Мордовиянь Правительствань Председателесь Владимир Сидоров тешкстызе, Саранскойсэ ды муниципалитеттнэсэ ломантне пеняцить эенть лангс, конась вельтинзе китнень ды тротуартнэнь. Кавксть ламолгадсть травмпунктс пшкадематне.
Премьер-министрась кармавтсь Госкомтрансонтень ды районтнэнь прявттнэнень куроксто витемс китнень эенть эйстэ ванськавтомань кевкстеманть.
Энергетикань ды ЖКХ-нь министрань тевтнень топавтыцясь Иван Петуров пачтясь социальной газификациянь программанть топавтомадонзо. Уш те недлястонть 2022 иень аравтлувось 3505 кудотнес сэнь уштомапеленть ветямонь коряс ули топавтозь. Сынст эйстэ 2500 кудотнесэ газось уш нолдазь. Владимир Сидоров кармавтсь а лоткавтомс важодеманть модань участкатнень границятнень видьс газонь ветямонть лангс.
Эрицятнень социальной апак вансто категориятненень газонь оборудованиянь рамамонь коряс лездамонь тевесь явозь 27 ломантненень, пачтясь Эрицятнень социальной ванстомань, трудонь ды занятостень министрась Игорь Князьков.
Чаунзань енксонь прявтось Руслан Батеряков евтнесь 2022 иестэ муниципалитетэнь касомань-кепетемань икелепелень невтевкстнэде.
Районсонть 11 ковтнень перть кассь ловсонь, ракшань ды нармунень производствась. Эсь доходтнэнь, инвестициятнень, груздязь товартнэнь ды эрьва ковонь зарплатанть коряс муниципалитетэсь саи васенце таркат Мордовиясо.
Инвестициянь проекттнэнь топавтоманть вельде 9 ковтнень перть явовтозь 3 миллиардто ламо целковойть ды теезь 359 важодемань таркат. Районсонть эрязасто строить ды витнить кить.
Правительствань Председателесь кармавтсь явомс покш мель туризмань виевгавтомантень ды эрямонь таркатнень строямонтень, неть невтевкстнэнь коряс Чаунзась саи 18-це тарка муниципалитеттнэнь ютксо.
Маласо иетнестэ «Комплексное развитие сельских территорий» госпрограмманть лувсо Комсомольской поселкасонть арсеви строямс ламо функциянь социально-спортивной куншкакуро, ванськавтомань сооружения марто канализациянь коллектор, «Цементник» культурань кудо ды анокстамс площадка эрямонь таркатнень строямонть туртов. Владимир Сидоров тешкстызе, эряви куроксто анокстамс проектэнь-сметань документациянть.