Ледстясынек, тедеде Мордовиянь Прявтось Артём Здунов пачтясь Россиянь Президентэнтень Владимир Путиннэнь те енксонь виевгавтомань коряс арсематнеде: «Тынк участиянть вельде минь панжинек биотехнологиянь од предприятия. Ней карминек нолдамо антибиотиктнень ды противовирусной препараттнэнь производстванть туртов субстанцият. Пекстынек эште вейке инвестициянь тарка. Минек арсематнесэ теемс Биотехнологиятнень федеральной куншкакуро. Те лезды топавтомс Россиянь лекарствань безопасностенть».
Яволявтомань анокстамонь пелькссэнть республиканть кирдизь масторонь Минпромторгось ды Россиянь наукатнень академиясь. Регионсонть куншкакуронь теемань, производственниктнень, студенттнэнь ды преподавательтнень целевой тонавтомань анокстамонь коряс проектэнь топавтомань коряс важодеманть Н. П. Огарев лемсэ МГУ-нь коллективесь вети «Промомед» КГ-нть марто вейсэ.
Мордовиясо вузонь ученойтнень лезксэст вельде теезь отечественной васенце субстанция, нолдазь антибиотиктнень пешксе циклань масторсонть васенце производствась. Кавто иетнень перть панжозь вете од лабораторият: искусственной интеллектэнь, биотехнологиятнень, фармпрепараттнэнь варчамонь, оборудованиянь техобслуживаниянь ды витнемань. Нурька шканть перть Мордовиянь фармацевтикань енксонтень путозь 16 миллиардт целковойтнеде седе ламо.
Биотехнологиятнень куншкакуронь теемань прявт смустесь – биотехнологиянь од препараттнэнь производствань пешксе циклань топавтомась. Куншкакуронть юрсо кармить ветявомо ванномат-тонавтомат, конат икеле ютавтовсть омбо мастортнэсэ. «Те лезды нолдамс ломантнень туртов пек эрявикс препаратт: онкологиянь, аутоиммунной, орфанной ды генетической орматнень лецямост туртов, анокстамс покш квалифицированной кадрат. Редявикс путовкс ули теезь целанек Россиянь наукань виевгавтомантень», – тешкстызе Артём Здунов.
Мордовия Республикань Прявтонь пресс-службась