Ноябрянь 22-це чистэ МР-нь Прявтось В.Д.Волков ёвтась поздоровт Московонь ды весе Русень Иневанькс Патриархонтень Кириллнэнь, конанень ноябрянь 20-це чистэ топодсть 70 иеть. Поздоровонь сёрмасонть кортави:
- Те кенярксов ды валдо чистэнть Мордовиянь весе эрицятнень ды монь пельде башка евтатано лембе, седейшкавань поздоровт Тынк юбилеенк кувалма!
Миненек пек питней се, Мордовиясь - Тынк туртов малавикс ёнкс. Минь свал марятано, кодамо покш мель Тынь явтадо тиринь енксонтень ды Мордовиянь весе эрицятненень.
Весе минь сюкпрянь вал марто ды кенярдозь ледстнетяно Тынк самонк республикантень. Мордовияв Тынк эрьва самонк сюлмавозь региононь эрямосонть редявикс тевтнень марто, кадсь тешкс аволь ансяк республикань историянтень, истя жо эрьва ломаненть седейс. Истя ульнесь эрзя-мокшонь раськенть Россиянь лия раськетнень марто вейсэндявомань 1000 иетнень тешкстамсто, конанть анокстамосо ды ютавтомасо Тынь явиде покш лезкс. Истя ульнесь сестэяк, зярдо Тынк лезксэнк вельде республиканть кармась улеме иневанькс лездыцязо - праведной воинэсь Феодор Ушаков.
Минь свал карматано кирдеме мельсэ сеть ледстнематненьгак, Тынь баславинк минек республикань зярыя покш храмтнень строямост ды тынсь панжинк сынст, ютксост башка тарка саи Кириллэнь ды Мефодиень иневанькс равноапостолтнэнь лемсэ храмось. Тынк лезксэнк вельде Мордовиянь эрицятне аволь весть сюконясть православиянь ине святынятненень.
Тынь свал явтадо Мордовиянтень покш лезкс духовно-нравственной виевгавтоманть, обществасонть патриотизмань кемекстамонть, государстванть, обществанть ды церькованть вейсэндямонь кевкстематнень витемасо. Течи Тынк лезксэнк вельде Мордовиясь тееви Россиянь духовной куншкакуротнестэ вейкекс.
Минь седейшкава чарькодьсынек Тынк мелень явоманк минек республикантень. Кеман, эрьва ломаненть седейсэ, кие куш весть вастовкшнось мартонк, маридизь Тынк, свалшкас кадовсть превей валонк, конат пештязь лиятнень кисэ мелявкссо ды вечкемасо. Ламо иень перть Тынк превспутоманк максыть вийть, путыть минек икелев од тевть оймень кемекстамонть коряс, виевгавтыть Мордовиянть лезэс важодемасонть, кармавтыть топавтомс вадря тевть ды изнямот Отечестванть лезэс.
Седейшкава арсян Тенк оймень сюпавчи, певтеме вийть, уцяска Тынк Первосвятительской служамосонть Рузонь Православиянь Церькованть лезэс, Ине Россиянть лезэс!
Кадык Тыненк максыть вийть минек ине масторонь эрицятнень лезксэст, конат Тынк пек вечктядызь!
Пазонь лезкс Тенк весе тевсэнк ды ушодкссонк!
Кувака пинге Тенк!
Мордовия Республикань Прявтось В.Д.Волков