Мордовиясь ванстызе тарказо социально-политической кеме лув марто регионтнэнь ютксо. Теде кортави "Петербургская политика" фондонть ванкшноматнесэ, конат яволявтозь течи.
Фондонь эксперттнэ коень коряс ёвтасть зярыя тевть, конат лездасть региононтень саемс покш тарка. Васенцесь эйстэст - Кочкурбуень ёнкссо ловсонь домкасто переработкань заводонть панжомась. Од предприятиясь нолды продукциянь 30 видт - велькстэ ды чапамо ловсосто саезь чевте сырань ды мороженоень видьс. Од оборудованиянть пингстэ эряви аламо кедьсэ важодема, тень вельде продукттнэ пек вадрят.
Мордовиянь Прявтось коллективень важодицятнень марто кортамсто тешкстызе аволь покш предприятиятнень ды фермерэнь хозяйстватнень башка таликаст республикань экономикасонть. Сон тешкстызе, властне седе товгак кармить явомо весемеёндонь лезкс.
Ютазь ковсто Инсаронь ёнкссо ушодызе важодеманзо "Талина" компаниятень группань сядо тёжат пряс тувонь комплексэсь. Ледстясынек, ютазь иень авгуссто Владимир Волков ульнесь строямонь ушодомань церемониясонть. Од комплексэсь лездась теемс вадря зарплата марто 80 важодемань таркат.
Теде башка, вадря тевтнень юткс истя жо совасть РИА Рейтинг ванкшноматнесэ те иень 9 ковтнень перть эрицятнень ярмаконь алкуксонь доходнэнь касомаст коряс Мордовиянь 5-це таркась ды Экономикань ды политикань реформатнень куншкакуронь ловоматнень коряс каршо молемань акциятнень ламочист коряс регионтнэнь рейтингсэнть 79-80 таркась.