Мордовиясь саизе 13-це тарканть Россиянь Инновациянь регионтнэнь ассоциациянь рейтингсэнть. Ютазь иенть коряс, республикась кепедевсь вейке тешксэс ды совась виев инноватортнэнь юткс. Васенце колмо таркатнень, коень коряс, саизь Санкт-Петербургось, Московось ды Татарстанось.
2017 иень рейтингесь анокстазь 29 невтевкстнэнь коряс. Юронь колмо блоконь невтевкстнэ (наукань ванкшноматне-тонавтнематне ды разработкатне; инновациянь тевдеемась; инновациянь тевдеемань социально-экономической лувось) кадовсть малав апак полавто.
Ютазь иень ванкшноматнень эйстэ прявт явовомась сюлмавозь 6 од индикатортнэнь мельс саеманть марто, сынь вейсэндязь «Инновационная активность региона» смустень блоконтень. Сон максы питне региононь властнень вийсэ инновациянь мероприятиятнень анокстамонтень ды инфраструктурань объекттнэнь теемантень, истя жо ванновить участниктнень ёрокчист федеральной лезксэнь инструментнэнь тевс нолдамсто ды виевгавтомань федеральной институттнэнь марто вейсэнь важодемась.
Мордовиянь Прявтонть Владимир Волковонь ванновтонзо коряс, республикась нежеди кувать шкань икельдиця виевгавтоманть лангс ды анок вейсэ важодемс креативной бизнесэнть марто. Ансяк ютазь иестэнть регионсонть панжозь 12 од производстват ды ушодозь эштё 6 заводонь строямось.
«Минек покш арсеманок сы шкантень – поладсынек инфраструктурань тееманть, конась лезды топавтомс проекттнэнь, истят арасть весе Россиясо.
Васняяк те оптической волокнань нолдамонь коряс заводонть седе тов виевгавтомась. Ней моли анокстамо производствань омбоце очереденть теемантень, те лезды редявикстэ киртямс сырьянь импортонь пачтявкстнэнь. Ламо теезь агропромышленной комплекссэнть. Сюронь покштояк покш урожайденть минь уш кортынек. Прявтось, течи минек АПК-нть улить икеле молиця технологият – Россиянь келес сехте вадрятнестэ вейкетне, ды аволь ансяк Россиясо.
Редявикс республиканть путовксозо масторонь обороноспособностенть кемекстамосонть. Саранскоень телевизионной заводось, конась важоди Оборонань министерстванть марто вейсэ, нолды продукция, конась лади вадрячинь ды кемечинь стандартнэнень. Чипаень энергетикасонть, те энергиянь альтернативной источниктнень сехте перспективной видэсь, «Хелиос - Ресурс» предприятиянь весе продукциясь моли азиатской рынкатнес. «Биохимикенть» юрсо теезь Фармацевтической производствань виевгавтомань коряс национальной научно-производственной центра. Нолдазь антибиотикень од поклениянь отечественной васенце субстанциясь, сонзэ образецэсь максозь Россиянь Президентэнтень Владимир Владимирович Путинэнь. Весемезэ колмо иень перть «Биохимиксэ» ладяви 20 ламо антибиотиктнень нолдамось, те карми покш путовксокс лекарствань независимостенть топавтомантень. Те сеть проекттнэнь аволь покш пельксэсь, конат кандыть покштояк покш смусть весе масторонть туртов», – тешкстызе республикань Прявтось.
Владимир Волков мерсь, сынст топавтомась кемекстасы республиканть коряс масторонь сехте инновациянь регионтнэстэ вейкенть статусонть.