Вечкевикс школань прядыцят!
Ёвтан седейшкавань поздоровт школань прядоманть кувалма - эрямонь прявт пелькстнэстэ вейкенть!
Школань иетне казсть тенк ламо – содамочить ды од таркатнес понгоманть, вечкема ды ялгат, изнямот ды опыт. Тынь эрязасто ютынк те кить. Теиде васенце кеме эскелькс од эрямонтень, мельтнень-бажамотнень каршо.
Поздоровонь башка валт сеттненень, кить эсест важодемаст ды ёрокчист вельде изнизь васенце покш казненть - «За особые успехи в учении» медаленть!
Содан, тынк эйстэ эрьванть туртов те иесь ульнесь пешксе эрьва кодамо тевсэ. Тынь ламо тонавтниде, анокстыде экзаментнэс, идиде эсь проекттнэнь, невтинк содамочинк-ёрокчинк олимпиадатнесэ ды пелькстамотнесэ. Те виев важодемась макссь цётавкст. Тынь получиде аволь ансяк вадря аттестатт, сехте прявтонть – вадря содамочитнень. Сынь, нама, эрявить эрямосонть.
Ней тынк икеле ашти стака тев – кочкамс сы шкань профессиянть. Тынк икеле панжозь весе китне. Весемесь ашти эсенк эйстэ.
Нама, минек ули меленек, штобу тынь кадовольде эрямо ды тонавтнеме тиринь республикав. Минь ламо тень туртов теинек.
Ней Мордовиянь вузтнэсэ анокстыть инженерэнь ды гуманитарной вадря кадрат, ули мезе кочкамс неень шкань технологиятнень ёнксстонть. Сынст ютксо улить лия ёнов а молиця специальность, конатнень арасть аналогост масторонь высшей тонавтнемань лия заведениятнесэ. Документэнь максомсто, яводо мель сынст лангс.
Меельце иетнестэ теезь пек ламо платформат, косо мереви невтемс ёрокчинть, содамочитнень ды шкинематнень. Президентэнть ушодксонзо вельде топавтови «Россия – страна возможностей!» проектэсь.
Ды кинень, бути аволь тыненк, полавтомс масторлангонть вадря ёнов, теемс од технологият, ванстомс экологиянть, невтемс эсь прянть наукасо, шкинемасо, спортсо, волонтеронь проекттнэсэ. Мордовиясо тень туртов теезь весе условиятне.
Тедеде минек арсематнень аламодо колынзе эпидемиясь. Ансяк те а кармавты нусмакадомс. Мекевланк, эряви чарькодемс, минек выпускноесь лия енов а молиця, тынь – лия ёнов а молиця выпускникть. Варчавкстнэ, конатнень пачк тынь ютатадо, тейтядызь тынк виевекс.
Ды эштё – ней тынь содатадо, мезесь седе питней. Те шумбрачись, ёрокчись, малавикстнэнь пельде мелень явомась.
Секскак мон энялдан тынк ванстомс школань ялгатнень, покш мель явомс малавикстнэнень: тынк тетятненень-аватненень, покштятненень ды бабатненень. Ней сынь кенярдыть тынк кисэ, ды кирдить каштанчи. Кутмордынк сынст ды ёвтадо сюкпря весементь кисэ, мезе сынь тынк туртов теить.
Мон ёвтан сюкпря весе тетятнень-аватнень туртов. Сынь кассть вадря эйкакшт, конатнень эйс кеми республикась ды весе масторось.
Сюкпрянь башка валт ёвтан тонавтыцятненень ды превс путыцятненень. Сынь ламо тейсть сень туртов, тынь касовольде превей ломанекс, видекс, тиринь масторонть алкуксокс вечкицякс.
Школань вечкевикс прядыцят! Тынь – цифровой поколениянь представительть, од тёжа иетнень эйкакшт. Тынк лангс минь путтанок покш кемемат науканть, инновациятнень, IT-технологиятнень, неень шкань промышленностенть, строительстванть, велень хозяйстванть ды ламот лия отраслятнень виевгавтомасо. А кавтолдан, тынь тейтядо покш изнявкст.
Илядо стувтне – арась мезеяк а топавтовиця!
Кемеде эсь прятнес, путодо икеленк мельть-бажамот ды топавтодо сынст.
Минь кемтянок тынк эйс, ды содатанок, весемесь лиси!
Вадря ки тенк, школань прядыцят!