Мордовиянь Прявтось Владимир Волков якась "Сырнень сёксь - 2018" агропромышленной выставкантень

Мордовиянь Прявтось Владимир Волков якась "Сырнень сёксь - 2018" агропромышленной выставкантень

Октябрянь 10-це чистэ Московсо ВДНХ-со ушодызе важодеманзо "Сырнень сёксь - 2018" агропромышленной выставкась. Мордовиянь делегациянть, ков совасть АПК-нь, пищевой ды перерабатывающей отраслянь предприятиятнень прявттнэ, фермерэнь хозяйствань представительтне, ветицякс кармась республикань Прявтось Владимир Волков.

Выставкасонть республикань производительтнень продукциянть невтизь 23 предприятият: "Ичалковский" сырань комбинатось, "Сармич" сырань пидемань заводось, "Октябрьская", "Новотроицкая" ды "Норов" агрофирматне, "Атемарская" птицефабрикась, "Талина", "Ламзурь", Покш Березникень кшинь панемань заводось, "Саранский" консервань заводось, "Тепличное", "Мир цветов", "Саранский Дистиллерс", "Биосфера", "Глубинка", "Аквасар", "Рузово", "Старошайговагропромснаб", "Мордовские пенькозаводы", истя жо "Караулов С.П." ды "Кулагин А.А." крестьянско-фермерской хозяйстватне.

Россиянь Правительствань Председателесь Дмитрий Медведев выставканть панжомсто тешкстызе, сон мкирди каштанчи Россиянь АПК-нть кувалма, сень коряс, велень хозяйствась тееви экономикань неень шкань покш технологиянь секторокс. Премьер-министрась тешкстызе, Правительствась бажи кастомс-кепетемс велетнень, строямс кить ды эрямо таркат, школат ды клубт, "теемс весементь, велень ломантне эряст парт, ошонтень малавикс условиятнесэ, сынст улест мельстуиця важодемань таркаст, вадря зарплатаст". Дмитрий Медведев истя жо тешкстызе велень хозяйствань производствасо экспортонть виевгавтомань эрявиксчинть. "Национальной приоритеттнэнь эйстэ вейкекс ашти велень хозяйствань продукциянь экспортонь кирдемань покшолматнень кавксть ламолгавтомась. Минь карматано топавтомо те тевенть раськеютконь кооперациянь ды экспортонь коряс национальной проектэнть лувсо", - мерсь Правительствань Председателесь.

Мордовиянь Прявтось Владимир Волков агропромышленной выставканть важодеманть лувсо ютавтсь зярыя вастовомат республикасонть отраслянь инвестициянь од проекттнэнь топавтомань кевкстематнень коряс. Республикань руководителесь кортась немецень инвестортнэнь марто Мордовиясо ловсонь покш производствань комплекстнэнь строямодост, Россиянь инвестортнэнь марто - Покш Игнатовань ёнкссо теплицань комплекстнэнь строямодост. "Минек туртов прявтокс ашти аволь ансяк кастомс велень хозяйствань продукциянь нолдамонь покшолматнень, истя жо теемс важодемань таркат тосо, косо те весемеде пек эряви", - тешкстызе Владимир Волков.

Масторонь велень хозяйствань прявт форумсонть региононть улемадонзо кортамсто, Мордовиянь Прявтось тешкстызе: "Минек аграрийтнень ды переаботчиктнент изнявкстнэ лездасть вадрясто невтемс республиканть "Сырнень сёксь - 2018" выставкасонть. Мордовиясь сови мастронь васенце вете регионтнэнь юткс вейке ломаненть лангс сывелень, ловсонь ды алонь нолдамонть коряс. Меельце вете иетнень перть велень хозяйствань производствань покшолматне кассть 30 процентс. Велень хозяйствань продукциянь нолдамонь покшолматнень кастомась путы вадря тешкс перерабатывающей промышленностень предприятиятнень тевдеемаст лангс, косо истя жо редяви касома. Минь вадрясто чарькодтяно, импортонь полавтомась ды экспортонть касомась - те минек минек велень хозяйствань производстванть седе тов виевгавтомась. Секскак минь эрязасто важодтяно омбо масторонь продовольствиянь рынкатнесэ минек улеманть келейгавтомга. Ней АПК-нь продукциянь экспортонь пошолматне республикасонть - 15 млн долларт США-нь. Минь путтано икеленек тев колмо иень перть кастомс экспортонь покшолматнень 50 млн доллартнэнь видьс".

Экспортонь кастомань кевкстемась поладозь выставканть важодеманть лувсо октябрянь 11-це чистэ. Мордовиянь Прявтось Владимир Волков теи пачтямо деловой завторксонть, конась алтави АПК-со экспортонтень, ды ёвты мельть-арсемат, конат токшить омбо масторонь рынкатнес лисеманть туртов Россиянь производительтнень кирдемань тевтнень.

Мордовия Республикань Прявтонть пресс-службась