Мордовиянть ды масторлангонь гостиницань покш опреаторонть вейсэнь важодемась кортавсь мартонь 21-це чистэ Республикань Кудосо. Региононь Прявтось Владимир Волков ваствокшнось Россиясо ды СНГ-нь мастортнэсэ Accor компаниянь генеральной директоронть Алексис Деларофф марто.
Ледстясынек, 2018 иень Футболонь коряс мирэнь чемпионатонтень Саранскойсэ строяви Mercure раськеютконь брендэнть ало 115 номер марто ниле тештень отель, сон кандови Accor компаниянтень. Гостиницась стявтови Коммунистическая ды Большевистская ульцятнень киулосонть. Мундиалень ютавтоманть шкасто тов арсеви кельгстемс вейке команданть-участникенть.
Кода тешкстазель вастовоманть шкасто, строямонь тевтне молить графикенть коряс. Неень шкантень объектэнть анокчизэ - 65 процентт, 2017 иень сёксня сонзэ эряви максомс.
Алексис Деларофф кемевтизе Владимир Волковонь, отелесь карми ладямо сехте покш вешематненень, ды Мордовиясь карми кирдеме каштанчи истямо уровнянь гостиницань объектэнть коряс.
Республикань Прявтось тешктсызе, мирэнь чемпионатонтень инфраструктурань строямось лезды кастомс республикав сыця туристтнэнь ды виевгавтомс региононь экономиканть.
Mercure отеленть строямонь кевкстематнень ванкшномасонть примасть участия Мордовия Республикань Правительствань Председателень полавтыцясь - Целевой программань министрась Алексей Меркушкин, инвесторонь - компаниянь («Петролинк» ООО) ды строямонь генеральной подрядчикень - компаниянь («Анелия» ООО) прявттнэ.
Мордовия Республикань Прявтонть пресс-службась