Турнирэнь чемпионокс кармась ЦСКА-нь командась, омбоце тарканть саизь Юрий Коноплевонь лемсэ футболонь академиянь спортсментнэ, колмоце таркась - «Мордовия» од футболисттнэнь анокстамонь куншкакуронь футболонь вейке команданть.
Пелькстыцятненень поздоровт евтасть Мордовиянь Прявтось Артём Здунов, вице-премьерэсь Инсаф Хайруллин, спортонь министрась Александр Савилов, истя жо Россиянь заслуженной тренерэсь, Мордовиянь Прявтонь советникесь Валерий Четверик.
Артём Здунов пшкадсь спортсментнэнень ды трибунатнесэ ваныцятненень: «Течи тей пурнавсть футболонь вечкицятне – кие налкси футболсо, кие ваны футбол, кие эри футболсо. Минек туртов тешксэв ды пек мельспаро: Николай Николаевич Озеровнень – минек ине комментаторонтень, минек ине спортсменэнтень минь алтынек те туртнирэнть. Мордовиясо улить вадря койть, минь сынст поладтано. Улить тевть, конатнень эряви теемс коекс. Секскак ули видекс, бути те турнирэсь ламо иетнес карми республикань вадря коекс. Бути тынь тень кирдтядо – минь карматано тень коряс важодеме, – мерсь сон. – Седейшкава евтан поздоровт весенень, кить ульнесть неть пелькстамотнесэ. Минь, алкукс, покш мель марто мельгаст ванынек. Миненек эряви неемс, кода Россиянь сехте вадря футболисттнэ налксить Мордовиянь площадкатнесэ. Весенень покш сюкпря!»
Мордовиянь командась пурнась турнирсэнть виев соперниктнень марто налксемань покш опыт. «Те лезды миненек седе тов. Ней эзь сато уцяска ды анокстамо. Минь карматано важодеме!» – мерсь «Мордовия 2005» командань капитанось Виталий Трофимов.
Мордовия Республикань Прявтонь пресс-службась