Мордовиясь кемексты тарканзо вейке ломаненть коряс прявт капиталс региононь инвестициянь рейтингсэнть. 2016 иень итогтнень коряс республикась саизе 44 тарканть (2015 иестэ – 48 тарка, 2014 иестэ – 60) вейке ломаненть лангс 65,4 тёжат целковойть невтевксэнть марто.
«Республикань экономикань потенциалонть кепедемась, производствань покшолматнень касомась, важодемань од таркатнень теемась, ломантнень эрямост вадрялгавтомась – республикань инвестициянь тевтеемань прявт ёнкст», – тешкстызе Мордовия Республикань Прявтонь тевтнень нурька шкас топавтыцясь Владимир Волков.
2016 иестэ регионсонть прявт капиталс финансированиянь весе источниктнень вельде инвестициятнень покшолмась кармась 52,8 млрд целковойть. Касоманть коряс Мордовиясь саизе 6 тарканть ПФО-со ды 50 тарканть Россиясо.
Весе инвестициятнень эйстэ покш пельксэсь путозь обрабатывающей производствантень – 24,7% (ярсамопелень производствась, электронной ды оптической оборудованиянь нолдамось, чувтонь обработкась ды чувтосто теевкстнэнь производствась).
Рейтингень лидерэкс 2016 иестэ кармасть сибирень ды пелевеёнксонь регионтнэ: Тюменень областесь, Сахалинэнь областесь, Саха Республикась (Якутия), Магаданонь областесь, Коми Республикась, Чукоткань автономной округось.
Рейтингень меельце кеме регионтнэнь юткс совасть Ставрополень краесь, Северной Осетиясь, Адыгея Республикась, Курганонь областесь, Алтаень краесь, Бурятия Республикась, Севастополь ошось, Крым Республикась, Тыва Республикась, Ивановань областесь.