Ней, минек спортсментнэнь выступленияст лангс поладовиця а мерематнень лувсо, васенце таркас лиси эсенек масторонь пелькстамотнень ютавтомась, спортонь резервань анокстамонь ды массовой спортонь виевгавтомань туртов вадря условиятнень теемась. Мордовиясь неть тевтнень топавты вадрясто, вансты масторонь спортонь прявт куншкакуронь таркатнестэ вейкенть.
2022-2023 иетнестэ Мордовиянь спортсментнэ эрязасто невтизь пряст эсенек масторонь пелькстамотнесэ, истя жо Белоруссиянь, Китаень ды лия мастортнэнь представительтнень марто вейсэнь мероприятиятнесэ.
Республикасонть ютавтозь ламо покш пелькстамот, истя жо раськеютконь. 2022 иестэ – ведьс кирнявтнемань коряс Евразийской мастортнэнь васенце Кубокось, весероссиянь велень Сабантуесь, «Спорт в село!» Весероссиянь васенце фестивалесь, велоспортонть-шоссенть коряс Россиянь чемпионатось. 2023 иестэ – толонь мадстемань-идемань коряс масторлангонь чемпионаттнэ, киберспортонь коряс раськеютконь пелькстамотне, якамонь, ВМХ-велоспортонь, эй лангсо мотогонкатнень коряс Россиянь чемпионаттнэ. Ламо пелькстамот арсеви ютавтомс тедеде.
Шожда атлетикань коряс олимпийской резервань республикань спортивной школань прявтось Ольга Каниськина евтнесь, кода ветяви спортсментнэнь кочкамось, кода сынь ютыть массовостенть эйстэ мастерствань видьс кинть. «Сырнень медальтне лисить массовой спортсто, – мерсь сон. – Минь кадовтано лидерэкс, натой раськеютконь аренанть лангс апак лисе. Невтемакс, Сочисэ аволь умонь пелькстамотнесэ минек спортсменкась Эльвира Хасанова Россиянь командань чемпионатсонть путсь масторлангсонть сезононь сехте вадря невтевкс 20 вайгельбесэ спортивной якамосонть».
Пелькстамотнень тевдееманть ладямодонзо истя жо евтнесь велоспортонь коряс олимпийской резервань республикань спортивной школань спортсменэсь-инструкторось Наталья Суворова.
Мордовиянь Прявтось евтась зярыя мельть-арсемат массовой спортонь виевгавтоманть коряс. Кортамось моли кудотнень маласо спортивной площадкатнень путомадост, кудотнень пелькстамотнень, истя жо тешттнень марто свалшкань массовой зарядкатнень ютавтомадост. Кода видьстэ тешкстызе Шамиль Тарпищев: «Массовостесь ды тештесь – те пачтявиця сант: тештесь чачи массовостестэ, массовой спортсто лисить од тештть».
Ледстясынек, Россиянь Федерациянь Президентэсь Владимир Путин эсь Кучомасонзо тешкстызе, спортонть туртов условиятне улест теезь кода тонавтнемань организациятнесэ, истя жо предприятиятнесэ, эрямонь таркатнесэ, эрьва кодамо иень ды социальной категориянь эрицятнень туртов.
Мордовиянь Прявтось кемевтсь: республикась карми кирдеме ушодкстнэнь, конат сюлмавозь массовой спортонь виевгавтоманть марто, тесэ карми эрявомо чемпионтнэнь лезксэсь: сынтемест кирвазтемс спортонь од тештть карми стака. «Мон истя жо карман улеме истят мероприятиятнесэ, тердян вейсэндявомс миненек Шамиль Анвярович Тарпищевень», - мерсь Артем Здунов.
Мордовиянь Прявтось ледстизе, вадря цетавкс лиссь районтнэсэ эень катоктнень коряс. Эште зярыя иетнеде икеле аволь весе муниципалитеттнэ важодсть сынст коряс истя, кода эряви, тедеде тевтне полавтовсть. Вастовомасонть евтызь муниципалитетэнь сехте вадря катоконь коряс пелькстамонь невтевкстнэнь. Васенце таркась – Зубова Полянань, омбоце таркась – Орданьбуень эйкакшонь-од ломанень спортонь школань. Бронзась максозь Ташто Шайговань енксонь Богдановка велесэ катоконтень. Муниципальной районтнэнь прявттнэнень явшезь аволь ансяк дипломт, истя жо 200-500 тежат целковойтнень покшолмасо ярмаконь сертификатт.
Мордовия Республикань Прявтонь пресс-службась