Владимир Волков вастовкшнось Атюрьевань ёнксонь прявтонть Иван Гусаров марто. Кортазельть райононть социально-экономической виевгавтомань кевкстематне ды арсезельть прявт тевтне сы шкантень.
Иван Гусаров ёвтнесь региононь Прявтонтень, кода топавтови райононь эрицятнень прявт вешематнень эйстэ вейкесь – водопроводонь ветямось. Атюрьевавасо те тевесь топавтозь – ведесь ветязь весе прявт ульцятнева, тень лангс ютавтозь 23 млн. целковойть. Неень шкане ведесь ветяви Татаронь Велязьма велеванть (водопродонь ветямонь важодематне топавтозь 2 млн целковоень питнес). Тедедень аравтлувсонть эште Рузонь Велязьма велесь. Владимир Волков тешкстызе, ведень ветямонть эряви поладомс, эдь велесэ важодицятнень туртов эрямонь вадря условиятнень теемась – прявт тевтнестэ вейкесь.
Иван Гусаров истя жо пачтясь Республикань Прявтонтень, Атюрьевасо поладовить роботатне газопроводонь виевчинть покшолгавтоманть коряс. Проектэсь топавтови региононь бюджетэнть лездамонзо вельде. Райононь куншкакуросонть сон прядови тедеде, истямо жо одкстомтома ютавтови Каменка велесэнть.
«Устойчивое развитие сельских территорий» программанть вельде ламо теезь велетнесэ од кудотнень ды китнень строямонть коряс. «Программанть лувсо мелят вельтинек киланготнень Атюрьевасо Центральной ульцяванть ды Эень дворецэнть вакссо, Акиняевень ды Октябрьской ульцятнева, теезь кить кавто велень калмазыртнень енов. Неть вешематнень ёвтызь кочкицятне, секскак сынь васенце таркасот», – тешкстызе Иван Гусаров.
Вастовомасонть Владимир Волков кармавтсь седе эрязасто макснемс модань участкат кудонь строямонь туртов ламо эйкакшонь триця семиятненень ды весенень, кинь ули мелест строямс кудот ды кирдемс эсест хозяйстват Атюрьевань ёнкссонть. Иван Гусаровонь валонзо коряс, Атюрьевасо неть тевтнень туртов М.Девятаевень лемсэ од ульцясонть анокстазь 64 участкат, 56-тне уш явозь кудонь строямс. Ломантненень вечкеви се, ульцясонть уш ули газ, ветязь ведь, электричествань сеть, арсеви теемс ки.
Вастовоманть прядовомсто Иван Гусаров тешкстызе Эень дворецэнть эрявиксчинть, сон панжозель мелят Атюрьевасо. «Минек эень аренантень сакшныть семиянек Краснослободскоень, Торбеевань, Зубова-Полянань, Явасонь эрицятне. Весе евтыть сюкпря спортонь истямо объектэнь строямонть кис», – мерсь райононь прявтось.
Мордовия Республикань Прявтонть пресс-службась