2023 иестэ республикань финансонь системась седеяк кемекставсь: редявикстэ кассть эсь доходтнэ, Мордовиянь государственной долкось киртяви, ламо иетнень перть васенцеде республикась тешкстазь кода финанстнэнь управлениянь вадря качества марто регион. Кепетезь Мордовиянь кредитэнь рейтингесь.
Федеральной казначействань руководителень полавтыцясь Антон Дубовик тешкстызе республикань бюджетэнь топавтомань покш качестванть ды Правительствань финансонь-экономической блоконь вадря важодеманть. Сон истя жо евтась сюкпря Мордовиянь Прявтонтень лезэнь кандыця вейсэнь тевдееманть кисэ, истя жо Россиянь Казначействань бухгалтерской обслуживаниянь куншкакуронть республикасонть тееманть коряс. «Те федеральной уровнянь эрявикс проект, ды сонзэ пек вадрят перспективанзо», – мерсь Антон Дубовик.
Артём Здунов тешкстызе, те проектэнтень явови покш мель. Ней куншкакуросонть важодить малав 200 ломанть, сыненст пандови минек региононь онкставкстнэнь коряс покш зарплата. «Те куншкакурось – минек республикань конкуренциянь башка енкстнэстэ вейкесь», – мерсь республикань руководителесь.
Артём Здунов истя жо тешкстынзе зярыя енкстнэнь, конат эрявить региононь финансонь системань седе тов виевгавтоманть туртов. Сынст ютксо бюджетэнть лангс долконь сталмонть седе тов киртямось. Россиянь Федерациянь Президентэнть Владимир Путинэнь Кучомасонзо яволявтозь бюджетэнь кредиттнэнь коряс долконь пельксэнть нардамодонзо. Поладови Мордовиянь социально-экономической виевгавтомань башка программань топавтомась. Эряви поладомс бюджетэнь доходтнэнь кастомань, ресурстнэнь тевс нолдамонь лезэвчинь кепедемань коряс важодеманть.
Республикань финансонь органтнэнь важодемань невтевкстнэде пачтясь МР-нь Финансонь министрась Сергей Тюркин. Сон тешкстынзе зярыя невтевкстнэнь. Сынст ютксо вадря динамика невти налогообложениянь шождалгавтозь системась, иенть коряс касомась кармась 35%, те сехте вадря невтевкс Равчирень федеральной округсонть ды нилеце – масторонь келес. Профессиональной доходонть лангс налогонь пачтямотнень касомась кармась 187% – те истя жо сехте вадря невтевкс округсонть ды котоце масторонь келес. Редяви вадря динамика организациятнень ули-паронть лангс налогонь коряс. Тесэ касомась кармась 13,7%, те седе ламо масторонь келес средней невтевксэнть коряс (3,9%). Тешкстави республикань Китнень фондонь источниктнень коряс касомась.
Вадря динамикань прявт енкстнэнь ютксо тешкстазь льготань налогонь климатонь тееманть вельде лия регионтнэстэ республикав башка предпринимательтнень ды организациятнень эрязасто тердемась. 2023 иенть перть республикав састь 2 310 башка предпринимательть ды 153 юридической лицят.
Мелят республикась эзинзе киртя темпатнень национальной проекттнэнь топавтомаст коряс. Россиянь Правительствань Проектэнь тевдеемань департаментэсь анокстась РФ-нь регионтнэнь рейтинг федеральной бюджетэнь ярмактнень кассовой топавтоманть коряс. Омбоце ие республикась невти вадря цетавкст ды сови ТОП-10 регионтнэнь юткс.
Коллегиясонть истя жо кортасть МР-ва Федеральной казначействань Управлениянь руководителесь Ольга Соколова, закупкатнень ютавтомань региононь куншкакуронь прявтось Иван Мысенко.
Региононь эрицятнень финансонь содамочист кастомань коряс важодемадонть евтнесь Н. П. Огарёв лемсэ МГУ-нь финанстнэнь ды кредитэнь кафедрань прявтось, эрицятнень финансонь содамочист региононь куншкакуронь руководителесь Надежда Семенова. Республикань Прявтось мерсь, зярс те важодеманть а мереви евтамс вадрякс, сень мельсэ кирдезь, Мордовиянь зяро эрицят манчить интернет-мошенниктне. Те енксонть коряс эряви виевгавтомс ведомстватнень ютксо вейсэнь тевдееманть ды путомс пирявт те тандавксонтень.
Коллегиянь промкссонть истя жо казевсть республикань финансонь органтнэнь важодицятне.
Мордовия Республикань Прявтонь пресс-службась