Мордовиясо ушодовсь фигурной кирякстнемань коряс Россиянь чемпионатось

Мордовиясо ушодовсь фигурной кирякстнемань коряс Россиянь чемпионатось

Мордовиянь госфилармониянь артисттнэнь концертсэ, эень мазый шоусо ды МР-нь фигурной кирякстнемань коряс олимпийской резервань эйкакшонь-од ломанень спортонь специализированной школантень якицятнень невтемасо ушодовсть кенярксчитне, конат алтазь фигурной кирякстнемань коряс Росссиянь чемпионатонь панжомантнень.

Ваныцятненень, конат пештизь Саранскоень Эень дворецэнь трибунатнень, отечественной содавикс фигуристтнэнень пшкадсь Мордовиянь Прявтось Владимир Волков:

– Минек туртов покш честь уш колмоцеде ютавтомс истят покш пелькстамот. Истямо кемемась тешксты спортонь эрьва кодамо видтнэсэ минек республикань изнявкстнэнь редямонть. Фигурной кирякстнемась минек регионсонть кармась касомо-кепетеме ансяк кемень иеде икеле. Уш улить вадря невтевкст. Фигурной кирякстнемань Мордовиянь школантень якицясь Вячеслав Катичев пельксты масторонь чемпионатсонть, – тешкстызе МР-нь Прявтось. – Мордовиясо теезь спортонь пек вадря инфраструктура. Ней регионсонть Эень дворецтэнть башка важодить эень вельтязь 9 аренат. Куроксто неень шкань эштё вейке арена тееви Саранскоень Универсальной залсонть. Сонзэ трибунатнес кельгстевить малав 8 тёжат ломанть. Ды минь карматано кенярдомо одс неемс тынк Саранскойсэ!

Республикань Прявтось арсесь чемпионатонь участниктненень виде бороцямо. Ды кадык Саранскоень эесь канды спортсментнэнень уцяска!

СССР-нь Заслуженной тренерэсь Татьяна Тарасова видькстась: «Минь аволь васенцеде сынек инжекс Саранскоев, ансяк тесэ марятанок прянок теке кудосо. Тесэ уш пек парсте ютавтовсть Россиянь ды раськеютконь уровнянь пелькстамотне. Те чемпионатось – минек спортсментнэнь туртов сехте ответственной. Сонзэ итогтнень коряс пурнави масторонь командась, кие карми ванстомо Россиянь спортонь честенть Европасо ды масторлангсо».

Россиясо Конька лангсо фигурной кирякстнемань Федерациянь президентэсь Александр Горшков эсензэ пельде ёвтась сюкпря Мордовиянь кирдийтненень «минек спортонть вечкемань, весемеёндонь лезксэнь явоманть ды чемпионатонть пек вадрясто анокстамонть кисэ».

– Яволявтса фигурной кирякстнемань коряс Россиянь чемпионатонть панжозекс! – мерсь Александр Горшков.

Церемониясонть фигурной кирякстнемань виевгавтомантень покш путовксонь кисэ Славань III степенень орденсэ МР-нь Прявтось Владимир Волков казинзе ФФККР-нь Президентэнть Александр Горшковонь, ФФККР-нь Генеральной прявтонть Александр Коганонь ды содавикс тренерэнть Татьяна Тарасовань.