Декабрянь 11-це чистэ Республикань Культурань Кудосо ютась «Шумбрат, Мордовия!» раськень творчествань 20-це фестивалень Гала-концертэсь. Мордовиянь Прявтось Владимир Волков ёвтась поздоровт фестивалень участниктненень ды явшесь казнеть.
Кода тешкстызе Мордовиянь Прявтось, вадря коенть коряс, Гала-концертэсь путы итог минек республикань культурань эрямонь редявикс тевентень – «Шумбрат, Мордовия!» раськень творчествань юбилеень 20-це фестивалень прядомантень.
«Те фестивалентень минек республикань эрицятне явить покш мель, – мерсь Владимир Дмитриевич. – Сонзэ ютавтомантень иень перть анокстыть вишка велетнень эрицятнеяк. Юбилеень фестивалесь алтазель Россиянь Кинонь иентень, ды кода свал, ютась пек вадрясто. «Шумбрат, Мордовия!» фестивальсэнть велень, райононь ды республикань этаптнэсэ примасть участия 100 тёжадо ламо ломанть. Те Мордовиянь эрьва кавксоце эрицясь!Малав кавто ковонь перть Мордовиянь весе районтнэнь концертнэсэ те залсонть ульнесь алкуксонь аншлаг. Те шканть перть РДК-нь сценанть лангс лиснесть 6,5 тёжадо ламо ломанть. 40% эйстэст эйкакшт. Республикасонть улить истят коллективть, конат 20 иень перть невтсть ёрокчисть Гала-концертнэсэ. Те Ташто Теризморгань хорось, «Поляне» ансамблясь, Лямбирень «Умырзая» морамонь ды киштемань раськень ансамблясь, «Конак» семиянь ансамблясь, Чаунзань «Русская песня» ды «Дигаля» ансамблятне ды ламот лият».
Покштятнэнь ды бабатнэнь, тетятнень ды аватнень таркас сыть одтнэ. Эрьва ие фестивалень сценанть лангсо кирвазить од тештинеть. Тедеде ваныцятненень пек вечкевсть Ульяна Куликова Покш Игнатовасто, Кристина Ушакова Ковылкинасто, «Пайгонят» эйкакшонь ансамблясь ды Ромодановань «Аленушка» эйдень кужос якицятне.
«Течинь концертэнтень весе билеттнэ микшнезь уш умок ды пек куроксто: очредть сайсть рана валске. Сюкпря, монень кадсть вейке билет. Содан, пек стака саемс билетт райононь концертнэскак. Арсян, те фестивалентень вечкемань сехте вадря невтевкс. Минек эстрадань башка «тештетнень» эряви тонавтнемс тынк пельде, кода изнямс ваныцятнень вечкемаст. Морамонь-киштемань коряс фестивалень ламот участниктне а явовить профессионалтнэнь эйстэ. Тень пингстэ сценанть лангс лиснить важодиця ломанть: скалонь потявтыцят, ракшань андыцят, строицят, тонавтыцят, медикть ды лия ёнкссо важодицятне. Секскак минь видьстэ мертяно тынь – алкуксонь народной артистт!», – тешкстызе Мордовиянь Прявтось.
Республикань эрьва районось, эрьва велесь явови эсензэ культурань койтнесэ-кирдатнесэ. «Шумбрат, Мордовия!» фестивалесь эштё вестьневтизе тень. Мордовиянть туртов раськень шкинемась, койтне-кирдатне, обрядтнэ, ремеслатне – те аволь ансяк питневтеме сюпавчи, те минек башка ёнксонок. Раськетнень культурась налкси обществасонть вейсэндявомань роль, лезды ломантненень малавгадомс ды седе вадрясто чарькодемс веёкень-вейкень. Россиянь Президентэсь В.В.Путин эсь Кучомасонзо тешкстызе, весе минь – Россиянь эрицят – вейкине раське, ламо раськень вейкине семия.
«Течи те залсонть минь редятано раськень шкинемань сюпавчинть, – мерсь Мордовиянь Прявтось. – Неть ломантнень эйстэ эрьвась ашти тиринь раськень культуранть кандыцякс ды ванстыцякс. Ды те питнейчисэнть сюпавсто кази одтнэньгак. Давайте минь седе товгак карматано виевгавтомо раськень шкинеманть, састо ванстомо раськень койтнень-кирдатнень. Давайте весе вейсэ гайтевстэ ёвтатано «Шумбрат, Мордовия»! Шумбрат, сыця 21-це фестивалесь!».
Россиянь Федерациянь Президентэнть Указонзо коряс отечественной культуранть ды искусстванть виевгавтмоанть кисэ ды ламо иень перть лезэв важодмеанть кисэ «РФ-нь Культурань Заслуженной роботник» почетонь лемесь максозь Ташто Шайгова ёнкссонь Раськень культурань куншкакуронь прявтонтень Н.М.Кадерованень.
Мордовия Республикань Прявтонть Указонзо коряс культурантень покш путовксонть кисэ ды «Шумбрат, Мордовия!» раськень творчествань фестивальсэнть участиянть кисэ «МР-нь культурань заслуженной роботник» лемсэ казевсть фестивалень зярыя участниктне. Истя жо максовсть Мордовия Республикань Почётной Грамотатне ды «МР-нь Прявтонь премиянь Лауреат» лемте. Теде башка, казнеть явшевсть шкинемань ламот коллективтненень.