Продукциянь линейкасонть – вагонтнэнь 100 седе ламо сертифицированной модельть. Тесэ нолдавить подвижной составонь весе видтнэ, сынст ютксо цистернат, хопперт, полувагонт, вельтязь вагонт, платформат, думпкарт.
«РМ Рейл» компаниянь генеральной прявтось Максим Тевс евтнесь, 2023 иестэ теезь подвижной составонь 10 600 единицат. Тедеде арсеви кастомс вагонтнэнь нолдамонть. «РМ Рейл» компаниянь стратегиянть юрсо – од модельтнень арсемась-анокстамось ды од продукттнэнь рынкас ливтемась. Те покш сталмонь усксиця инновациянь тележкат, эрьва кодамо криогенной оборудования, изотермической вагонт ды контейнерт.
Компаниясь арсесь-анокстась ды нолдась серийной производствас алюминиень солавксто продукциянь модельть: минеральной удобрениятнень усксемаст туртов вагон-хоппер, концентрированной азотной кислотань туртов вагон-цистерна, пертьпельксэнь сжиженной газонь усксемань ды нурька шкас ванстомань туртов контейнер-цистерна. Истя жо ули изотермической продукциянь производствань коряс од енкс - вагон-термос ды автономной рефрижераторной вагон, ды контейнер. Нолдави оборудования нефтегазовой ды химической отраслятнень туртов.
Игорь Комаровнень невтизь роботизированной сварямонь пельксэнть. Предприятиянть туртов сварямонь производствась – прявттнэстэ вейкесь, неень шкань оборудованиясь пек вадрясто невтизе эсь прянзо. «Сварямонь качествась – пек покш, ломанесь истя а тейсы», – евтнесь инжетненень «Рузхиммашонь» прявтось Валерий Ларин. – Од ломантне сыть тей важодеме покш мель марто».
Кадратнень кисэ пшти конкуренциянть лувсо, те кандови Россиянь весе промышленностенть туртов, «РМ Рейл» компаниясь зярыя иетнень перть кемекстась вагононь строямонь профессиятнень туртов персоналонь анокстамонь ламо профилень система.
Неень шкане тесэ топавтовить кадрань зярыя покш проектт. 2021 иестэ предприятиясонть панжозь Содамочитнень ды ерокчитнень фабрикась, косо моли тонавтома вагононь строямонь 14 профессиятнень коряс. Панжомань шкастонть саезь тесэ тонавтнесть 11 тежадо седе ламо ломанть.
Мордовиянь Прявтось Артём Здунов тешкстызе «Профессионалитет» федеральной проектэнть коряс важодемань эрявиксчинть, те проектэнь участникекс кармась «РМ Рейл». Проектэнть лувсо Н.П. Огарев лемсэ МГУ-нть марто вейсэ теезь промышленной предприятиятнень туртов средней профессиональной образованиянь тонавтомань программатнень топавтоманть туртов отраслянь образовательно-производственной куншкакуро (кластер). Тонавтомань колмо модультне теезь Рузаевкань машиностроениянь институтсонть, вейке производственноесь – заводонть юрсо. «РМ Рейл» компаниясь саизе эсензэ лангс башка корпусонь витнеманть ды тов неень шкань оборудованиянь путоманть. Производствасонть улемась лезды студенттнэнень получамс профессиянь седе домка содамочить, теевемс содавиксэкс компаниянь производствань культуранть марто ды тонавтнемс важодеме алкуксонь кармавтоматнень лангсо.
«Тонавтнян Рузаевкань машиностроениянь институтонь СПО-нь отделениясонть, - евтнесь вейке студентэсь Владислав Катков. – Истямо практикась эряви – сон лезды содамс алкуксонь производстванть ды тонавтнемс профессиянтень нурька шкас».
«Рузхиммашсо» улемстэ Игорь Комаров ды Артём Здунов кортасть компаниянь руководстванть марто производствань виевгавтомань, од инвестпроекттнэнь топавтомань арсематнеде ды талновтыця кевкстематнеде, конатнень марто течинь чине вастовить машиностроительтне.
Мордовия Республикань Прявтонь пресс-службась