Мордовиянь Прявтось Владимир Волков вастовкшнось Россиянь Промышленностень ды торговлянь министранть Денис Мантуров марто

Мордовиянь Прявтось Владимир Волков вастовкшнось Россиянь Промышленностень ды торговлянь министранть Денис Мантуров марто

Октябрянь 16-це чистэ Московсо Мордовиянь Прявтось Владимир Волков ютавтсь зярыя прявт вастовомат, конатнесэ кортавсть республикань социально-экономической виевгавтомань кевкстематне, сонзэ промышленной потенциалось.

Россиянь Федерациянь Промышленностень ды торговлянь министранть Денис Мантуров марто вастовомасонть мольсь кортамо производственной ды научной зярыя покш проекттнэде, конат топавтовить республикасонть.

Кортамонть ушодовомсто Владимир Волков ёвтнесь Денис Мантуровнень те иестэнть республикань промышленной комплексэнь важодемань итогтнеде. Январьстэ-авгуссто промышленной производствань индексэсь кармась 112,1% (12-це тарка Россиясо, 1-це – ПФО-со), истя жо обработкань производстватнесэ – 113,4 процентт. Те шканть перть Минпромнаукань тевдеемань сферань предприятиятне Мордовиясо нолдасть продукция 45,7 млрд целковоень питнесэ, те 2016 иень январень-сентябрянь коряс 119,4%.

Инновациянь смустень продукциянть пельксэзэ 2017 иень январьстэ-авгуссто кармась 45%, текень пингстэ те продукциянть касомась 2016 иень теке шкантень кармась малав 137%.

2017 иень январьстэ-авгуссто отраслясонть средней зарплатань касомась ютазь иенть коряс кармась 10%, важодемань производительностень касомась кармась 119%.

Промышленной комплексэнь важодемань результаттнэнень покш питне макссь отраслянь министерствась.

Истя жо кортамонть лувсо Владимир Волков пачтясь Минпромторгонь прявтонтень сень коряс, Рузаевка ошонтень максозь икельдиця касомань-кепетемань территориянь статусось. «Рузаевкасо ТОСЭР-нь теемась карми тей од инвестортнэнь тердемань туртов конкурентной башка преимуществакс, лезды теемс важодемань од таркат – малав 1350, максы од эскелькс вишка ды средней предпринимательстванть виевгавтомантень, покшолгавтсы налогонь базанть», – кортась Мордовиянь Прявтось.

Вастовомань прявт кевкстемакс кармась научно-производственной сферасо республиканть туртов инвестициянь прявт проекттнэнь кирдемась. Истя, кортавсь масторсонть фотоникань виевгавтомань прявт проекттнэнстэ вейкенть топавтомась – «Технопарк-Мордовия» АУ-нь Волоконной оптикань инжинирингень куншкакурось (ИЦВО), конась ловови регионъютконь технологиянь юрокс технологиятнень арсемань-теемань ды волоконной башка светодиодтнэнь производствань седе тов сынст юрсо прибортнэнь ды систематнень теемаст туртов. Мордовия Республиканть туртов ИЦВО-нь теемань ды Россиянь Федерациянть туртов фотоникань виевгавтомань проектэнть покш смустензэ мельс саезь, кортавсь сонзэ финансированиясь государственной приоритетной программанть лувсо. Кемекстазь договоренностнень коряс 2019 иень омбоце кварталонтень проектэсь целанек

топавтови, ды ушодови гражданской ды военной назначениянь туртов оптической башка волокнань од типтнень нолдамось.

Истя жо кортавсть оптической волокнань нолдамонь коряс проектэнть республикасо топавтомань кевкстематне. 2015 иень июньстэ Саранскойсэ панжозь импортонь анокставкстнэстэ телекоммуникациянь оптической волокнань вытяжкань коряс ОВС заводонь пусковой васенце комплексэсь. Ней предприятиясонть топавтови оптической волокнань промышленной нолдамось, заводось лиссь свалшкань операционной невтевкстнэс. Нолдазь волокнань малав весе покшолматне пачтявить омбо масторов, истя жо Таможенной Вейсэндявксонь мастортнэс.

Владимир Волковонь ды Денис Мантуровонь вастовома шкастонть кемекстазь икелепелень договоренность господдержкань явомадо проектэнь омбоце пельксэнть топавтомантень – оптической волокнань вытяжканть туртов анокставкстнэнь нолдамост коряс пусковой комплексэсь.

Истя жо вастовоманть шкасто кортавсть «Биохимик» ПАО-нь –Мордовиянь инновациянь эштё вейке предприятиянь виевгавтоманть коряс аравтлувтнэ. Те иень кизна заводсонть нолдазь «Ванкомицин» отечественной васенце антибиотикень субстанциясь. 2017 иень прядовомс ушодови гликопептидэнь группань васенце ниле антибиотикень субстанциятнень промышленной нолдамось, седе тов ули важодезь меельце поколениянь антибиотиктнень синтезэнь технологиясь – весемезэ малав 20 антибиотикть, ламотне эйстэст а нолдавить Россиянь Федерациясо ды пачтявить омбо мастортнэстэ.

Республикань Прявтось тешкстынзе региононь экономикань виевгавтоманть ды покш производствань ды вадря зарплата марто важодемань од таркатнень теемаст туртов од проекттнэнь топавтомань эрявиксчист.

***

Теке жо чистэнть Владимир Волков вастовкшнось Промышленностень виевгавтомань фондонь прявтонть Роман Петруца марто, кортавсь промышленностень сферанть коряс Мордовия Республикань инвестициянь прявт проекттнэнь топавтомань коряс вейсэнь важодемась. Кортамось мольсь, невтемга, «Биохимик» ПАО-нть од поколениянь антибиотиктнень нолдамонь коряс ды оптической волокнань заводонь проекттнэнь кирдемадост.

Республикань руководителенть пингстэ тешкставсь Россиянь Промышленностень виевгавтоманть фондонть ды Мордовиянь Промышленностень виевгавтомань фондонть ютксо вейсэнь важодемадо соглашениясь. Прявт проектэкс ванкшнозельть «Лисма» ОАО-нь ды «Промметизделие» Краснослободской ёнксонь предприятиянть одкстомтомань проекттнэ.

Мордовия Республикань Прявтонть пресс-службась