Ледстясынек, Мордовиясо экономикань башка зонань теемась ветяви 2022-2026 иетнес Мордовия Республикань социально-экономической виевгавтомань программанть лувсо, конань Россиянь Президентэнть кармавтоманзо коряс кемекстызе РФ-нь Правительствась. Мордовиянь Прявтонь эрьва иень кучомасонть ОЭЗ-нь территориясонть анокстамонь весе тевтнень ютавтомань ды инвестортнэнь тердемань коряс тевесь путозь региононь министратнень кабинетэнть икелев. Минек регионсо экономикань башка зонань улемась вадрялгавтсы Мордовиянь таркатнень масторонь инвестициянь паксясонть.
ОЭЗ-сь карми аволь ансяк Саранскойсэ, истя жо токшесы Лямбирень енксонть. Нолдавить тевс налогонь преференцият бизнесэнть туртов. «Система» промышленно-производственной лувонь экономикань башка зонань теемань ды «Светотехника» индустриальной парконь строямонь коряс важодематне уш ветявить, весе сынь аштить «Лисма» заводсонть.
Кода евтнесь Мордовиянь Прявтонтень «УК ОЭЗ «Мордовия» ды «УК Индустриальными парками Республики Мордовия» генеральной прявтось Павел Рыков, Мордовиянь экономикань башка зонань тееманть лангс яволявтомась ютась уш зярыя процедурат федеральной министерстватнесэ, ней моли согласованиянь меельце пельксэсь. Неень шкантень уш кочказь 5 резидентт – те «АФК Системань» кавто проектт ды тестэнь резиденттнэнь колмо проектт. Инвестициятнень вейсэнь покшолмась карми малав 12 млрд целковойть, теевить малав 1200 важодемань од таркат. Васенце проекттнэнь арсеви нолдамс 2025 иестэ, ней резиденттнэ кундыть чаво корпустнэнь реконструкциянтень.
Артём Здунов ваннынзе ОЭЗ-нь площадтнень, кортась предприятиятнень руководительтнень марто арсематнеде ды тевтнень топавтомань шкатнеде. Зярс ОЭЗ-нь прявт партнерось - «Гласс Декор» компаниятнень группань «Лисфармстекло» ООО-сь, карми нолдамо медицинань сулика. Икелень зярыя цехтнень сайсынзе Орданьбуень светотехнической заводонь проектэсь.
Мордовиянь Прявтонтень истя жо невтизь таркатнень, косо моли строямонь васенце зонась, ды чаво площадтнень, косо арсеви строямс од резиденттнэнь туртов. Кортамось мольсь резиденттнэнь кельгстямодост, инженерэнь коммуникациятнень ды энергоресурстнэнь ветямодост – сынь ладяст промышленниктнень весе вешемаст туртов.
Мордовиянь Прявтось тешкстызе: эряви седе эрязасто топавтомс весе важодематнень, штобу эрязкавтомс резиденттнэнь важодемань ушодовомаст.
Мордовия Республикань Прявтонь пресс-службась