Мордовиянь Прявтось Владимир Волков ёвтась поздоровт республикань эрицятненень Россиянь чинть ды Болельщикень фестиваленть панжоманзо кувалма

Мордовиянь Прявтось Владимир Волков ёвтась поздоровт республикань эрицятненень Россиянь чинть ды Болельщикень фестиваленть панжоманзо кувалма

Июнень 12-це чистэ Саранскоень Советской площадьсэнть ютавтовсь FIFA Болельщикень фестиваленть панжомань церемониясь. Мордовиянь прявтошонь эрицятненень ды инжетненень шумбракстнемань валт ёвтасть спортонь содавикс комментаторось Дмитрий Губерниев ды Саранск ошонть-ютавтыцянть посолось олимпийской нилексть чемпионось Алексей Немов.

Совесткой площадентень састь малав 20 тёжат ломанть, ламот семиянек, тень вельде ёвтасть кемема Россиянь сборноень спортсментнэнень ды чемпионатонь лия командатненень-участниктненень. Фестивалень панжомань церемониянь почётной ваныцякс кармась Панамань сборноесь, конань базазо Саранскойсэ. Мордовиянь Прявтось Владимир Волков лембестэ кортась командань налксицятнень марто, панамань сборноень прявт тренерэсь ёвтась сюкпря республикань прявтонтень вастоманть ды Олимпийской анокстамонь центрасонть теезь вадря условиятнень кисэ. "Минь марятанок прянок теке кудосо", - мерсь сборноень ветиесь.

Советской площадьсэнть ваныцятне лембестэ вастызь Панамань инжетнень, тонат покш мельсэ явшесть автографт ды тейсть селфить фанаттнэнь марто.

Болельщикень фестиваленть панжоманть кувалма кенярксчинь программась пек сюпаволь. Васняяк ваныцятнень кенярдовтызь Мордовиянь шкинемань коллективтне, мейле эстафетанть саизь «Город 312», «October Sun» ды «Swanky Tunes» группатне.

Республикань эрицятнень ды прявтошонь инжетнень туртов эштё вейке казнекс кармась кенярксчинь салютось. Сонзэ икеле сценанть лангс кузсть Мордовиянь Прявтось Владимир Волков ды Саранск ошонь округонь прявтось Пётр Тултаев. Региононь руководителесь ёвтась поздоровт республикань эрицятненень ды инжетненень Россиянь Чинть, Саранск ошонь Чачома чинть ды Болельщикень фестиваленть панжоманзо кувалма.

"Течи башка чи - Саранскоесь кармась масторлангонь покш кенярксчинь куншкакурокс. ФИФА Болельщикень фестивалесь -чемпионатонь сехте покш ды мазый мероприятиятнестэ вейкесь", - мерсь Владимир Волков.

Мордовиянь Прявтось тешкстызе: Саранскойсэ масторлангонь чемпионатонть ютавтомадо ФИФАнь арсемась ушодсь од шка республикань историясонть. "Меельце иетнестэ минек ошось кармась лиякс, весе минь карминек лиякс. Стявтозь лия ёнов а молиця объектт - стадион, аэропорт, гостиницат, кить, эрямонь од кварталт. Ды течи ёвтан покш сюкпря Россиянь Федерациянь Президентэнтень В.В.Путиннэнь! Те кенярксчись, весе минек изнявксонок топавтовсть ансяк минек Президентэнть лезксэнзэ вельде", - тешкстызе Владимир Волков.

Региононь руководителесь ёвтась сюкпря республикань эрицятненень чемпионатонтень Саранскоенть анокстамонзо коряс топавтозь важодеманть кисэ ды тешкстызе, футболонь те кенярксчись - васняяк сынст туртов. Ды чемпионатонть вадрясто ютавтомась ламосо ашти Мордовиянь эрицятнень инжень вастомо маштомачист ды кенярксчист эйстэ. "Миненек эряви теемс весементь, Саранскоень инжетне, минек кедьстэ туемстэ, меревельть: "Те масторлангонь сехте вадря ош!" - мерсь Владимир Волков.

Республикань Прявтось ёвтась поздоровт кенярксчинть кувалма региононь весе эрицятненень ды инжетненень, арсесь кеме шумбрачи, часия, паро эрямо.

Мордовия Республикань Прявтонть пресс-службась