Понедельникстэ, февралень 12-це чистэ, Саранскоев важодемань содавтома марто сакшнось Равчирень федеральной округсо Президентэнь полномочной представителесь Михаил Бабич. Республикань Кудосонть сон ютавтсь зярыя промкст, конатнесэ ульнесь Мордовиянь Прявтось Владимир Волков.
Официальной мероприятиятнень прядовомадост мейле ульнесь пресс-подход, конань лувсо Михаил Бабич ды Владимир Волков макссть каршо валт республикань журналисттнэнь кевкстемаст лангс.
Тешкстасынек, Саранскоев самодо икеле, РФ-нь Президентэнь Полпредэсь ульнесь Оренбургонь областень Орск ошсо ды вастовкшнось февралень 11-це чистэ Москов ало «Саратовские авиалинии» компаниянь самолетонь авиакатастрофасонть чавовозетнень малавиксэст марто.
Катастрофасонть чавовсь 71 ломань, сынст эйстэ 34-тне Оренбургонь областень эрицят. Чавовозетнень ютксо ульнесть лия региононь эрицяткак, истя жо Рузаевкасо чачозь тейтересь Елена Давыдова.
Владимир Волковонь валонзо коряс, чугункань кинь ошсонть эри чавовозенть авазо. Сонензэ явови весемеёндонь лезкс, истя жо пандови 1 млн целковойть.
«Оренбургонь областьсэ яволявтозь траур. Покш зыянось токинзе весень седеест. Орскоев межведомственной оперативной штабонть ютавтоманть туртов састь МЧС-нь специалисттнэнь покш группась, криминалистт, здравоохранениянь, важодемань ды социальной защитань министерствань важоджицятне, – тешкстызе Михаил Бабич. – Мероприятиянть лувсо ванновсть весе кевкстематне, конат токшить чавовозетнень муеманть, малавикстнэнь икеле социальной гарантиятнень ды обязательстватнень топавтоманть, сыненст явови весемеёндонь лезкс, истя жо социальной пандовкст, кода федеральной, истя жо Московонь, Оренбургонь областень ды лия регионтнэнь бюджетстэ. Весе кевкстематне улить витезь маласо шкастонть».
РФ-нь Президентэнь полпредэнть валонзо коряс, неень шкане Орск ошонь 4№ больницясонть чавовозетнень малавиксэст туртов явови психологиянь лезкс. Тосо жо ютавтови экспертнэнь важодемась, конась лезды редямс малавиксчинь степененть, тень туртов а сави ардомс Московонь областев зыянонь лисемань таркантень.
Теде мейле ПФО-со Президентэнь Полномочной Представителень делегациясь сась Саранскоев, косо ютавтовсть зярыя промкст – бюджетэнть сбалансированиянь коряс ды региононь общественно-политической кевкстемань ды социально-экономической виевгавтомань коряс.
Тешкстазель, Мордовиясь – эрязасто виевгадыця регион. Меельце иетнестэ панжозь здравоохранениянь, спортонь, культурань, образованиянь пек ламо объектт, строявить эрямо таркат. Теевить условият ломантнень эрямост вадрялгавтомга.
Ошонь ды велень инфраструктурань ламот объекттнэнь строямось, таркатнень вадрялгавтомась-мазылгавтомась, промышленностень од предприятиятнень, социальной сферань объекттнэнь панжомась вешить ламо ярмакт. Тень вельде ладявсь финансонь аволь шожда ситуация.
«Республикасонть долгонь ситуациясь ламосо сюлмавозь сень марто, зярыя иеде икеле регионсонть ютавтовсть юбилеень покш мероприятият. Ней Саранскоесь прими футболонь коряс масторлангонь чемпионатонть. Минь РФ-нь Финансонь министранть марто зярыя ковдо икеле ладинек, ютавтомс республикань бюджетэнь системань аудит ды ветямс тесэ выездной промкс. Секскак течи Леонид Владимирович Горнин, Финансонь министранть полавтыцясь, важодсь мартонок. Минь домкасто ваннынек межбюджетной отношениянь кевкстематнень, конатнень коряс эряви явомс лезкс республикантень Россиянь Федерациянь правительстванть, финансонь министерстванть пельде. Мордовиянь руководствась, эсензэ пельде, саинзе лангозонзо эрявикс обязательстватнень государственной долгонть киртямга, расходтнэнь вадрялгавтомга. Кеман, кемекстазь весе тевтне максыть вадря результатт, ды минь редявикстэ шумбралгавтсынек ламо иень долгонь ситуациянть, республикась седе товгак эрязасто виевгадозо, долгонь стакачитневтеме, конат таштавсть ламо иень перть», – тешкстызе Михаил Бабич.
Промкссонть, конась алтазель Россиянь Федерациянь Президентэнь кочкамотнень анокстамонтень ды ютавтомантень, кортавсть организациянь кевкстематне ды кевкстематне, конат сюлмавозь сэтьмечинть марто. Ёвтазельть зярыя кармавтомат, кочкамотне ютаст демократиянь сэтьме лувсо РФ-нь законодательстванть топавтозь.
2018 иень Футболонь коряс масторлангонь чемпионатонтень анокстамонь кевкстематнеде кортамсто, Михаил Бабич макссь покш питне инфраструктурань объекттнэнь анокчинтень ды вадрячинтень.
«Течи арсевсь панжомс аэропортонь комплексэнь пассажирэнь терминалонть, Саранскоенть перька молиця кинть, ансяк Москов ало покш зыянонь лисеманть кувалма кемекстазель решения весе неть мероприятиятнень а ютавтомс, – мерсь ПФО-со Президентэнь полпредэсь. – Объекттнэ целанек анокт, ды ушодыть важодеме штатной режимсэ. Анокстамонь вадря лувсо ашти стадионось. Арасть кавтолдомат, сон карми максозь шкастонзо. Китне, гостиницань инфраструктурась – весемесь лади кемекстазь аравтлувонтень.
Мон арсян, республикась шкастонзо ды пек вадрясто анокстась спортонь ды политикань прявт тевентень. Весемесь юты пек парсте. Ды сехте прявтось – весе объекттнэ кармить республикань эрицятнень туртов покш питнейчикс».
Теке жо чистэнть Михаил Бабич РФ-нь Президентэнть кармавтоманзо коряс макссь удостоверения Мордовия Республикань арбитражной судонь председателентень Сергей Александровнень.
Мордовия Республикань Прявтонть пресс-службась