Ноябрянь 29-це чистэ Мордовиянь Прявтось Владимир Волков примась участия кенярксчинь мероприятиясонть, конась алтазель Весероссиянь кенярксчинтень - Авнь чинтень, конась ютавтовсь Республикань Кудонь Покш Залсонть.
«Вадря коенть коряс течи минь ютавтанок пек эрявикс, текень шкане мельспаронь кандыця, лембе ды талновтыця вастовома. Ноябрянь меельце недлячистэнть Россиясо тешкстави Авань чись. Ды ней, торжественной промкссонть, мон мельспаросо вастан тынк минек республикань прявт залтнэстэ вейкесэнть, - мерсь В.Д.Волков. - Минь макстано покш питне тынк мельмарямонтень ды седеймарямонтень. Семиянь питнейчитнень ванстомантень. Весе тынь пек вадрясто чарькодьсынк семиянь юронь питнейчитнень, сехте малавикс ломантнень кисэ мелявксонть. Семиясо кемекставить эйкакшонть нравственной ванновтонзо, пачтявить тензэ обществасонть таштазь духовной питнейчитне. Тетятне-аватне тонавтыть эйкакштнень арсемс ды топавтомс вадря тевть. Тесэ путови юр ломанень вандынь чинтень, кемекставить сонзэ обуцязо, обществасо тарказо, гражданской мелензэ-арсеманзо».
Неень шкане республикасонть ламо тееви семиянь престиженть кастомга, семиянь питнейчитнень кемекстамга, явови моральной ды материальной лезкс эйкакшонь кастыця семиятненень.
Мордовиясо колмоце ды меельце эйкакшонть чачтомсто пандови республикань авань капиталось. Тедеде те капиталось индексировазь ды ней сонзэ покшолмазо 125 тёжат целковойть колмоце эйкакшонть чачтоманть ды трямо кастомо саеманть кисэ, 150 тёжат целковойть нилеце эйкакшонть ды 187 тёжат целковойде седе ламо - ветеце ды меельце эйкакшонть кисэ. Тень пингстэ авань капиталось пандови эрьва эйкакшонть кисэ. Неть ярмактнень мереви ютавтомс семиянь эрямонь условиятнень вадрялгавтомс, эйкакшонть образованияс эли аванть пенсияс. Неть сертификаттнэнь тевс нолдызь 900 семият.
Ламо эйкакшонь семиятнень туртов республикасонть кемекстазь зярыя мерат эрямонь условиятнень вадрялгавтомга: нилеце эйкакшонть чачтомсто целанек пекстави ипотекань кредитэсь, колмоценть чачтомсто - кадовозь сумманть эйстэ пандовить 30%. Эрьва ковсто пандовить ярмакт студентэнь семиятненень, косо трявить-кастовить эйкакшт. Неень шкане пандовить малав 8 тёжат целковойть.
Теде башка, минек республикасо максови эрьва ковонь ярмаконь пандовкс колмоце ды меельце эйкакшонь чачтомсто, зярс эйдентень а топодить колмо иеть. Неень шкане те пособиянть покшолмазо малав 8 тёжат целковойть. Тедеде неть ярмактне пандовить республикань 2800 ламо эйкакштненень.
Теде башка, семиятненень, косо колмо ды седе ламо эйкакшт, питневтеме максовить модань участкат кудонь строямс эли подсобной хозяйствань ветямс.
«Тешкстаса, ансяк меельце 5 иетнень перть республикась эрьва кодамо программатнень коряс явсь ярмакт ламо эйкакшонь кастыця 500 ламо семиятненень эрямотаркань условиятнень вадрялгавтомс, - тешкстызе Владимир Волков. - Эрьва иестэ нужачисэ эриця эйкакш марто семиятненень явови ярмаконь лезкс Инечинтень ды сентябрянь 1-це чинтень. Тедеде истямо лезкс явозель 3,5 ламо семиятненень, косо кастовить 8 тёжат эйкакшт. Вадря коенть коряс, кода икеле иетнестэяк, республикань 90 тёжат эйкакштненень максовить ламбамо казнеть Од Иентень».
Регионсонть башка мель явови эйкакштнень ды од ломантнень оймсемантень ды шумбрачист витемантень. Эйкакштненень, конатненень эряви государстванть пельде мелень башка явома, максовить питневтеме путёвкат шумбрачинь витемань лагерьтнес ды лия учреждениятнес. Тедеде шумбрачист витизь 40 тёжат эйкакшт.
Кенярксчинть каршо Мордовиянь ламо эйкакшонь кастыця Бутаревтнень семиясь саизе 2-це тарканть Од семиятнень Весероссиянь 1-це форумсонть «Лучший проект по раскрытию семейного потенциала у молодых семей» номинациянть коряс, сон ютавтовсь Ростов-на-Дону ошсонть. Покш семиясь арси панжомс Саранскойсэ семиянь лагерь, эйкакштнень ды сынст тетяст-аваст туртов башка клуб.
2011 иестэнть саезь ниле ды седе ламо кастыця тетятненень-аватненень максови «За заслуги в воспитании детей» Мордовия Республикань Прявтонть Почётонь дипломось ды ярмаконь премия. Те дипломось уш максозь 119 семиятненень. Те казнесь кармась семиянь виевгавтомань тешксэкс, тетянь-авань тевтнень вадрясто топавтомань редямокс.
Кемень иеде икеле кармась максовомо лиятнень ёнов а молиця казнесь - Ламо эйкакшонь авань Почётонь дипломось, конань марто максовить ярмакт ды башка льготат. Истямо диплом максозь республикань 471 аванень.
Эряви тешкстамс, Почётонь дипломонь азортнэнень максови социальной лезкс, истя жо ярмаконь пособия.
«Кенярдовты, меельце 5 иетнень перть республикасонть кавксть киртявсть семиявтомо кадовозь эйкакштне. Те шкастонть 320 эйкакштнень саизь од семияс. Малав зяро жо эйдеть учить тетяст-аваст», - тешкстызе Мордовиянь Прявтось.
Республикасонть социальной политикась аравтозь аватнень ды эйкакштнень кевкстематнень свалшкане мелень явомантень - те сы шкадонть мелявтомась, раськень шумбра генофондонть ванстомась.
«Меельце иетнестэ республикасонть касы чачомась. Ды мезесь редявикс, ламолгадыть эйкакштне, конат семиятнесэ чачить омбоцекс, колмоцекс ды меельцекс. Те вадрясто невти, ломантне кемить вандынь чинтень, минек Мордовиянть виевгавтомантень, - мерсь Владимир Волков. - Содазь, покш семиятнесэ седе ламо стакачить, ансяк уцяскасткак седе покш. Кеман, эрьва иестэ те вадря кенярксчинть - Авань чинть - кармить ловомо «профессиянь кенярксчикс» тёжат од ават. Седейшкава арсян тыненк ды семиянк туртов шумбрачи, паро эрямо ды уцяска! Кадык церанк ды тейтеренк кенярдовтыть тынк эсест вечкемасост! Кадык сы иесь канды тенк лембе ды вадря ёжо! Кадык сон карми эйкакшонк туртов уцяскавокс! Сэтьме эрямо, вадря тевть ды паро эрямо тынк семиятненень»!
Мероприятиянтень пурнавозетне ёвтасть сюкпрянь валт республикань кирдийтненень ды МР-нь Прявтонтень башка ламо эйкакшонь семиятнень кисэ мелявтоманть ды лезксэнь явоманть кисэ.
Тешкстасынек, кенярксчинть ушодовомадонзо икеле весе аватнень учось казне. Мордовия Республикань Прявтонть Администрациянть лезксэнзэ вельде ютавтовсь «Мазычинь чи» акциясь. Конанть лувсо ламо эйкакшонь кастыця 20 аватнень артызь чачост ды мазыйстэ пурнызь черест, максть тенст превспутомат, кода ванстомс мазычинть.
Ламо эйкакшонь аватненень лездасть Екатерина Никишина, Яна Чернецких, Татьяна Третьякова визажистнэ, истя жо черьтнень мазыйстэ пурнамонь коряс стилистнэ Кристина Лукьянова ды Светлана Малофейкина.
Коенть коряс Мордовиянь Прявтонть пельде весе аватненень явшесть мазый пацят, теде мейле весе тердезельть кенярксчинь обедс.