Апрелень 9-це чистэ Мордовиянь Прявтось Владимир Волков вастневсь «ЕВРОЦЕМЕНТ групп» холдингень президентэнть Михаил Скороход марто. Вастовомасонть толковавсть-ванкшновсть 2017 иестэ «Мордовцемент» заводонть важодемань невтематне ды предприятиянть седе тов виевгавтомань коряс аравтлувтне.
Холдингень президентэнть валонзо коряс, 2017 иестэ «Мордовцементсэ» производствань покшолматне ды продукциянь ильтямось кассь 30 проценттс. Те топавтовсь производствань лезэвчинзэ кастомань программанть вельде. Мелят тенень явозельть 700 миллионт целковойть инвестицият. Ламо ярмакт явозельть «коське» линиянть витнемантень, конась карми топавтомо клинкерэнь производствань прявт пельксэнть. Эрямос совавтови эштё вейке инвестициянь проектэсь, конань питнезэ малав 700 миллионт целковойть, те – цементэнь яжавтомань од отделениянь строямось. Цементэнь ведькевтнень нолдамось топавтсы «пельскоське» способонь отделениянь площадкасонть цементэнь нолдамонь пешксе цикланть ды кастсы весе предприятиянь производительностенть ды лезэвчинть.
«ЕВРОЦЕМЕНТ групп» президентэсь кемевтсь, «Мордовцементсэ» производствань покшолматнень касомась поладови тедедеяк.
Мордовиянь Прявтось кармавтсь холдингень прявттнэнь покш мель явомс кадратненень ды свал мельсэ кирдемс социальной ответственностенть.
«Мордовцементэсь» – республиканть туртов пек эрявикс предприятия. Ней эряви путомс весе вийтнень производстванть кемекстамонтень, важодемань производительностенть кастомантень, продукциянть себестоимостензэ алкиньгавтомантень. Тень пингстэ кодаяк а нолдамс важодицятнень киртямонть. Неть условиятнень топавтомсто, республикась поладсы предприятиянтень лездамонть инвестициянь проекттнэнь топавтомасо», – мерсь Владимир Волков.
Важодемань вастовомасонть ульнесть республикань Правительствань Председателень полавтыцятне – профильной министерствань прявттнэ, Чаунзань райононь прявтось Вячеслав Цыбаков, истя жо «Мордовцемент» ПАО-нь генеральной директорось Йохан Нишвиц.
Мордовия Республикань Прявтонть пресс-службась