Эсь изнявксост невтить 26 регионтнэстэ АПК-нь компаниятне - те велень хозяйствань продукциясь, 250 ламо ракшат - скалсто ды лишместэ саезь понань ракшатнень ды нармунтнень видьс, отраслянть туртов цифровой решениятне ды ламо лия.
Мордовиясь тедеде тейсь нежедькс эйкакштнень шумбрасто андоманть туртов продукциянть лангс - невти масторонть туртов лия ёнов а молиця проект эйкакшонь дошкольной учреждениятнесэ «Органика детям» органической ловсонь продукциянть совавтомань коряс. Те Мордовиянь Прявтонть Артём Здуновонь ушодкстнэстэ вейкесь, сон РФ-нь Госсоветэнь «Семья» ёнксонть коряс комиссиянь прявтсо. Республикась совавтызе те проектэнть «Органика» Фондонть марто вейсэ «Россельхозбанк» АО-нь генеральной партнёронть ды «Биосфера» ООО-нь лезксэст вельде. Сонзэ топавтомадо вейсладямось тешкстазь те иень аштемковсто Петербургонь раськеютконь экономической форумсонть.
Проектэнть лувсо Саранскоень 63 эйдень кужотнес пачтяви «Эйкакшонь пищевой станциянь» органической симема ловсо, топо, чапамо ловсонь продуктат. Те Россиясо вейкине предприятия, конась нолды органической ловсосто вишка эйкакштнень туртов ловсонь ярсамопельть. Лиякс меремс, сонзэ теить синтетикань пестицидэнь, минеральной удобрениянь, касомань гормононь, искусственной пищевой добавкань, антибиотикень ды генетикень модифицированной компонентэнь тевс апак нолда.
Республикань велень хозяйствань производствань лия прявт пельксэсь - фермерэнь. Минек фермертнэнь продукциянь ламот видтнэнь мереви ловомс лия ёнов а молицякс. Саемга, африкань клариевой сомонть максосто паштетэсь, камамбер ремесленной сырась, мордовиянь сидрась.
А эште Мордовиянь фермерствась - семиянь редявикс история. Невтемакс, выставкасонть невтеви Теньгушевань енкссто «Мардарики-Шокша» сеянь сырась. Марина Перфильева икеле ульнесь журналистэкс, федеральной каналтнэстэ вейкенть эсензэ корреспондентэкс. Ней сон эри васоло велесэ, пиди сеянь сыра, кучи кармавтомат аволь ансяк масторонть келес, истя жо томбалев.
Выставкасонть истя жо Алексей Кулагин, сонзэ кочкодыкень трямонь-кастомань семиянь фермась сови Россиянь кемень сехте покш кочкодыкень ферматнень юткс. Ютазь иень «Сырнень сёксестэнть» сон казезь дипломсо ды семиянь сехте вадря фермань номинациясо сырнень медальсэ.
Выставкантень сонзэ важодемань васенце чистэнть уш якась Россиянь Правительствань Председателесь Михаил Мишустин. Ракшань кирдемань павильононть ванномсто сон эзь ютаво Ицялонь енкссто Ролекс покш алашанть вакска. Правительствань Председателесь вадяшизе 900 килограммонь сталмосо алашанть ды тешкстызе: «Мазый!».
Выставканть лувсо ютавтовить Весероссиянь Васенце агродиктант, «Женщины в АПК» Форум, кругловой стольть ды ламо лия мероприятият. Мордовиянтень ули мезе невтемс ды мезде ёвтнемс эрьвасонть - велень хозяйствань отраслянь виевгавтомантень минек явови башка мель школасто саезь: тонавтнемань те иестэнть региононь велень вете школатнесэ панжозь 17 агрокласст, конатнень тешкстынзе РФ-нь Велень хозяйствань министрась Оксана Лут.
«Сырнень сёксень - 2025» васенце чинь прявт тевекс кармась пленарной промксось. Сон алтавсь цифровизациянтень кода АПК-нь производительностень кастомань инструментэнтень.