Мордовиясь совась сеть регионтнэнь юткс, косо ладявсь социально-политической паро лув, невтсь сехте вадря динамика масторонть келес. Истят даннойть макссь «Петербургская политика» фондось, кона ютавтсь субъекттнэнь коряс рейтинг 2016 иень декабрянть перть.
Фондонь эксперттнэ покш питне макссть Россиянь Правительствань кармавтомантень, конань вельде социально-экономической касомань паро невтевкстнэнь кисэ республикантень явозельть ярмакт.
Эзь кадово мельтеме инновациянь касомань-кемекстамонь коряс властень институтнэнь лезэв важодемась. Васняяк те Республикань Прявтонть Владимир Волковонь «Мордовия-Технопарконь» гендиректоронть Виктор Якубань марто технопарконть, кода инновациянь прявт структуранть, седе тов вивгавтомадонзо кортамось. Эряви меремс, региононь технопаркось сайсь сисемеце тарка федеральной рейтингсэнть, конань пурнызе кластерэнь ды технопарконь Ассоциациясь.
Декабрясто сёрмадстозель фармацевтической научно-производственной ды «Антибиотики» инжинирингень центрань Саранскойсэ панжомадо соглашения. Владимир Волковонь валонзо коряс, те куншкакурось карми топавтомо импортонь полавтомань прявт тевтнень.
Эштё вейке покш тевекс кармась «Ашан» компаниянь «Наша радуга» гипермаркетэнь панжомась. Республикань Прявтось тешкстызе, республикань потребителень рынкасонть содавикс лем марто покш налксицянть появамось - те вадря динамика экономиканть, бизнесэнть виевгавтомань ды важодемань од таркатнень тееманть туртов.
Сонзэ мелензэ коряс, Мордовиянь производительтнень ярсамопельтне улевельть «Ашан» лавкатнесэ. Теде башка, алтнэ, саразонь сывелесь, ловсонь продукциясь, кондитерской изделиятне топавтовлизь лия регионсо супермаркеттнэнь вешемасткак.
Рейтингень кавксо баллтнэ (2016 иень ноябрянть коряс путовсть эштё 0,2 баллт) лездасть Мордовиянтень саемс 10 тарка мастронь сехте устойчивой территориятнень юткссто. Республикадонть башка, тов совасть Татарстан, Тюменень областесь, Ямало-Ненецкой АО-сь, Ленинградонь областесь ды лият. Таблицанть песэ Карелия, Иркутской областесь ды Приморской краесь.