Форумонь важодемадонть икеле инжетне ваннызь экспозициянть, косо невтезельть республикань 18 промышленной организациятне. Те кабелень, оптической и полупроводниковой продукциянь прявт производительтне, вагоностроительтне. СВО-нь туртов продукциянь пелькссэнть инжетне ваннызь оршамопелень, обмундированиянь, снаряжениянь ды пилоттомо ливтнемань объекттнэнь невтевкстнэнь.
«Минь кенярдтано шумбракстнемс минек инжетнень марто. Мордовиясь эри масторонь повесткасонть, важоди партиянь весе проекттнэнь коряс», – мерсь Артём Здунов, форумонть панжомсто.
Андрей Турчак тешкстызе, неявить республикасонть вадря енов полавтоматне, регионсонть топавтовить государствань прявтонь весе кармавтоматне. Сон евтась сюкпря весе пурнавозетненень, коллективтненень ды Мордовиянь Прявтонь управленческой командантень.
«Единая Россия» партиянь Председателенть Дмитрий Медведевень ушодксонзо коряс те иесь яволявтозь Первичной отделениятнень иекс. «Тынь – весе минек партиянть юрозо, сонзэ сехте покш рисьмезэ, тынь весемеде малавикст ломантненень ды правань коряс улезэ возможностенк кирдемс виде сюлмот партиянь региононь ды федеральной руководстванть марто, примамс участия решениятнень анокстамосо», – пшкадсь «первичкатнень» секретарьтненень Андрей Турчак.
«Единой Россиянь» Генсоветэнь секретаресь тешкстызе, седе покш лезэвчинть туртов тедеде тееви партиянь первичной отделениятнень федеральной советэсь, ков совить региононь ды округонь уровнятнесэ кочкамодо мейле сехте вадря секретарьтне. Истя жо нолдавить сехте вадря практикатнень ламолгавтомань туртов пелькстамот.
Форумонь темась - «Россия начинается с семьи» – эрявикс Семиянь иенть лувсо, конань яволявтызе Владимир Путин. Тевс нолдави «Семья» национальной од проектэсь – тов совавтовить масторсонть улиця социальной лезксэнь весе енкстнэ, истя жо од ушодкстнэ, конатнень яволявтынзе Президентэсь эсь Кучомасонзо. «Единая Россия» партиясь семиятненень ды семиянь питнейчитненень лездамонтень алтась партиянь Народной программань башка пелькст, важоди «Крепкая семья» проектэсь. Мордовиясо те енксонтень истя жо явови покш мель.
«Первичной отделениятнень тевест – федеральной уровнясо кемекстазь весе тевтнень таркатнесэ топавтомань ветямось, кирдемс свалшкань сюлмот ломантнень марто, важодемс СВО-нь участниктнень семиятнень марто, эрязасто нолдамс тевс грантонь лезксэнть местной ушодкстнэнь топавтоманть туртов», – тешкстызе Андрей Турчак.
«Женское движение Единой России» проектэнь общественной советэнь сопредседателесь Дарья Лантратова тешкстызе, федеральной покш проектэнь уцяскась ушодови таркатнесэ, регионтнэстэ, первичной отделениятнень улемаст вельде.
«Мордовиясо партиянтень совицятневтеме а топавтови вейкеяк социальной эрявикс проект, – тешкстызе Дарья Лантратова. – Минь содатано, геройтнень трямосо-кастомасо, конат течи ванстыть минек масторонть, ламось ашти семиянть эйстэ. Морально-нравственной нежедькстнэнь, питнейчитнень, койтнень-кирдатнень эйстэ, конатне путовить эйкакшпорасто, ашти се, кодамокс карми минек вандынь чись».
Тешкстазель, республикасонть вадрясто ладязь «Защитники Отечества» Фондонь важодемась, парсте топавтови «Крепкая семья» федеральной проектэсь, эйкакш марто семиятненень явови лезкс, ладязь свалшкань важодема школасо эйкакштнень андомаст коряс. Мордовиясь истя жо совась варчамонь 32 регионтнэнь юткс семиянь ламо функциянь куншкакуротнень теемаст коряс.
«Газпром межрегионгаз» ООО-нь ды «Газпром газификация» ООО-нь генеральной прявтось Сергей Густов тешкстызе, догазификациянь программась, конань Россиянь Президентэсь яволявтызе шкавтомокс, – семиянь программа, эдь газось – те лембе кудонть туртов, эрьва семиянть туртов. Кавто иетнень перть масторсонть те программанть коряс сэнь уштомапель максозь 1 млн кудотнес.
Владимир Путинэнь валонзо сень коряс: Россиянь эрицятнеде улест ламо, демографиясь – те васенце тев, ледстинзе «Крепкая семья» партиянь проектэнь координаторось Татьяна Буцкая. «Тень туртов минь важодтяно!» – мерсь сон. Депутатось тешкстызе, первичной организациятнень таликась пек покш – самай тосо чачить решениятне, конатне теить ломантнень эрямост седе вадрякс.
Форумонть лувсо сехте вадря практикатнеде ды ушодкстнэде евтнесть первичной организациятнень секретарьтне: Торбеева енксонь Дракино велень Наталья Волгапкина, Ташто Шайговань енксонь Летки велень Елена Лысенкова, Инсар енксонь Новые Верхиссы велень Рита Миронова ды Краснослободской енксонь Сивинь велень Екатерина Пряхина. Аватне евтнесть, кода ветяви важодемась од ломантнень патриотизмань лувсо тонавтомань-превс путомань, тиринь велетнень виевгавтомань, велетнесэ ломантнень ды семиятнень эрямост вадрялгавтомань, акциятнень, культурань, спортонь ды волонтеронь мероприятиятнень ютавтомань коряс.
«Ероков семиясь - эриця велесь, кеме семиясь – те эрямонь вийтнень, свалшкань питнейчитнень ды историянь сюпавчинь ванстомань лисьмапря», – мерсь Инсаронь енкссто Рита Миронова.
Форумонть прядовомга казевсть первичной отделениятнень секретарьтне ды волонтертнэ, явшевсть партиянь билетт.
Мордовия Республикань Прявтонь пресс-службась