Семиянь советэнь важодемась ушодовсь таштамковонь 30-це чистэ, Ламо эйкакшонь семиянь чистэ, конась кемекстазь Мордовиясо ды тедеде тешкстави васенцеде.
Мордовиянь Прявтось Артём Здунов, сон Госсоветэнь «Семья» ёнксонть коряс комиссиянь прявтсо, тешкстызе, Россиянь Президентэсь тешкстынзе эрицятнень ванстомасо вешематнень ды тевтнень. Сынст топавтомга ды берянь тенденциятнень полавтомга, конат эрязат ней обществасонть, эряви важодемс ламот ёнкстнэнь коряс.
Мордовиянь Прявтось ёвтызе статистиканть: республикань 207 тёжадо ламо семиятнень ютксто 65 тёжатне – эйкакштомо мирдть-нить. Прявт кевкстемась, конась веши каршо вал: мекс неть семиятнесэ арасть эйкакшт?
Эйкакш марто семиятненень лездамонь 40 ламо тевтне ней важодить регионсонть. Покш важодема ветяви предприятиятнесэ ды организациятнесэ семиятненень корпоративной лезксэнь максоманть коряс. Эрявиксэкс кадови сындест весеме ёндо пачтямось, истя жо сынст лезэвчидест каршо сюлмось. Те тевесь, истя жо, ашти Советэнтень совицятнень икелеяк.
Самай секс Советэнтень совицятне сехте ламоёнксонь. Тов совасть 50 мирдть-нить - ламо эйкакшонь ды од семиятне, СВО-нь участниктнень семиятне, семиянь пелькстамотнесэ изницятне ды федеральной грантонь получицятне, семиянь бизнесэнь ды покш предприятиятнень, ламо эйкакшонь важодемань династиятнень, общественной ды религиозной организациятнень, тонавтомань ды шумбрачинь ванстомань енксонь учреждениятнень представительтне.
Советсэнть 82% семиятне - те ламо эйкакшонь триця семият, косо колмо ды седе ламо эйкакшт. Председателень полавтыцятнестэ вейкекс кармась 10 эйкакшонь авась, конанень максозь Россиянь Федерациянь «Мать-героиня» лемесь – Ольга Исайкина.
Ламо эйкакшонь тетясь, МР-нь Прявтонь Секретариатонь руководителесь, Семиянь советэнь секретаресь Михаил Никишин тешкстынзе те структурань прявт тевтнень: демографиянь ушодкстнэнь анокстамось, истя жо «раськень» ды законодательнойть, семиятненень лездамонь прявт ёнкстнэнь, истя жо региононь куш-кодамо проекттнэсэ ды госпрограмматнесэ семиянь лувонь топавтомась, предприятиятнесэ важодемась.
Ансяк сехте прявтось Советэнь аволь формальной важодемасонть - сеть тевтнень коряс решениятнень вешнемась, конат а понгить семиянь ламо кевкстематнес. Те семиятнесэ мирденть-нинть ютксо отношениятнень ванстомась, семиянь психологтнень важодемась, межнациональной ды межрелигиозной отношениятнень башка ёнксось, аволь пешксе семиятнесэ эйкакштнень кастомась ды неть тевтнень эйстэ тетятнень-аватнень кекшнемась. Советэнтень совицятнень истят прявт кевкстематнень ванномась карми федеральной уровнянть туртов опытэкс.
Саранскоень ды Мордовиянь митрополитэсь Зиновий тешкстызе эйкакштнень кастомасо ды семиянь питнейчитнень кемекстамосо духовной юртнэнь: «Семиясь – те эриця организма, сехте прявт ды васенцекс аштиця. Семиясь касты личностенть ды виевгавты сонзэ».
Советэнь членэсь, СВО-нь ветеранось Дмитрий Волков ёвтнесь эсь опыттэнть, кода семиязо кармась ламо эйкакшонь кастыцякс. Ранявомадо ды реабилитациядо мейле кудов велявтомсто, сынь нинзэ марто арсезевсть колмоце эйкакшонь чачтомадо. «Пазось максызе тенек сонзэ! А аволь умок цёрам энялдсь ялакскеде - теде кортатано минек семиянь советсэ», - мерсь ламо эйкакшонь триця тетясь.
«Тынь минек туртов - общественной мельтнень-арсематнень лидер. Демографиянь темась - неень шкане сехте стака, ды миненек сонзэ сави витемс!» - кирдизе Мордовиянь Прявтось.
«Кантриум» технологической стартапонь теицясь Мария Соколова ёвтнесь: сонзэ ламо эйкакшонь триця семиясь ульнесь тетянь-авань колмо форумтнесэ, истя жо «Ялгат» форумсонть: «Те минек пек виевгавтымизь кода тетянть-аванть. Эряви ансяк варчамс - те сехте вадря мотивация! Миненек эстенек эряви чарькодемс, минь аштетяно эсь эйкакштнень туртов прявт тонавтыцякс-невтицякс!»
Общественной тевдеемань эште вейке невтевксэсь - «Территория семьи» АНО-нь генеральной прявтось, ламо эйкакшонь авась Екатерина Деринская. «Авакс улемантень лездамось - монь тевем! - тешкстызе сон. - Президентэнь гранттнэнь Фондонть вельде минь топавтынек Саранскоень Чачтома кудонь инфраструктурань одкстомтомань коряс ниле проектт».
Семиянь советэнь васенце, установочной промксонть прядовомга Артём Здунов ёвтась сюкпря тов весе совицятненень те кевкстемантень мелень явоманть кисэ: «Ней те пшти кевкстема: кода велявтомс моданть семиянь питнейчитнень лангс, ламо эйкакшонь семиянть лангс, цёратнень ды аватнень ютксо сюлмотнень лангс. Семиянь советэнть пек эрявикс идеологической важодемазо. Прявт решениятнень минь коенть коряс кемекстатано семиянь советсэнть, минь весе минек республикасо – ялгаксчисэ эриця покш семия, секскак эряви вейсэ арсемс, кодат тенек эскелькст теемс те тевенть пек полавтомга!»
Мордовия Республикань Прявтонь Пресс-службась