Мордовиянь Прявтось Владимир Волков июнень 20-це чистэ ютавтсь важодемань вастовома Роспотребнадзоронь руководителенть Анна Попова марто. Кортавсть республикасонть санитаронь-эпидемиологиянь вадрячинь топавтомань кевкстематне, истя жо футболонь коряс масторлангонь чемпионатонть шкасто.
Надзоронь ведомствань прявтось макссь покш питне раськеютконь первенствантень анокстамонть коряс региононь властень важодемантень: "Ошось вадря, пек мазый, весемесэ неяви мелень явомась. Ёвтаса, Саранскоесь пек парсте анок масторлангонь чемпионатонтень, весе вадря", - мерсь Анна Попова.
Потребительтнень праваст ванстомань ды ломантнень благополучияст мельга надзоронь коряс федеральной службань прявтось истя жо тешкстызе, сон а неи пирявкст сень туртов, Саранскоень аэропортсо чемпионатонть шкас теезь государствань границянть трокс нолдамонь пропускось кармазо свалшкань. "Течинь чинтень нурька шкань терминалсонть улить весе условиятне, санитаронь-карантинэнь весе мероприятиятнень топавтомга", - тешкстызе надзоронь ведомствань прявтось.
Мордовиянь Прявтось Владимир Волков тешкстызе, республикань властне важодить Роспотребнадзоронь региононь управлениянть марто ды куроксто витить весе кевкстематнень, конат токшить потребительтнень праваст.
Важодемань вастовоманть шкасто башка мель явозель чемпионатонть ютавтомсто ламо ломанень пурнавома таркатнесэ андомань ладямонь кевкстематненень.
Вастовомасонть ульнесть Мордовиянь Правительствань Председателесь Владимир Сушков, Правительствань Председателень полавтыцясь Галина Лотванова, республикань здравоохранениянь министрась Михаил Морозов, Мордовия Республикава Потребительтнень праваст ванстомань ды ломантнень благополучияст мельга надзоронь коряс федеральной службань Управлениянь руководителесь Татьяна Харитонова.
Мордовия Республикань Прявтонть пресс-службась