Мордовиянь Прявтось Владимир Волков январень 12-це чистэ вастовкшнось "Управляющая компания "Промомед" ООО-нь Прявттнэнь советэнь председателенть Петр Белый марто.
Кортавсть "Биохимик" заводонть виевгавтомань кевкстематне, истя жо мольсь кортамо ветеце поколениянь антибиотиктнень аноктсамонь ды нолдамонь проектэнть топатвомадо.
Владимир волков тешкстызе, те проектэнть покш смустезэ масторонть туртов, эдь течи антибактериальной ламот препараттнэнь нолдамост туртов субстанциятне усковить Китайстэ, Индиясто, Кореясто, Европасто. «Пешксе циклань од антибиотиктнень теемась – минек путовксонок масторонь лекарствань сэтьмечинтень. Проектэсь вити импортонь полавтомань ды лекарствань омбо масторонь нолдыцятнень эйстэ зависимостень киртямонь тевтнень», – тешкстызе Республикань Прявтось.
Ледстясынек, ютазь иень кизна «Биохимикень» лаборториятнесэ нолдазь "Ванкомицин" антибиотикень отечественной васенце субстанциясь. Октябрясто получазь антибиотикень субстанциянь опытэнь-промышленностень васенце партиясь. Теде мейле предприятиясонть ютавтозь россиянь субстанциянь невтевксэнть экспертизась, конась невтизе, вадрячинь невтевкстнэнь коряс сон а явови омбо масторонь производительтнень субстанциятнень эйстэ.
Неень шкане предприятиясь лиси уш ниле субстанциятнень промышленной производствантень. Колмо иетнень перть «Биохимиксэнть» ладяви меельце поколениянь 20 ламо антибиотиктнень нолдамось.
Важодемань вастовоманть шкасто тешкстазель предприятиянть Мордовиянь госуниверситетэнть марто вейсэнь важодемань эрявиксчись. Февралень ушодовомсто «Биохимиксэнть» панжови Н.П.Огарев лемсэ МГУ-нь студенттнэнь туртов базань кафедрась, косо ванкшновить-тонатвневить од антибиотиктнень синтезэсь. Кода тешкстызе Петр Белый, Россиясо зярс сонзэ аналогонзо арасть.
«Промомед» Прявттнэнь советэнь председателесь ёвтась покш сюкпря Мордовиянь Прявтонтень од проекттнэнь топавтомасо весемеёндонь лезксэнть кисэ.
Мордовия Республикань Прявтонть пресс-службась