Пецясто, июнень 8-це чистэ, Владимир Волков ульнесь кенярксчинь прмкссонть, конась алтазель Россиянь полициянтень 300 иетнень топодемантень, сон ютавтовсь Саранскойсэ Тёжа иень площадьсэнть.
"1718-це иестэ Пётр I кемекстась Санкт-Петербургонь генерал-полицмейстерэнь должность. Сонзэ важодеманть тешкстызе башка документэсь, конасонть пачтявсь Россиянь государствасо полициянь тевдеемань програмась. Истя ушодовсь тынк историясь. Колмо пингетнень перть тынк службась ашти государствань системасо сехте прявттнэстэ вейкекс, сонзэ аявовиця пельксэкс. Ютазь весе шканть перть полициясь лезэвстэ топавтсь икелензэ путозь весе тевтнень. Вейкетьстэ те кандови Россиянь империянь полициянь чинтнэнень, советской шкань виев милиционертнэнень, ды сетненень, кить кандыть службаст ней, - тешкстызе В.Д.Волков. - Течи минь чествоватано сетнень, кие свал кемевикс присягантень ды свал служи закононтень, вансты минек ломантнень эрямост ды сэтьмечист. Весень туртов полициянь формасо ломанесь невти эсь прясонзо властенть, закононть, видечинть. Минь кирдтяно каштанчи алкуксонь профессионалтнэнь коряс, кить вадрясто топавтыть эсь тевест".
Мордовиянь Прявтось ёвтась сюкпрянь сехте лембе валт ветерантнэнень. "Сюкпрянь вал марто мон пшкадян сетненень, кить эрьва кодамо шкасто воёвасть "пси таркатнесэ", ванстсть масторонть вейкетьксчинзэ ды тюрсть бандиттнэнь марто Северэнь Кавказсо, сетненень, кить течи боевой командировкасот. Тынк профессональной службанк те аволь сэтьме регионстонть веши сехте покш питне", - мерсь сон.
Владимир Волков ледстинзе внутренней тевень сотрудниктнень, кить кулость боевой постосо улемстэ. "Свалшкань ледстнема весенень, кить маштовсть Тиринь масторонть икеле долгонть топавтомсто", - мерсь МР-нь Прявтось.
Владимир Волков тешкстызе, правань васыцятнень лезэв важодемаст вельде Мордовиясь ламо иень перть ловови Россиянь сехте сэтьме регионтнэстэ вейкекс. Киртявить преступлениятне, истя жо стакатне ды пек стакатне. Киртявить китнень лангсо авариянь невтевкстнэ, свалшкане покшокс ашти преступлениятнень панжомась.
"Текень марто, тынк икеле аштить ламо стака тевть. Васняяк, Футболонь коряс масторлангонь чемпионатонть шкасто сэтьмечинть ванстомась. Миненек эрявить вастомс сядот тёжат инжеть. Ды весе минь чаркодтяно, тешкстамс те чинть ды весе меельце кенярксчитнень правань ванстомань органонь важодицятненень мереви ансяк июлень 15-це чиденть мейле. Личной составось уш ютавтозь службань кандомань виевгавтозь вариантонтень. Ветяви чинь-вень перть дежурства, виевгавтозь следствиянь-оперативной группатне ды кундамонь группатне, ламолгавтозь патрульно-постовой нарядтнэ. Прявт вийтнень эрявить путомс Чемпионатонь весе шканть перть общественной порядканть топавтомантень. Прявт ёнкстнэ - терроризманть ды экстремизманть а нолдамось, миграциянь процесстнэнь мельга ванноманть виевгавтомась, маштомс куроксто редямс куш кодат тандавкстнэнь. Текень пингстэ эряви улемс ломантнень мелест ваныцякс, панжадокс. Лездамс минек инжетненень. Башка мель явовтан сень лангс, сень эйстэ, кода МВД-сь топавтсы эсь тевензэ, ашти весе инжетнень мелест минек масторсо Футболонь коряс масторлангонь чемпионатонть ютавтоманзо коряс. Минь пек кемтяно тынк лангс. Эсензэ пельде, республикань руководстась яви тенк весемеёндонь лезкс. Кеман, минек правань ванстыцятнень виев важодемаст карми порядкань ды ломантнень сэтьмечинь нежекс, полициянь сотрудниктнень анокстамост карми пек вадря", - мерсь Мордовиянь Прявтось.
Правань ванстыцятненень поздоровот истя жо ёвтасть МР-нь Госсобраниянь председателесь Владимир Чибиркин, МР-нь Правительствань Председателесь Владимир Сушков, Мордовия Республикасо прявт федеральной инспекторось Михаил Сезганов, Саранскоень ды Мордовиянь митрополитэсь Зиновий, МР-нь Прокурорось Александр Филимонов, Мордовия Республикава МВД-нь Ветеранонь советэнь председателесь Владимир Московкин ды МР-ва Внутренней тевень министрась Юрий Арсентьев.
Ю.В.Арсентьев, Россиянь Внутренней тевень министранть Владимир Колокольцевень Кармавтоманзо коряс, «За вклад в укрепление правопорядка» Россиянь МВД-нь медальсэ казизе Мордовиянь Прявтонть В.Д.Волковонь правопорядкань кемекстамонтень ды внутренней тевень органтнэнь тевдеемаст правань регулированиянь одкстомтомантень покш путовксонть кисэ.
Истя жо покш казнеть максовсть Мордовиянь ды лия региононь (кинь сотрудниктне кандыть служба минек ёнкссо) правань ванстыцятненень.
Кенярксчинь вастовоманть пярдовомга инжетнень икеле "Гром" специальной назначениянь отрядось невтизе МВД-нь автомобилень техниканть.