Цехень нолдамонь тешксэнь кнопканть лепштизь Россиянь Шумбрачинь ванстомань министрань полавтыцясь Сергей Глаголев, Федерациянь Советэнь Оборонань ды безопасностень коряс комитетэнь председателесь Виктор Бондарев, Государственной Думань Шумбрачинь ванстомань коряс комитетэнь председателень васенце полавтыцясь Федот Тумусов, Мордовиянь Прявтось Артём Здунов ды «Промомед» КГ-нь прявттнэнь советэнь председателесь Пётр Белый.
Предприятиянь производствань вийтнень ванномась ушодовсь интерактивной презентациястонть. Петр Белый евтнесь промышленной гигантонть целанек касомадонзо-кепетемадонзо ды од производствань башка енкстнэде. 28 гектартнэсэ теезь производствань корпуст, предприятиянь цехть ды сооруженият ды истя седе тов. Прядови масторсонть сехте покш ды экологичной ванськавтомань сооружениятнень строямось.
«Биохимикесь» – Россиясо вете сехте покш фармпредприятиятнень ютксо вейкесь, анок топавтомс куш кодамо тев шумбрачинь ванстоманть коряс. Ансяк тедеде инженерэнь комплекстнэс ды ванноматнес путозь 10 миллиардто ламо целковойть», – тешкстызе Петр Белый.
«Промомед» КГ-нь од производствась – Европасо сехте одтнэстэ вейкесь. Тесэ ломанень важодеманть таркас тевс нолдави вакуумонь пачтямонь технологиятне. Тей путозь неень шкань технологият.
Цехень линиясонть кармить нолдамо противовируснойть, нестероиднойть противовоспалительнойть, гепаропротекторнойть препаратт. Маласо шкастонть ладяви сашень формасо препараттнэнь нолдамось. Производствань условиятне ды технологиянь енкстнэ ванновить мониторингенть, даннойтнень пурнамонть, диспетчеризациянть ды шкастонзо управлениянть вельде. Те лезды весе линиятнесэ нолдамс пек вадря качествань продукция.
Кенярксчинь церемониясонть пурнавозетненень шумбракстнемань вал марто пшкадсь Россиянь Федерациянь шумбрачинь ванстомань министрась Михаил Мурашко: «Фармацевтикань индустриясь шкастонзо рединзе COVID-19 вешематнень ды нурька шкас ладясь препараттнэнь нолдамонть, конат идесть минек масторонь тежат ломантнень эрямост. Мон евтан кемема: производствань од площадканть Россиянь фармацевтикань производительтнень юткс совавтомась лезды миненек кармамс седе кемевиксэкс, те карми Россиясо целанек шумбрачинь ванстоманть ды фармацевтикань отраслянть виевгавтомань юрокс».
«Мон истямо мероприятиясо, конась тейсь революция медицинасонть. Од цехесь – те важодемань таркат, вадря зарплата. Тынь тейтядо покш путовкс минек государствань лекарствань независимостентень. Сюкпря тенк, тынь – бороцятадо а неявиця ятонть марто!» – мерсь Федерациянь Советэнь Оборонань ды безопасностень коряс комитетэнь председателесь Виктор Бондарев.
Государственной Думань Шумбрачинь ванстомань коряс комитетэнь председателень васенце полавтыцясь Федот Тумусов тешкстызе весе масторонть туртов течинь тевень эрявиксчинть, а, паряк, весе масторлангонть туртов: «Предприятиясь ашти наукань икельце песэнть – регистрациясо, клинической ванноматнесэ ды нолдамосо аштить 190 препаратт. Цехесь, конань минь панжинек, топавты предприятиянь технологической вадря енкстнэнь лиятнень икеле, истя жо минек масторонть – фармацевтикань препараттнэнь лия мастортнэнь-нолдыцятнень икеле».
«Истят производстватнень панжомсто, минь невтяно весе масторлангонтень: Россиясь машты улемс целанек технологически независимоекс. Минь маштано нолдамо эрявикс оборудования, тонавтомо ломантнень, ютамс интеллектуальной ули-паронь ванстомань коряс весе кинть. Минь важодтяно теке вейкине команда. Уш ней арсетяно производствань од пелькстнэде, од инвестициятнеде ды рынкатнеде», – тешкстызе Артём Здунов. Сон истя жо евтась сюкпря инжетненень Мордовиянтень лездамонть кисэ, «Промомед» компаниятнень группантень – лезэнь кандыця вейсэнь важодеманть кисэ.
«Минь неинек од цехень панжоманть, сон лезды лекарствань нолдамонь цифровизациянтень, ливти сынст од уровняс, теи лекарствань калгодо форматнень нолдамонь лувонть неявицякс, лезды куроксто тонадомс рынкань полавтовиця вешематненень ды шумбрачинь ванстомань вешематненень. Те аволь ансяк изнямо, те внешней тердематнень коряс минек вийтнень невтемась», – мерсь Россиянь шумбрачинь ванстомань министрань полавтыцясь Сергей Глаголев.
Церемониянь прядовомсто предприятиянь сехте вадря важодицятнень казизь Федерациянь Советэнь Оборонань ды безопасностень коряс комитетэнь почетонь грамотасо, Мордовия Республикань Прявтонь благодарностьсэ, истя жо Государственной Думань Шумбрачинь ванстомань коряс комитетэнь почетонь грамотасо.
Мордовия Республикань Прявтонь пресс-службась