Мордовиясь - саизе васенце тарканть весероссиянь рейтингсэнть раськеютконь отношениятнень ванстомаст коряс

Мордовиясь ёвтазь рейтингень лидерэкс раськеютконь отношениятнень ванстомаст коряс. Ванкшноматнень-тонавтнематнень лангс нежедезь, конатнень ветинзе Ванстомань федеральной службась ютазь иестэнть, республикань эрицятнень 93,2% макссть вадря питне регионсонть раськеютконь тевтненень ды раськеютконь отношениятненень.

«Течи Мордовиясо сэтьмечисэ ды вейкень-вейкень чарькодемасо эрить 100 ламо раськеть. Весе сынь ловить республиканть тиринь кудокс. Секскак властень институтонь, общественной организациятнень ды раськень вейсэндявкстнэнь вейсэнь важодемантень содавикс экспертнэнь пельде покш питнень максомась, нама, пек мельспаро.

Россиянь Президентэсь Владимир Путин 2012 иестэнть ёвтызе Мордовиянть вадря невтевксэкс раськеютконь отношениятнень ладямонь маштоманть коряс. Государствань прявтось тешкстызе, Мордовиясь - ламо раськень республикань вадря невтевкстнэде вейкесь, тесэ видестэ ладязь башка этностнэнь ды религиятнень ютксо раськень отношениятне.

Теде башка, Мордовиянь Прявтонть Указонзо коряс эрьва иестэ ютавтовить «Акша келу», «Раськень озкс», «День славянской письменности и культуры», «Сабантуй» ды фольклоронь-этнографиянь лия кенярксчить», - ёвтызе мелензэ исследованиянь результаттнэнь коряс МР-нь Общественной палатань членэсь, МР-нь народной поэтэсь Камиль Тангалычев.

Республикась путы покш вийть, тесэ эриця весе раськетнень культураст ванстомантень ды сюпалгавтомантень. Тесэ лезэвстэ важодить культурань зярыя покш организацият. Невтемга, «Ассамблея народов России» отделениясь, Россиянь Финнэнь-угрань раськень ассоциациясь, Финнэнь-угрань раськень культурань Равчирень куншкакурось, «Якташлар» татаронь раськень-культурань автономиясь, Азербайджанонь Весероссиянь конгрессэнь отделениясь, Россиянь армянонь вейсэндявксось, евреень раськень-культурань Саранскоень автономиясь, украинецэнь раськень-культурань Саранскоень автономиясь, казаконь ошонь обществась, рузонь культурань куншкакурось ды ламот лият.

Весе неть вейсэндявкстнэ лездыть Мордовиясо эриця раськетнень ютксо сэтьмечинть ды ялгаксчинть виевгавтомантень.