«Мельспаро ушодомс поздоровонь ёвтамонть профессиональной кенярксчинть кувалма семиясто, - тешкстызе региононь руководителесь. - Тынк боевой киденть содазь, се зыяндонть, конантень тынь путтадо эсь эрямонть, арсян ёвтамс ансяк вейке: почет ды мелень явома истят семиятненень! Ули меленек кунсоломс историянк - кода теевить истят семиятне, мейсэ истямо кеме ламо эйкакшонь триця семиянть юрозо?»
Надежда Бусарова низэ ёвтнесь, мирдензэ марто сынь теевсть содавиксэкс сонзэ важодема таркасо ды уш ламо иень перть эрить седейшкава, кастыть ниле цёрат ды кемекстыть эсь кудоютконь тевтнень. Покш цёрантень Егорнэнь уш 14 иеть, курок сави кочкамс профессия ды ёнкс, конасонть ули мелезэ касомс-кепетемс. Кирилл тонавтни 7-це классо, Никита - васенце классо тонавтниця, сехте вишкинесь Саша яки эйдень кужов. Весе эйкакштне явить мель спортонь эрьва кодат ёнкстнэнень, шахматтнэнень. Лездыть аванстэнь ды тетянстэнь пиресэ ды кудоютконь тевтнесэ.
Семиясь эри Лямбирень енкссо частной кудосо. Кортыть, эрямонь тарканть келейгавтомасо сыненст пек лездась государствась ды лездамонь эрьва кодат ёнкстнэ.
«Мон монсь касынь ламо эйкакшонь триця семиясо. Секс свал содылинь, монь истя жо кармить ламо эйкакшон. Арсетяно, нама, тейтерькадо, ансяк весемесь минек эште икеле! Ёвтаса, мон мирдем удало, теке кевень стенанть удало», - ёвтнесь Надежда Бусарова.
Вастовомасонть ульнесь Мордовия Республикава Россиянь МЧС-нь Главной управлениянь прявтось Сергей Репин. Сон тешкстызе, Александр Бусаров - пек вадря, ответственной ды сэтьме ломань, покш грузонь, габаритной техникань витнемань ды ветямонь покш опыт марто лия ёнов а молиця специалист.
«Александр Бусаров - виев, апелиця ды кемевикс, - мерсь Сергей Репин. - Зярдо подразделениянть 2021 иестэнть толсо керизе виев качамонть пингстэ, сон ливтинзе-ускинзе сынст вирьстэнть, тень вельде ванстызе цела отделениянть эрямонзо!»
Теде башка, Александр Бусаровнень кемевтить Донбассов гуманитарной грузонь пачтямонть, сон пурнави силовой ведомстванть пельде – истят ардтнематнесэ сон ульнесь уш сисемксть.
Течи Бусаровтнень семиясь покшолгадсь - Мордовиянь Прявтось казсь тенст кавто ковонь лабрадор кискалевкске, конадонть пек арсесть эйкакштне. Семиясь алтась арсемс тензэ мазый ды гайтев лем.
Мордовия Республикань Прявтонь Пресс-службась