Уш кеменцеде мартонь 25-це чистэ вейсэнь кенярксчист тешкстыть Россиянь творческой профессиянь важодицятне. Течи Мордовиянь Прявтось Владимир Волков ёвтась поздоровт республикань музеень ды библиотекань, театрань ды концертнэнь организациятнень, велень клубонь ды культурань кудонь важодицятненень - весенень, кить теить покш путокс обществань духовной виевгавтомантень.
Владимир Волков тешкстызе культурань важодицятнень путовксост раськетнень ютксо сюлмотнень кемекстамосо, Отчизнантень эрицятнень вечкеманть виензамосо ды иневанькс таркатнес мелень явомань кастомасо, кемевтизе, республикань руководствась седе товгак карми явомо тенст весемеёнксонь лезкс.
«Течи те залонтень пурнавсть сеть, кить лиякс марить ды чаркодить те мирэнть. Сеть, кить эрьва чистэ алтыть эсь пряст музыкантень, артомантень, театрантень, литературантень, теить перьканок эрямонть седеяк мазыекс.
Минь содатано, искусствасонть, минек библиотекатнесэ ды музейтнесэ, культурань дворецтнэсэ ды велень клубтнесэ важодить ёроковт ды тевест вечкиця ломанть, конат покш честь марто топавтыть эсь тевест.
Ёвтан поздоровт тыненк ды отраслянь ламо тёжань коллективентень Культурань важодицянь чинть кувалма!
Тынь топавтадо пек эрявикс тев. Культурась кемексты башка поколениятнень ды раськетнень ютксо сюлмонть, ашти ломанень духовной кемекстамонь юрокс, виевгавты сонзэ нравственной ванновтонзо, тонавты од ломнатнень вечкемс тиринь масторонть, покш мель явомс сонзэ историянтень, койтненень, иневанькс таркатненень.
Течи Мордовиясь ловови Россиянь культурань куншкакурокс. Меельце шкастонть седе ламо ломанть явить мель лезэвстэ ютко шканть ютавтомантень. Теде корты музейтнес, театратнес ды целанек культурань мероприятиятнес якицятнень ламолгадомась. Секскак эряви теемс истя, штобу минек культурань учреждениятне кармавольть образовательной площадкакс эрьва кодамо иесэ ломантнень туртов. Прявт девизэкс карми формулась - оймсемстэ, тонавтнек.
Республикасонть теевить ды витневить-одкстомтовить культурань пек ламо объектт. Истя, ютазь иестэ эсест зданияст появась сехте умонь коллективенть - «Умарина» государственной ансамблянть. Нама, ней минь учотано артисттнэнь пельде концертэнь од программа ды репертуаронь одкстомтома. Теде башка, Культурань од Куншкакуро стявтозь Орданьбуесэ, Культурань кудо Краснослободской райононь Куликово велесэ. Россиянь кинонь чинтень покш казнекс кармась Саранскойсэ Жерар Депардьень Культурань куншкакуронть панжомась.
Те иень февральстэ покш витнемадо мейле одс панжинзе кенкшензэ Рузонь драмань театрась. Те покш ды кувать учовиця тев. Од кудодонть, од условиятнеде арсесть весе: театрань группась, ванныцятне. Эряви ёвтамс, тедеде Рузонь драмань театрантень - республикнаь культурань сехте сыре учреждениянтень - топодить 85 иеть!
Башка тешкстаса, минь аволь ансяк витнинек - минь теинек од театра. Ламо ярмакт ютавтозь оборудованиянь рамамс, сценань технической пештемантень. Аволь умок одкстомтозь сценанть лангсо невтезель «Ревизор» спектаклянь премьерась. Кеман, театрань прявттнэ ды коллективесь лезэвстэ топавтсызь прявт тевест мельстуиця од постановкасо театрань афишанть пештемга.
Эсень пельде кемевтян, республикань правительствась седе товгак карми явомо покш мель театрань искусствань виевгавтомантень. Минь кемекстынек, те иестэнть саезь явомс башка грантт 5 миллионт целковоень покшолмасо театратнень творческой проекттнэнь топавтомантень, од постановкатнень теемантень ды гастрольтнень ютавтомантень.
Тедеде республикань культурань эрямосонть учови эштё вейке покш тев - Музеень-архивень комплексэнть панжомась. Тов ютавтови республикань краеведениянь музеесь. А вана Трёхсвятской храмонть арсеви максомс пазнэнь кемицятненень. Теде башка тедеде арсеви прядомс Кочкуровань Культурань кудонь тееманть, Рузаевкасо Ухтомскоень клубонть витнеманть. Поладовить райононь ды велень культурань кудотнень, искусствань эйкакшонь школатнень витнемась. Тешкстаса, неть ды лия объекттнэ объекттнэ ёвтазь кочкамонь крамавтоматнесэ, ды минь тейсынек весементь, мезе алтынек ломантненень.
Республикасонть, коень коряс, ютавтовить культурань раськеютконь покш мероприятият. Сынст ютксо башка тарка саи «Соотечественники» Раськеютконь театрань фестивалесь. Сон ушодови колмо чинь ютазь, тедеде карми кемгавтовоце фестивалесь.
Эйсэнзэ примить участия Израилень, Даниянь, Белоруссиянь, Казахстанонь ды Россиянь театрань коллективтне. Кеман, минек инжетне максыть покш питне рузонь драмтеатрань од сценантень, ды казить республикнаь эрицятненень театрань а стувтовикс кенярксчи.
Ваныцятненень пек вечкевить «Вейсэ-джаз» джазонь музыкань, «Декабрьские дивертисменты» классикань музыкань раськеютконь фестивальтне, «Од вий» финнэнь-угрань эстрадань моронь регионъютконь фестивалесь.
Ютазь иень прявт тевекс кармасть кенярксчитне, конат алтазь Степан Дмитриевич Эрьзя ине скульпторонть чачома чистэнзэ 140 иетнень топодемантень. Редявикс тевекс кармась Рузонь музейсэ Эрьзянь важодематнень выставкась. Те пелевеёнкоснь прявт ошсонть скульпторонть васенце экспозициязо. Юбилеень тешкстамонтень Баеньбуе велесэнть Эрьзянь Кудосонть-музейсэнть ютавтозь витнемань тевть, одкстомтозь сонзэ экспозициясь.
«Эрьзянь ловноматнесэ» примасть участия омбо масторонь ламот искусствоведтнэ. Невтезель Андрей Новоселовонь «Возвращение гения» документальной фильмась.
Ковдо икеле ютатвозель Мордовиясо Федор Ушаковонь Иенть панжомань церемониясь. Республикань правительствась арсесь мероприятиянь план, конась алтазь адмиралонь ледстнемань 200 иетненень. Тедеде минь арсетяно Темниковасо стявтомс памятник Федор Ушаковнень, ушодомс Ушаковка велесэнть флотоводецэнь кудоюртонть вельмевтемань коряс тевтнень, панжомс сонзэ лемсэ музейсэнть од залт ды экспозицият.
Теде башка, тедеде миненек эряви ютатвомс торжественной мероприятият, конат алтавить Советской Союзонь Героенть Михаил Петрович Девятаевень чачома чистэнзэ 100 иетнень топодемантень.
Коенть коряс минь лездатано самодеятельной артистнэнень ды коллективтненень, од талантнэнень, конат примить участия эрьва кодат фестивальтнесэ ды пелькстамотнесэ. Культурань учреждениятнесэ свал одкстомтови материальной базась. Велень культурань кудотнене ды клубтнэне явови лезкс костюмонь, музыкань инструментэнь, аппаратурань рамамс.
Покш важодема ветяви од талантнэнь редямга, сынь маштомачист виевгавтомга. Тесэ эряви тешкстамс «Рождественская звезда» фестиваленть, «Юный виртуоз» конкурсонть, «Пластилиновая ворона» Эйкакшонь творчествань весероссиянь фестиваленть.
Пек вадрясто ютасть «Шумбрат, Мордовия!» раськень творчествань Республикань 20-це фестивалесь. Те фестивалентень республикасонок явови пек покш мель. Сонензэ анокстыть сехте вишка велетнеяк, ютавтыть репетицият кавто иень перть.
Масторосонк те сехте покш фестивальтнестэ вейкесь - эйсэнзэ примасть участия 100 тёжадо ламо ломанть. Те Мордовиянь эрьва кавксоце эрицясь!
«Шумбрат, Мордовия!» фествиалесь эштё весть невтизе, республикань эрьва районось, эрьва велесь явови эсензэ культурань койтнесэ. Минек республиканть туртов оршамопельтнень, койтнень-кирдатнень, ремеслатнень ламочись - те аволь ансяк питневтеме сюпавчи. Те минек башка ёнксонок. Раськетнень культурась канды вейсэндямонь смусть, лезды ломантнень малавгадомс ды седе вадрясто чарькодемс вейкень-вейкень.
Давайте седе товгак карматано вейсэ виевгавтомо профессиянь искусстванть ды раськень шкинеманть, покш мель марто ванстомо минек койтнень, кастомо Россиянь ды Мордовиянь патриотт!
Вечкевикч ялгат! Весе тынь педе пев макстадо эсь прянк кочказь тевентень, явшетядо эсенк содамочинк ды шкинеманк, путтадо важодемантень седеенк ды ойменк. Ламотнень туртов те аволь ансяк профессия, те седеень вешема, весе эрямонь смусть.
Течи ёвтанк тенк покш сюкпря тевенк вадрясто топавтоманть, кенярксчинь весе мероприятиятнесэ участиянть, культуранть виегавтоманть кисэ.
Седейшкава арсян тенк шкинемасо од саевкст, од мельть-арсемат, эсь таркань муеманть. Шумбрачи ды весе паронть! Кенярксчи марто тынк, вечкевикс ялгат!»
Кенярксчинь сехте талновтыця пельксэкс кармась, нама, покш казнетнень явшемась.
Истя, «Заслуженный художник Мордовии» почётонь лемесь максовсь артыцятненень Юрий Дыриннэнь ды Никита Пичугиннэнь, «Заслуженный работник культуры РМ» лемсэнть тешкставсть Республикань эйкакшонь музыкальной школань-интернатонь тонавтыцясь Марина Гурьянова ды Республикань эйкакшонь хореографиянь школань тонавтыцясь Людмила Канцарина, Зубова-Полянань РДК-нь музыкань руководителесь Владимир Княжев, Саранскоень Культурань управлениянь прявтось Татьяна Салищева ды Саранскоень 4№ ДМШ-нь тонавтыцясь Лариса Листратова, сон 40 иеде ламо алтась од музыкантнэнь кастомантень.
МР-нь Почетонь Грамота максозь Республикань краеведениянь музеень историянь отделэнь прявтонтень Светлана Телинанень ды Ельникень ДМШ-нь тонавтыцянтень Надежда Гречишникованень.
Важодемасо покш саевкстнэнь ды культурань виевгавтомантень покш путовксонть кисэ МР-нь Прявтонть Благодарность ёвтазь: П.С.Кирилловонь лемсэ 8№ библиотекань-филиалонь прявтонтень Нина Бояркинанень, Лямбирь ёнксонь «Алмаз» культурань-спортонь центрань методистэнтень Ольга Кочеткованень, Покш Березникень ДШИ-нь тонавтыцянтень Лариса Чегодаеванень, Ташто Теризморгань раськень хоронь прявтонтень Валентина Ямашкинанень.
МР-нь Прявтонть премият максозь: «Разгуляй» казаконь моронь ды киштемань ансамблянтень, И.М.Яушев лемсэ Музыкань театрань концертмейстерэнтень Лариса Кильдюшованень ды «Морденс» арт-фолк оркестрань прявтонтень Юрий Буянкинэнь.
МР-нь Культурань ды национальной политикань министрась Анатолий Чушкин, кенярксчинть коряс поздоровонь ёвтамсто пачтясь паро куля. Россиянь Федерациянь Культурань министранть приказонзо коряс народной художественной творчестванть ды Россиянь раськетнень культураст ванстоманть кисэ «Заслуженный коллектив народного творчества» лемесь максозь Чаунзань «Дигаля» фольклорной ансамблянтень.
Александр Пигаревнень, конась 10 иеде ламо важоди Чаунза ёнксонь культурань отделэнь прявтокс, ды сови «Дигаля» ансамблянтень, лезэв важодеманть кисэ максозь Россиянь Министрань Благодарность.
Весе пурнавозтнень туртов музыкань казнест невтизь «Карусельки» вокалонь студиянь морыцятне ды Хореографиянь школас якицятне, Яушевань театрань ды Республикань госфилармониянь морыцятне, «Росичи» моронь театрась, «Умарина», «Разгуляй», «Девчата», «Келу», «Умырзая», «Торама» ансамблятне, «Земляки» группась, «Багира» неень шкань киштемань студиясь ды «Арт-вижн» киштемань театрась.