Середасто, декабрянь 21-це чистэ, Мордовиянь Прявтось Владимир Волков Московсо ютавтсь зярыя эрявикс вастовомат республикань социально-экономической виевгавтомань кевкстематнень коряс.
Правительствань Кудосонть вастневсь Россиянь Федерациянь Председателень полавтыцянть Виталий Мутко марто. Кортасть 2018 иень Футболонь коряс мирэнь чемпионатонтень анокстамонь финансированиянь кевкстематнеде. РФ-нь Спортонь министранть Павел Колобков марто Республикань Прявтось кортась 2016 иень итогтнень коряс спортонь объекттнэнь строямонь финансированиянь программанть прядомадонзо, истя жо ванкшновсть республикань спортонь сферань виевгавтомань прявт ёнксстнэ.
Россиянь Федерациянь Правительствань Председателень полавтыцянть Дмитрий Козак марто вастовомасонть кортасть Мордовиясо топавтовиця «Молодая семья» программадонть ды республиканть участиядонзо государствань строямонь лия программатнесэ.
Мордовиянь Прявтось истя жо вастневсь Россиянь Федерациянь Строительствань ды жилищно-коммунальной хозяйствань министранть Михаил Мень марто. Кортасть республикасонть «Молодая семья» программанть топавтомадонзо ды «Юбилейный» ЖК-нь омбоце микрорайононть строямодонзо, истя жо эйдень кужотнень ды поликлиникатнень стявтомадост. Неть ды лия проекттнэ кортавсть Владимир Волковонь РФ-нь Строительствань ды ЖКХ-нь министрань полавтыцятнень Елена Сиэрра ды Никита Стасишин марто вастовоматнесэ.
Теке жо чистэнть Мордовия Республикань Прявтось вастневсь Россиянь Федерациянь Образованиянь министранть Ольга Васильевань марто. Кортасть республикасонть образованиянь сферанть виевгавтомадо, федеральной программатнесэ Мордовиянть участиядо, 2018 иень Футболонь коряс мирэнь чемпионатонтень вейсэнь анокстамодо.
Ветявсь кортамо од школатнень стявтомань проекттнэде - Краснослободск ошсо 450 таркас ды Рузаевка ошсо 800 таркас, истя жо 2018 иень чемпионатонтень студентэнь общежитиятнень строямодо ды витнемадо. Ванкшновсть уроз эйкакштненень эрямо таркань максомань ды школань автобустнэнь одкстомтомас федеральной бюджетстэ ярмаконь явомань кевкстематне. Владимир Волков ёвтась сюкпрянь валт Ольга Васильеванень образованиясо прявт проекттнэнь кирдемаст кисэ, конат уш топавтозь республикасонть, ды тердизе Мордовияв важодемань содавтома марто.
Вастовоматнесэ ульнесь Мордовия Республикань Правительствань Председателесь Владимир Сушков.