«Мелят минек масторсо тешкстазельть 75 «кирваземат» 33 регионтнэсэ, истя жо Равчирень федеральной округонь 7 субъекттнэсэ. Тень вельде маштозельть нармунень 6 млн седе ламо прят, экономической виде емавксось кармась 1,8 млрд целковойтнеде седе ламо. Уцяскас, мелят минек профилактикань тевтне лездасть, республикасонть нармунень гриппень коряс «кирваземат» арасельть. Евтан сюкпря нармунень кирдемань хозяйстватненень весе вешематнень виде ды профессиональной топавтоманть кисэ», – мерсь Артём Здунов.
Ней, республикасонть вадря тевтнень ванстомга, эряви важодемс икельдязь. «Продовольствиянь безопасностень топавтомасо нармунень кирдемань продукциянь смустенть мельсэ кирдезь, эряви кемекстамс тевть, конат аравтозь нармунень кирдемань предприятиятнес нармунень высокопатогенной гриппень совавтомань ды ламолгадомань а нолдамонтень ды биологической безопасностень топавтомантень», – тешкстызе Мордовиянь Прявтось.
Нармунень кирдемась – республикань агропромышленной комплекссэ прявт енкс. Кода тешкстызе МР-нь Велень хозяйствань ды продовольствиянь министрась Антон Илюшкин, 2023 иестэ сывелень производствань вейсэнь покшолмасонть нармунень пельксэсь саи малав 60%. «Те иень якшамковонь 1-це чинтень велень хозяйствань организациятнесэ нармунтнеде – 17,4 млн прятнеде седе ламо – те сехте покш невтевкс ПФО-со, – мерсь министрась. - Личной подсобной хозяйстватнесэ кирдевить 319 тежат прят, истя жо нармунень кирдемань предприятиятнень перька кемень вайгельбень покшолмань таркасонть – малав 35 тежат прят».
Мордовиясо нармунть кирдить сисем предприятият 35 площадкатнесэ.
Масторлангсо ды Россиясо эпизоотической тевтнень ванномась максы аволь вадря прогноз нармунень высокопатогенной гриппень седе тов ламолгадоманть коряс. Тевтнень стакалгавтсы нармунтнень сезононь миграциясь, истя жо нармунень кирдемань покш предприятиятнесэ ды эрицятнень ютксо ветеринариянь коряс законодательствань а топавтомась.
Те тандавксонть эйстэ ванстомань коряс кортамосонть ульнесть мелень явиця весе енкстнэ, истя жо республикань нармунень кирдемань предприятиятнень руководительтне. Профилактикань коряс важодемадонть евтнесь Мордовия Республиканть ды Пензань областенть коряс ветеринарной ды фитосанитарной надзоронть коряс Федеральной службань Управлениянь руководителесь Виктор Кидяев.
Промксонть прядовомга кемекстазь решения ютавтомс эрицятнень личной подсобной хозяйстватнесэ кирдевиця нармунтнень вакцинациянть. Республикань Ветеринарной службась ушодсы те важодеманть маласо шкасто. Республикань эрицятнень туртов кудонь нармунень вакцинациясь ютавтови питневтеме – республиканть туртов эрявикс ярмактне улить явозь федеральной бюджетстэ. Истя жо эряви ванстомс региононть лия ендо усковиця нармунтнень эйстэ.
Ледстясынек, Мордовиясо нармунень сывелень ды саразонь алонь питнетне сехте алкинеть ПФО-сонть.
Мордовия Республикань Прявтонь пресс-службась