Мордовиянь Прявтось Владимир Волков апрелень 10-це чистэ ютавтсь важодемань вастовома «Т Плюс» ПАО-нь руководителенть Денис Паслер марто. Кортавсть лембень пачтямонь систематнень лезэвчист кастомань коряс республиканть ды компаниянть вейсэнь важодемань кевкстематне.
Истя, кортамось мольсь Саранскоень ламо квартирань 258 кудотнесэ пси ведень пачтямонь циркуляциянь линиятнень строямодост. Кавто ёнксстнэ састь ве мельс, неть тевтне ютавтовить маласо колмо иетнестэ, тень вельде Саранскоень Октябрьской райононь ламо квартирань 106 кудотнесэ, Ленинской райононь 74 кудотнесэ ды Пролетарской ёнксонь 74 кудотнесэ вадрялгады пси ведень пачтямось.
Кепедевсь кевкстема лембень пачтямонь сеттнесэ ёмавкстнэнь киртямонь коряс тевтнень ютавтомадо. Республикань Прявтось Владимир Волков тешкстызе эрицятнень туртов нолдавиця лембень энергиянь себестоимостенть киртямонть туртов те важодемань эрявиксчинть.
Важодемань вастовомань прявт темакс кармась «Т Плюс» ПАО-нь «Мордовский» филиалонть икеле долгонть киртямось. Ансяк ошонь управляющей компаниятнень теплоэнергетиктнень икеле долгост малав 600 млн целковойть. Кортамонть лувсо ёнксстэ састь ве мельс пельксэнь пелькс киртямс таштавозь долгонть.
Истя жо ванновсть кевкстематне, конат сюлмавозь футболонь коряс масторлангонь чемпионатонтень анокстамонть марто. Истя жо мольсь кортамо «Т Плюс» компаниянть одс строязь лембень сеттнень тевс нолдамодост, сынст ютксо «Мордовия Арена» стадиононтень ды «Юбилейный» эрямонь комплексэнь од микрорайононтень ведязь сеттне. Теде башка, Республикань Прявтось явовтсь мель компаниянь руководителень чемпионатонь ушодовомантень вадрялгавтомс ошонь лембень пачтямонь объекттнэнь.
Важодемань вастовомасонть ульнесть Мордовиянь Правительствань Председателесь Владимир Сушков, республикань Правительствань Председателень васенце полавтыцясь – экономикань, торговлянь ды предпринимательствань министрась Владимир Мазов, Правительствань Председателень полавтыцясь – жилищно-коммунальной хозяйствань, энергетикань ды эрицятнень гражданской защитань министрась Игорь Чадов, Правительствань Председателень полавтыцясь – финансонь министрась Алексей Симонов, Саранск ошонь округонь прявтось Петр Тултаев, Тарифтнень коряс республикань службань прявтось Алексей Рязанов, «Т Плюс» ПАО-нь «Мордовский» филиалонь прявтось Александр Суслов.
Мордовия Республикань Прявтонть пресс-службась