Мордовиянь Прявтось Владимир Волков ёвтась поздоровт СМИ-нь важодицятненень Россиянь печатень чинть кувалма.
Январень 16-це чистэ Республикань Кудонь Колонной залсонть ютавтовсь торжественной промкс, конась алтазель Россиянь печатень чинтень. Республикань журналистнэнень поздоровт ёвтась Мордовиянь Прявтось Владимир Волков. Региононь Прявтось тешкстынзе массовой информациянь средстватнень таликаст обществань эрямосонть, тешкстызе, журналисттнэнь важодемаст лезды властентень шкастонзо редямс ды витемс пшти кевкстематнень, лездыть республиканть седе тов виевгавтомантень.
Мордовиянь Прявтось ёвтынзе 2016 иень икелепелень итогтнень. Вадря невтевкст редязь экономикань весе отраслятнесэ, сынст юткссо промышленностесь, велень хозяйствань, строительствась. Покшолгадсть инвестициятне прявт капиталонтень, республикантень покш мель явить омбо масторонь инвестортнэ. Пек вадря невтевксэст Мордовиянь аграрийтнень - отраслясонть производствань касомась кармась 112 процентт. Васенцеде перерабатывающей промышленностень предприятиятнень невтевкстнэ кармасть вейкеть крупной промышленностень покшолматнень марто. Республикань строямонь отраслясонть важодемань покшолматне кассть 15 процентс ды кармасть 27 млрд. целковойде ламо. Ламосо тенень лездась Мордовиясо тевс нолдазь льготань ипотекань программась - 5 процентт иезэнзэ. Программась невтизе лезэвчинзэ, эйсэнзэ примасть участия 2 тёжадо ламо ломанть, тень вельде республикань строямонь отрасляс путозь башка инвестицият малав 4 млрд. целковоень покшолмасо. Республикань Прявтось Владимир Волков пачтясь, сон кемекстась решения поладомс те программанть эштё вейке иес - 2017 иень декабрянь 31-це чинтень.
2016 иестэнть властень прявт тевекс, кода тешкстызе Республикань Прявтось, ульнесь инфляциянь икельдямонь зарплатанть кепедемась. Ды тень удалась теемс - зарплатась кассь 7 процентс, инфляциясь кармась 5,5 процентт. 2017 иестэ, Владимир Волковонь валонзо коряс, арсеви кастомс зарплатанть 8 процентс, тень пингстэ инфляциясь учови 4,5 процентэнь покшолмасо.
Вадря невтевкст социальной сферасонтькак. Колмоце ие республикасонть редяви эрицятнень миграциянь касомась - 2016 иестэнть сон кармась республикав састь 3 тёжат ломанть. 2017 иестэнть арсеви стявтомс социальной зярыя объектт, сынст юткссо од школат, поликлиникат. Сынь стявтовить аволь ансяк Саранскойсэ, республикань районтнэсэяк.
Региононть виевгавтомантень ламосо лезды 2018 иень футболонь коряс мирэнь чемпионатонтень анкостамось. Вадря ёнов полавтовить республикань эрямонь малав весе сфератне. Невтемга, кастовить килангонь строямонь ды витнемань тевтне аволь ансяк ошсонть, истя жо велетнесэяк. Республикань Прявтось пачтясь, мундиалень ютавтоманть шкасто ошонь маршрутнэва важодеманть туртов уш рамазь 50 од автобуст. 2017 иень васенце кварталстонть Саранскоев пачтявить эштё 30 од троллейбуст.
Весе неть полавтоматнеде пачтить республикань СМИ-тне. Владимир Волков ёвтась сюкпрянь валт журналисттнэнень седейшкавань важодеманть ды тевенть педе пев топавтоманть кисэ, арсесь шкинемасо од изнявкст.
Те чистэнть ёвтызь республикань журналистэнь конкурстнэнь итогтнень. Мордовиянь Прявтось явшесь изницятненень покш казнеть.
Мордовия Республикань Прявтонть пресс-службась