вадря кис!"
Ошонь мультимедиянь пресс-центратне футболонь коряс масторлангонь чемпионатонь оштнесэ-анокстыцятнесэ течи панжизь эсест кенкшест Россиянь ды омбо масторонь СМИ-тнень туртов, кинь ули аккредитацияст.
Россиясо FIFA 2018 Футболонь коряс масторлангонь чемпионатонть шкасто СМИ-нь представительтнень туртов ошонь мультимедиянь пресс-центратнень важодемаст аноксты "Россия сегодня" кулянь агентствась. Неть пресс-центратне лездыть невтемс тевтнень, конат молить ошсонть ды регионсонть масторлангонь первенстванть ютавтома шкасто. Истят центрат теезельть FIFA 2017 Конфедерациянь Кубоконть ды Сочисэ 2014 иень Олимпийской телень налксематнень шкасто.
Пресс-центрасонть аккредитация марто журналисттнэнь туртов эрьва чистэ кармить ютавтовомо пресс-конференцият ды брифингть ошонь ды региононь прявттнэнь, туристэнь индустриянь представительтнень, культурань ды искусствань тештетнень марто.
Тесэ теевить важодемань таркат питневтеме Wi-Fi ды экран марто, конатнесэ кармить невтевеме матчтне.
Пресс-центратнесэ мереви теемс содавиксэкс регионтнэнь презентацияст марто.
Ошонь пресс-центрас аккредитациянть туртов эряви ютамс регистрация footballcitymediacenter.ru сайтсэнть.