Федерациянь Советэнь Председателесь Валентина Матвиенко, пленарной промксонть панжомсто тешкстызе: «Минек вейсэнь ундоксонь системакс, юрокс аштить духовной ды нравственной вейсэнь питнейчитне. Ды, нама, те свалшкань семият, конат свал ульнесть ды кадовить государствань нежекс».
Масторсонть ламо тееви сень туртов, штобу лездамс эйкакш марто семиятненень, теемс условият, штобу эйкакштне получавольть вадря образования, медицинань обслуживания. «Семиянь центричностесь совась обществань весе ёнкстнэс. Кинень кода аволь студенттнэнень явомс мель свалшкань покш семиянь тееманть лангс! Демографиянь ды семиянь политикань стакачитнестэ вейкекс лововить позда урьвакстоматне ды эйкакштнень позда чачтомась. Ансяк ёжотне полавтовить. Бути икеле ломаненть изнявксокс лововсь сонзэ сюпавчись, ней сыргась полавтомась семиянь теемантень. Ды минь, государствась, седе товгак карматано тееме весементь сень туртов, штобу тетятне-аватне вейсэндявлизь карьеранть, семиянть, эйкакштнень кастоманть-тонавтоманть», - мерсь сон.
ФС-нь Председателесь ёвтнесь демографиянь ды семиянь виевгавтомань стратегиядонть ды региононь программатнеде. Башка мель явсь лездамонь тевтненень, конатнень явить вузтнэ. «Студентэнь семиятне ламолгадыть. Ансяк мелят 17 процентс. А тевтне, конат ней Наукань ды высшей образованиянь министранть кармавтоманзо коряс примавить высшей учебной заведениятнесэ, кармить лездамо тенень», — мерсь ФС-нь спикерэсь, ледстизе, прядови демографиянь стандартонь анокстамось, конась карми обязательноекс эрьва вузонть туртов.
Фестиваленть каршо Федерациянь Советэсь кемекстызе закононть, конань вельде редявикстэ кастови вузтнэсэ, дополнительной профессиональной образованиянь организациятнесэ ды научной организациятнесэ тонавтниця тейтерь-аватнень туртов пешксесэ улемань ды чачтомань коряс пособиянь средней покшолмась, истя жо законось, конась кемексты правовой паксясонть «студентэнь семия» чарькодеманть.
Валентина Матвиенко ёвтась мель фестивалень участниктненень пурнамс ушодкст, конат токшить од семиятненень лездамонть, ды кучомс мероприятиянь анокстыцятнень лемс. Вейкеськак эйстэст а кадови вановттомо.
ФС-нь спикерэсь истя жо ёвтась мель теемс студентэнь семиянь вейсэндявкс, штобу властень истямо общественной органонь вайгеленть марявлизь весе уровнятнесэ ды мельсэ кирдевлизь важодеманть пингстэ.
ФС-нь Наукань, образованиянь ды культурань коряс комитетэнь председателесь, РФ-нь Президентэнть пингстэ государственной демографиянь ды семиянь политикань топавтомань коряс советэнь ответственной секретаресь Лилия Гумерова ёвтнесь опыттэнть, кода вейсэндямс од тетятнень-аватнень ды важодеманть. «Сы шкас кадозь тетякс-авакс улемась - те свал тандавкст. 30 иеде мейле эрьва ие аванть аламолгады возможностезэ кармамс авакс. Покш компаниятне лездыть од специалисттнэнень. Минь Промышленниктнень вейсэндявксонть марто покш мель марто ваннотано, кода предприятиятнесэ совавтови корпоративной демографической стандартось. Покш корпорациятне максыть важодемань полавтневиця графикть, алкуксонь пособия, ды зярыя чинь перть важодемс ве ендо. Истят практикатне вадрясто невтизь пряст», - тешкстызе сон.
Студенттнэнь кевкстемаст лангс каршо валт истя жо макссть РФ-нь Правительствань Председателень полавтыцясь Дмитрий Чернышенко, РФ-нь Наукань ды высшей образованиянь министрась Валерий Фальков, Мордовия Республикань Прявтось, Россиянь Федерациянь Государственной Советэнь «Семья» ёнксонть коряс комиссиянь председателесь Артём Здунов. Студенттнэ явсть мель эрямо таркань кевкстематненень, карьерасо касомань возможносттненень, велетнень кастомантень-кепетемантень.
Мордовиянь педуниверситетстэ Осининтнэнь од семиясь макссь кевкстема Артём Здуновнень. «Содатано, те иестэнть саезь масторсонть ушодовсь «Семья» национальной од проектэсь, конань коряс арсеви топавтомс ламо тевть, конат аравтозь чачтоматнень ламолгавтомантень ды семиянь питнейчитнень содавиксэкс теемантень. Артём Алексеевич, кодат «Семья» ёнксонть Государственной советэнь прявт полномочият те ёнкссонть?» - кевкстизь Роман ды Анастасия.
«Госсоветэнь площадкатнесэ минь ней кортатано васенце эрямонь таркатнеде, ды мезе теемс авань капиталонть марто, штобу сон важодевель. Секс мекс лездамонь зяро енкст неень шкане минек улить – лия истямо мастор арась. Ансяк миненек эряви цетавкс. Миненек эряви пек келей медийной повестка. Монь ули мелем весементень пшкадемс. Интернетэнь виевгавтомань институтось путы социальной реклама семиядонть, кодамо улезэ семиясь, кодат улить лездамонь ёнкст. Университеттнэнь медиа-студиятне, инеськеть, максынк тенек те контентэнть. Те пек эрявикс! Миненек эряви теде кортамс. Миненек эряви марямс, минь эрятано масторсонть, косо семиянтень явить мель. Лездамонь ёнкстнэнь тынь вадрясто содасынк: урьвакстыде - субсидия. Эйкакшось чачсь - субсидия. Семиянть туртов нупальтне, нама, улест. Ректортнэ ней пелькстыть студенттнэнь кисэ, те виде. Эрьва ректорось соды, зяро эйкакшонзо, зяро эйкакш марто семият. Ды предприятиянь эрьва руководителентень эряви содамс, мезе эряви теемс, штобу те эли тона семиясь кемекставоль мель эйкакшонь чачтомадо. Тень весементь минь ваннотано минек площадкатнесэ», - мерсь Артём Здунов.
Мордовиянь Прявтось Валентина Матвиенконь ды пленарной промксонь лия спикертнэнь марто вейсэ теевсть содавиксэкс вузтнэнь стендтнэнь марто, конатнесэ максозь куля сень коряс, кода тонавтнемань заведениятне лездыть од семиятненень. Истя, Бауманонь лемсэ МГТУ-сонть, конань юрсо ютавтови фестивалесь, студентэнь семиятненень лездамонь весе тевтне кемекстазь университетэнь социальной политикасонть. Сынст ютксо урьвакстоманть-мирденень лисеманть ды эйкакшонь чачоманть марто сюлмавозь ве шкань ды эрьва ковонь материальной лезксэсь, лецямонь ды шумбрачинь витемань программатне, важодемань вешнемасо лездамось.
Инжетне ваннызь эйкакшонь налксемань нупаленть, истя жо эйкакш марто од семиянть туртов общежитиясо нупалень проектэнть.
Пленарной промксонть прядовомга кемекстазь мель ютавтомс студентэнь семиятнень фестиваленть эрьва иестэ.
Мордовия Республикань Прявтонь Пресс-службась