Мордовиянь Прявтось Владимир Волков ютавтсь важодемань вастовома Саранск ошонь округонь прявтонть Пётр Тултаев марто

Мордовиянь Прявтось Владимир Волков ютавтсь важодемань вастовома Саранск ошонь округонь прявтонть Пётр Тултаев марто

Мордовиянь Прявтось Владимир Волков апрелень 16-це чистэ ютавтсь важодемань вастовома Саранск ошонь округонь прявтонть Пётр Тултаев марто. Кортавсть кевкстематне, конат сюлмавозь ошонь инфраструктурань виевгавтоманть марто, истя жо футболонь коряс масторлангонь чемпионатонтень анокстамонть лувсо.

Вастовомань прявт кевкстемакс кармась «Ванькс ош» весе ошонь эрьва иень акциянть ютавтомась. Пётр Тултаев пачтясь республикань Прявтонтень, Мордовиянь прявтошсо субботниктне ушодовсть апрелень 14-це чистэ. Ютазь субутасто куротнень ванськавтомо лиссть муниципальной предприятиятнень, казённой учреждениятнень ды ошонь администрациянь малав тёжа важодицят. Васняяк ванськавтовить-вадрялгавтовить куротнень ды площадтнень, кварталтнэнь потсо ды ламо квартирань кудотнень маласо пиже зонатне. А кадовить ванновтомо тонавтнемань ды спортонь сооружениятнень таркатне, рынкатне, микшнемань таркатне, кеврунготне. Истя жо ванськавтовить посадкатнесэ, лейтнень, эрькетнень чиресэ ды ломантнень оймсема таркатнесэ аволь закононь коряс теезь шукшпрятнэ.

Республикань Прявтось тешкстызе, тедеде «Ванькс ош» акциянтень максови башка смусть. «Саранскоесь аноксты футболонь масторлангонь первенстванть ютавтома лувсо ламо инжетнень вастомантень. Секскак ванськавтомань кевкстематненень эряви явомс башка мель, тердемс башка вийть, вадрялгавтомс ошонь весе территоритянень», – мерсь Владимир Волков.

Кортавсть «Формирование комфортной городской среды» приоритетэнь проектэнь топавтоманть лувсо кудотнень маласо таркатнень ванськавтомань-вадрялгавтомань кевкстематне. Те проектсэнть Мордовиясь прими участия ютазь иестэнть саезь.

Истя жо Пётр Тултаев пачтясь республикань Прявтонтень «Народный сквер» ошонть пижелгавтомань акциянть ютавтомадо. Прявт таркакс, ков те иень тунда озавтыть чувтт, кармасть Старопосадская, Севастопольская, Красная куротне, «Мордовия-Арена» стадиононть маласо таркась, «Юбилейноень» ветеце микрорайонось, Тавла леенть чиресь ды Ремзавод важодемань посёлкась.

Эсест кудотнень маласо таркатнень ды сквертнэнь пижелгавтомантень мереви вейсэндямс эрицятнененьгак. Ютазь иетнень опытэсь невтизе, те акциясь мельстусь Саранскоень эрицятненень. Ледстясынек, 2017 иестэ республикань прявтошсонть озавтозь кото тёжадо ламо чувтт ды куракшт. Эзь кадовт ве ёно вейсэнь тевенть эйстэ Мордовиянь Прявтоськак Владимир Волков – ульнесь «Юбилейный» эрямонь комплекссэнть килеень аллеянть путомасо.

Мордовия Республикань Прявтонть пресс-службась