Мордовиянь Прявтось Владимир Волков якась РФ-нь Конституцияс полавтоматнень совавтомаст коряс кочкамонтень

Мордовиянь Прявтось Владимир Волков якась РФ-нь Конституцияс полавтоматнень совавтомаст коряс кочкамонтень

Аштемковонь 27-це чистэ Мордовиянь Прявтось Владимир Волков якась Россиянь Федерациянь Конституцияс полавтоматнень совавтомань коряс Весероссиянь кочкамонтень.

557№ кочкамонь участкантень, конась панжозь Рузонь драмань государственной театрасонть, региононь прявтось сась нинзэ марто, сынст онкстызь температураст, ванськавтызь кедест дезинфекциянь средствасо, истя жо макссть тенст ванстомань средства марто наборт.

– Ней минь кочкатанок ки эсенек ды масторонк туртов ламо иес икелев, – мерсь журналисттнэнень Владимир Волков. – Ванновтон коряс, прявтось, мезе ули од Конституциясонть, - те ломантнень социальной гарантият. Эрицятнень праваст, целанек, кемекстазельть икелеяк, ней сынь панжозь седе домкасто. Кортамось моли пенсиятнень индексациядонть, зарплатась илязо уле эрямонь минимумдонть седе вишкине. Те канды покш смусть, ломаненть эрьва чинь эрямозо тешкстави Конституциясонть.

Истя жо покш смусть кандыть национальной безопасностень коряс полавтоматне.

– Кемекстави минек масторонь виевчись, тешкставить сонзэ границянзо. Ёвтазь, эрицятнеде башка кияк а полавтсы границятнень, – тешкстызе Владимир Волков. – Эштё вейке пек эрявикс полавтомась: одкстомтови валстень балансось. Президентэнь тевтнень башка пельксэсь путови законодательной органтнэнь лангс – Государственной Думанть, Федерациянь Советэнть. Те корты вейкеде, минек масторось лиссь касомань-кепетемань од пельксэнтень. Федерациянь Советэсь – те регионтнэнь палатась, те невти, регионтнэ, ды тосо эриця ломантне, теевить седе малавиксэкс государствань политикань тешкстамонтень. Конституицясонть виевгавтови регионтнэнь таликаст.

Коронавирусонь од инфекциянть а нолдамонь лувсо кочкамонь участкасонть ладязь тевдеемадонть кортамсто, Владимир Волков тешкстызе, пштистэ топавтозь сэтьмечинь весе вешематне, кодаткак коламот арасть.

Мордовия Республикань Прявтонть пресс-службась