Мордовиянь Прявтось Владимир Волков ютавтсь промкс «Мордовия Арена» строявиця стадионсонть

Февралень 10-це чистэ Мордовиянь Прявтось Владимир Волков ютавтсь промкс «Мордовия Арена» строявиця стадионсонть, тосо ульнесть строямонь генеральной подрядчикесь - «ПСО «Казань» ООО-нь генеральной директорось Равиль Зиганшин, сиведицятнень представительтне - "Спорт-Ин" ФГУП-сь ды «АРЕНА 2018» АНО-сь.

Кортамось мольсь пшти кевкстематнеде, конат сюлмавозь «Мордовия Арена» стадиононть, «Тавла» гостиницань-эрямонь комплексэнть стявтоманть, истя жо Инсар леенть чиренть кемекстамонть ды мазылгавтоманть марто.

Неень шкане  «Мордовия Арена» стадионсонть целанек прядозь прявт зданиянь строямось, моли ушо ёнксонь стенатнень ды пирявкстнэнь теемась, ветявить отделкань тевтне, потмосонть теевить инженерэнь систематне, истя жо прявт металлоконструкциятне. 100% ацазь футболонь паксянь плитатне, 90% прядозь ушосо водопроводонь ды канализациянь монтажонь тевтне. Ансяк улить зярыя енксст, конатнень коряс эряви виевгавтомс важодеманть. Республикань Прявтось башка тешкстызе объектэнь строямонь сроктнень топавтоманть, футболонь паксянь тикшень вельтявксонть ацамонть коряс важодеманть шкастонзо ушодомга.

Важодемань тевтнень ванкшномсто мольсь кортамо ушо ёнкссонь отделкань дизайнонть коряс, кемекстазель, теемс сонзэ ашо-валдо-тюжа тюссо. Саранскоень стадионось карми молеме чинть енов - истямо жо тюссо, конась канды лембе ды валдо мельть-арсемат.

Теде башка евтазь кармавтомат важодеманть эрязкавтомга, эрявикс материалтнэнь пачтямга ды «Тавла» гостиницань-эрямонь комплекссэнть строямосто важодицятнень ламолгавтомга.

Промкссонть мольсь кортамо «Мордовия Арена» стадиононть маласо Инсар леень чиренть кемекстамодонзо. Течинь чине кандозь кабелень линиясь, конась моли строямонь площадкаванть, ютавтовить тевть леень чиренть кемекстамга. Объектсэнть путозь шпунтонь пирямо, молить тевть упорной брусонть теемга ды сонзэ бетонсо валоманзо коряс. Ванкшнозь стадиононть маласо чудиця Инсар леень чиренть мазылгавтомань проектэсь, конась тееви 300 метрань кувалмсо оймсемань таркакс - теевить ялго якамонь, велосипедсэ ардтнемань яннэть, архитертурань вишка формат, эйкакшонь налксемань ошкеть, скейтбордистнэнь туртов площадкат, ярсамонь таркат.

Вастовомасонть ульнесть Мордовиянь Правительствань Председателесь Владимир Сушков ды сонзэ полавтыцянзо, конат ванныть 2018 иень Чемпионатонтень строямонь ды анокстамонь тевтнень.

Мордовия Республикань Прявтонть пресс-службась